ബിൻ ലാദന്റെ മകനെ കുറിച്ച് വിവരം നൽകുന്നവർക്ക് 7 കോടി വാഗ്ദാനം ചെയ്ത് അമേരിക്ക

കൊല്ലപ്പെട്ട അൽ-ഖ്വയ്ദ നേതാവ് ബിൻലാദന്റെ മകനെ കുറിച്ച് വിവരം നൽകുന്നവർക്ക് ഒരു മില്യൺ ഡോളർ (7 കോടിയിലധികം രൂപ) വാഗ്ദാനം ചെയ്ത് അമേരിക്ക. ഉദിച്ചു വരുന്ന തീവ്രവാദ മുഖമെന്ന് മുന്നിൽ കണ്ടാണ് നീക്കം

ബിൻ ലാദന്റെ ഇളയ മകനാണ് ഹംസ ബിൻ ലാദൻ

ജിഹാദിന്‍റെ കിരീടാവകാശി എന്ന് വരെ വിശേഷിപ്പിക്കപ്പെട്ട ഹംസ എവിടെയാണെന്നുള്ളതിനെ കുറിച്ച് പല അഭ്യൂഹങ്ങളും പ്രചരിച്ചിരുന്നു. പാകിസ്ഥാന്‍, അഫ്ഗാനിസ്ഥാൻ, സിറിയ എന്നിങ്ങനെ പലരാജ്യങ്ങളുടെ പേരുകൾ ഉയർന്നു കേട്ടിരുന്നു. ഇയാൾ ഇറാനിൽ വീട്ടു തടങ്കലിലാണെന്നും അഭ്യൂഹമുണ്ടായിരുന്നു

അൽ-ഖ്വയിദയുടെ പുതിയ നേതാവായി സംഘടനയുടെ മുൻ തലവൻ ഒസാമ ബിൻ ലാദന്റെ മകന്‍ ഹംസ ബിന്‍ ലാദൻവളർന്നു വരുന്നുവെന്നാണ് അമേരിക്കൻ സ്റ്റേറ്റ് ഡിപ്പാർട്മെന്റ് പ്രസ്താവനയിൽ പറയുന്നത്.

തന്റെ പിതാവിന്റെ മരണത്തിന് പ്രതികാരം വീട്ടാൻ ഹംസ ഒരുക്കങ്ങൾ നടത്തുന്നതായി റിപ്പോർട്ടുകൾ ഉണ്ടായിരുന്നു

യുഎസിനെയും പടിഞ്ഞാറൻ സഖ്യരാഷ്ട്രങ്ങളെയും ആക്രമിക്കാൻ ആഹ്വാനം ചെയ്യുന്ന ഹംസയുടേതെന്നു കരുതുന്ന ചില ഓഡിയോ, വിഡിയോ സന്ദേശങ്ങൾ മുൻവർഷങ്ങളിൽ പുറത്തുവന്നിരുന്നു ഇതാണ് സംശയങ്ങൾക്കിടയാക്കിയത്.

യുഎസിന്റെ ആഗോളഭീകര പട്ടികയിൽ ഉൾപ്പെട്ട ആളാണ് ഹംസ.

ഹംസയുടെ പൗരത്വം സൗദി അറേബ്യ റദ്ദാക്കിയതായും നേരത്തെ വാർത്തകൾ വന്നിരുന്നു