കടുവ നാട്ടിലിറിങ്ങി; വയനാട്ടില്‍ റോഡ് തടഞ്ഞ് നാട്ടുകാര്‍

വയനാട് ഇരുളത്ത് രണ്ട് വനപാലകർക്കാണ് കടുവയുടെ ആക്രമണത്തിൽ പരുക്കേറ്റത്. സുരക്ഷ ഉറപ്പാക്കണമെന്നാവശ്യപ്പെട്ടായിരുന്നു നാട്ടുകാർ റോഡ് ഉപരോധിച്ച് പ്രതിഷേധിച്ചത്.

പ്രതിഷേധത്തെ തുടർന്ന് നിരവധി വാഹനങ്ങളാണ് റോഡിൽ കുടുങ്ങി കിടന്നത്.

ഇരുളം ആന പന്തി കോളനിയിലെ ഫോറസ്റ്റ് വാച്ച്മാന്മാര്‍ക്കാണ് കടുവയുടെ ആക്രമണത്തിൽ പരുക്കേറ്റിരുന്നത്. ഗുരുതരമായി പരുക്കേറ്റ വാച്ചര്‍ സാജനെ പരിക്കുകളോടെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരിക്കുകയാണ്.

കുറിച്വാട് റേഞ്ച് ഓഫീസര്‍ കെ. രതീശന്റെ നേതൃത്വത്തില്‍ വനപാലക സംഘം ഫീല്‍ഡ് വിസിറ്റ് നടത്തുന്നതിനിടയിലായിരുന്നു കടുവയുടെ ആക്രമണം.

കടുവയുടെ ആക്രമണത്തെതുടർന്ന റെയ്ഞ്ചര്‍ ഉള്‍പ്പെടെയുള്ളവര്‍ ഓടി രക്ഷപ്പെടുകയായിരുന്നു. സ്ഥലത്ത് ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്.

വന്യ മൃഗങ്ങളുടെ ഭീഷണി രൂക്ഷമായതോടെയാണ് ജനങ്ങൾ തെരുവിലിറങ്ങിയത്.

സുൽത്താൻബത്തേരി എംഎൽഎ ഐസി ബാലകൃഷ്ണൻ ഉൾപ്പെടെയുള്ള ജനപ്രതിനിധികൾ സ്ഥലത്തെത്തി പ്രതിഷേധക്കാരോട് സംസാരിച്ചു.