'കടിക്കരുത്': കവിളിൽ ചുംബിക്കണമെന്ന കന്യാസ്ത്രീയുടെ അഭ്യർഥന സ്വീകരിച്ച് മാർപാപ്പ

വത്തിക്കാൻ: തീർഥാടകയുടെ കയ്യ് തട്ടിമാറ്റിയെന്ന വിവാദത്തിനിടെ ചുംബനം വേണമെന്ന കന്യാസ്ത്രീയുടെ അഭ്യർഥന സ്വീകരിച്ച് ഫ്രാന്‍‌സിസ് മാർപാപ്പ. വത്തിക്കാൻ ആഡിറ്റോറിയത്തിലെ പതിവ് ആഴ്ച സന്ദർശനത്തിനിടെയാണ് സംഭവം.

ബാരിക്കേഡിന് പിന്നിൽ നിൽക്കുന്ന നൂറുകണക്കിന് ആളുകള്‍ക്ക് പുഞ്ചിരി സമ്മാനിച്ച് നടന്നു വരുന്നതിനിടെയാണ് അപ്രതീക്ഷിതമായി ആള്‍ക്കൂട്ടത്തിലൊരു കന്യാസ്ത്രീ പോപ്പിനോട് ചുംബനം ആവശ്യപ്പെട്ടത്.

ആദ്യം അകലം പാലിച്ചു നിന്നെങ്കിലും പിന്നീട് ഉപാധികളോടെ ചുംബനം നൽകാമെന്നായി. ' ഞാൻ ചുംബനം നൽകാം.. പക്ഷെ ശാന്തമായിരിക്കണം.. കടിക്കാൻ പാടില്ല... ' എന്നായിരുന്നു പോപ്പിന്റെ വാക്കുകൾ.

കന്യാസ്ത്രീ ഇത് സമ്മതിച്ചതോടെ അവരുടെ അടുത്തേക്ക് നീങ്ങിയ മാർപാപ്പ കവിളിലായി സ്നേഹ ചുംബനം നൽകി. മാർപാപ്പയുടെ ആ ആർദ്ര നീക്കം കണ്ട് ചുറ്റും കൂടിയവരെല്ലാം സന്തോഷത്തോടെ ആർപ്പു വിളിക്കുകയും ചെയ്തു.

നേരത്തെ ഇത് പോലൊരു സന്ദർശനത്തിനിടെ തന്റെ കൈ പിടിച്ചു വലിച്ച തീര്‍ഥാടകയുടെ കൈ മാർപാപ്പ ദേഷ്യത്തോടെ മാറ്റിയത് വിവാദം ഉയർത്തിയിരുന്നു. സംഭവത്തിൽ മാർപാപ്പ പിന്നീട് ഖേദം പ്രകടിപ്പിക്കുകയും ചെയ്തിരുന്നു.

പെട്ടെന്ന് ദേഷ്യം വരുന്ന ആളാണ് പോപ്പെന്നാണ് ഈ സംഭവം വ്യക്തമാക്കുന്നതെന്നായിരുന്നു വിമർശകരുടെ വാദം. എന്നാൽ നടക്കാൻ പ്രയാസമുള്ള 83 കാരനായ മാര്‍പാപ്പ, പെട്ടെന്നുള്ള ഈ പിടിച്ചു വലിയിൽ വീഴാൻ സാധ്യതയുണ്ടെന്നായിരുന്നു മറിച്ചുള്ള വാദം.