തമിഴ്നാട്ടിൽ വാഹനാപകടം: കുമളി സ്വദേശികളായ രണ്ട് യുവാക്കള്‍ മരിച്ചു

തമിഴ്നാട്ടിലുണ്ടായ ബൈക്കപകടത്തിൽ ഇടുക്കി കുമളി സ്വദേശികളായ രണ്ട് യുവാക്കൾ മരിച്ചു

റോസാപ്പൂക്കണ്ടത്ത് ശേഖറിന്റെ മകൻ ശരത് (22) സുമയ്യ മൻസിലിൽ ഷാജഹാൻ - ദൗലത്ത് ദമ്പതികളുടെ മകൻ താജുദ്ദീൻ (21) എന്നിവരാണ് മരിച്ചത്

ചൊവ്വാഴ്ച വൈകിട്ട് ആറുമണിയോടെ കുമളിക്ക് സമീപം തമിഴ്നാട്ടിലെ ലോവർക്യാമ്പിലെ ഇളയരാജ ബംഗ്ലാവിന് സമീപത്ത് വെച്ചായിരുന്നു അപകടം

സുഹൃത്തുക്കളും അയൽവാസികളുമായ ഇരുവരും തമിഴ്നാട്ടിൽ നിന്നും മടങ്ങി വരവെ ഇവർ സഞ്ചരിച്ച വാഹനം ഇളയരാജ ബംഗ്ലാവിന് സമീപം ഉണ്ടായിരുന്ന ലോറിയുമായി കൂട്ടിയിടിച്ചാണ് അപകടമുണ്ടായതെന്നാണ് പ്രാഥമിക വിവരം

സംഭവസ്ഥലത്ത് വച്ച് തന്നെ ശരത് മരണപ്പെട്ടു. നാട്ടുകാരും പോലീസും ചേർന്ന് താജുദീനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

ഉത്തമ പാളയം കറുത്ത റാവുത്തർ കോളേജിലെ ബികോം വിദ്യാർത്ഥിയാണ് താജുദീൻ. ശരത് തമിഴ്നാട് വനം വകുപ്പിൽ വാച്ചറായി അടുത്ത കാലത്താണ് ജോലിയിൽ പ്രവേശിച്ചത്.

ഇരുവരുടെയും മൃതദേഹം കമ്പം സർക്കാർ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.