Poornima Indrajith | അടിപൊളി! സാരിയിൽ ഓണസദ്യ വിളമ്പി പൂർണിമ ഇന്ദ്രജിത്ത്

നടിയെന്നതിലുപരി ഫാഷൻ ഡിസൈനിം​ഗ് രം​ഗത്തും തന്റെതായ രീതിയിൽ പ്രശസ്തി ആർജിച്ച താരമാണ് പൂർണിമ ഇന്ദ്രജിത്ത്. പൂർണിമയുടെ സംരഭമായ പ്രാണയുടെ ഓണം കളക്ഷനാണ് ഇപ്പോൾ ശ്രദ്ധേയമാകുന്നത്. വ്യത്യസ്തമായ രീതിയിലെ ഡിസൈൻ ചെയ്ത സാരിയാണ് പ്രാണ അവതരിപ്പിച്ചിരിക്കുന്നത്.

സാരിയിൽ ഓണത്തെ ഓർമിപ്പിക്കുന്ന എല്ലാം എംബ്രോയിഡറി ചെയ്തിട്ടുണ്ട്. ഓണ സദ്യ വിളമ്പിയ സാരി എന്നു ചുരുക്കത്തിൽ പറയാവുന്ന തരത്തിലാണ് പൂർണിമ‌യും സംഘവും സാരി തീർത്തിരിക്കുന്നത്. ഓലപ്പടക്കം മുതൽ പായസം വരെ സാരിയിലുണ്ട്.

സാരിയുടെ വിവിധ ഭാ​ഗങ്ങളിലായി പഴം, ഇല, ചിപ്സ്, സാമ്പാർ, ഓലൻ, കൂട്ടുകറി ഇവ കൂടാതെ, ഓണത്തപ്പൻ, അത്തപൂക്കളം, ഓലപ്പടക്കം തുടങ്ങി എല്ലാം സാരിയിൽ ഒരുക്കിയിട്ടുണ്ട്.

ഓണം സാരിയുടെ വീഡിയോ പങ്കുവച്ചുകൊണ്ട് പൂർണിമ ഒരു കുറിപ്പും പങ്കുവച്ചിട്ടുണ്ട്. 'തലയിൽ ഉദിച്ചതും സ്കെച്ചിം​ഗും ഒരുപാട് രസകരം! ആശയം മുതൽ സൃഷ്‌ടി വരെ, ഞങ്ങളുടെ ടീം പ്രവർത്തിക്കുന്നത് കാണൂ... ഓണത്തിൻ്റെ ബാല്യകാല സ്മരണകളിൽ നിന്ന് പ്രചോദനം ഉൾക്കൊണ്ടുള്ള ഞങ്ങളുടെ സർഗ്ഗാത്മക യാത്ര'- എന്നായിരുന്നു സാരിയിൽ എംബ്രോയിഡറി വർക്ക് ചെയ്യുന്ന വീഡിയോ പങ്കുവച്ചുകൊണ്ട് താരം കുറിച്ചത്.

വ്യത്യസ്തമായ ആശയം എന്നാണ് കൂടുതൽ പേരും വീഡിയോയ്ക്ക് താഴെ കമന്റ് ചെയ്തിരിക്കുന്നത്. ചിലർ അത്രയ്ക്ക് ഇഷ്ടപ്പെട്ടില്ലെന്നും അഭിപ്രായപ്പെട്ടിട്ടുണ്ട്.