ആരാണ് റയ്യാന ബർണവി?
സൗദിയുടെ ബഹിരാകാശ ദൗത്യത്തിന്റെ ഭാഗമായതോടെ അന്താരാഷ്ട്ര തലത്തിൽ തന്നെ ഇതിനോടകം ശ്രദ്ധ പിടിച്ചുപറ്റിയിരിക്കുകയാണ് റയ്യാന ബർണവി. ബയോ മെഡിക്കൽ ഗവേഷകയാണ് 33 കാരിയായ റയ്യാന. ന്യൂസിലാൻഡിലെ ഒട്ടാഗോ സർവകലാശാലയിൽ നിന്നാണ് റയ്യാന ബയോമെഡിക്കൽ സയൻസിൽ ബാച്ചിലർ ബിരുദം നേടിയത്. റിയാദിലെ അൽഫൈസൽ യൂണിവേഴ്സിറ്റിയിൽ നിന്ന് അതേ വിഷയത്തിൽ ബിരുദാനന്തര ബിരുദം സ്വന്തമാക്കി. കാൻസർ സ്റ്റെം സെൽ ഗവേഷണത്തിൽ ബർണവിക്ക് ഒൻപത് വർഷത്തെ പ്രവർത്തന പരിചയമുണ്ട്. അന്താരാഷ്ട്ര ബഹിരാകാശ നിലയത്തിലെ ദൗത്യത്തിന്റെ ഭാഗമായി, മിഷൻ പരീക്ഷണങ്ങൾ നടത്തുന്നതിന്റെ ഉത്തരവാദിത്തം റയ്യാന ബർണവിക്കായിരിക്കും.
advertisement
Also Read- ടെസ്റ്റോസ്റ്റിറോണിന്റെ അളവ് കുറഞ്ഞാൽ സംഭവിക്കുന്നതെന്ത്? പുരുഷന്മാർ ശ്രദ്ധിക്കേണ്ട മൂന്ന് കാര്യങ്ങൾ
എന്താണ് സൗദി അറേബ്യൻ സ്പേസ് പ്രോഗ്രാം?
സൗദി ഹ്യൂമൻ സ്പേസ് ഫ്ലൈറ്റ് പ്രോഗ്രാമും അമേരിക്ക ആസ്ഥാനമായുള്ള സ്വകാര്യ ബഹിരാകാശ കമ്പനിയായ ആക്‌സിയവും തമ്മിൽ സഹകരിച്ചുകൊണ്ടുള്ള ദൗത്യമാണിത്. സൗദി അറേബ്യൻ കിരീടാവകാശി മുഹമ്മദ് ബിൻ സൽമാൻ അൽ സൗദിന്റെ വിഷൻ 2030 ന്റെ ഭാഗമായി, സൗദി സ്പേസ് കമ്മീഷൻ (എസ്‌എസ്‌സി) യുടെ കീഴിലാണ് സൗദി ഹ്യൂമൻ സ്പേസ് ഫ്ലൈറ്റ് പ്രോഗ്രാം ആരംഭിച്ചത്. ശാസ്ത്രീയ ഗവേഷണത്തിന് സംഭാവന നൽകുക, മനുഷ്യ ബഹിരാകാശ യാത്രയിൽ തങ്ങളുടെ കഴിവുകൾ വികസിപ്പിക്കുക എന്നതൊക്കെയാണ് പദ്ധതിയുടെ ലക്ഷ്യം. ഈ ബഹിരാകാശ യാത്രാ പദ്ധതിയുടെ ഭാഗമായി മറ്റൊരു വനിത ഉൾപ്പെടെ രണ്ട് ബഹിരാകാശ സഞ്ചാരികളെക്കൂടി പരിശീലിപ്പിക്കുന്നുണ്ട്. മറിയം ഫർദൂസ്, അലി അൽ-ഗാംഡി എന്നിവരെയാണ് പരിശീലിപ്പിക്കുന്നത്.
”മനുഷ്യരാശിയെ സേവിക്കുന്നതിനും ഇത്തരം സാധ്യതകളിൽ നിന്ന് പ്രയോജനം നേടുന്നതിനുമായി സൗദിയുടെ കഴിവുകൾ വികസിപ്പിക്കുകയാണ് ഈ പദ്ധതിയിലൂടെ ലക്ഷ്യമിടുന്നത്”, എന്ന് സൗദി പ്രസ് ഏജൻസി ഔദ്യോഗിക പ്രസ്താവനയിൽ അറിയിച്ചു.
സൗദിയിലെ കിരീടാവകാശി മുഹമ്മദ് ബിൻ സൽമാൻ സ്ത്രീകൾക്ക് സൗദിയിൽ ഒട്ടേറെ മേഖലകളിൽ പ്രാതിനിധ്യവും ഇളവുകളും നടപ്പിലാക്കിയിരുന്നു. ഈ മാറ്റത്തിൽ കണ്ണിചേരുകയാണ് റയ്യാന ബർണവി. റയ്യാനയിലൂടെ പുതുചരിത്രം രചിക്കാനുള്ള തയ്യാറെടുപ്പിലാണ് സൗദി.