'ലാലേട്ടൻ മമ്മൂക്കേന ഉമ്മ വെക്കണ സീൻ എങ്ങനെയെടുത്തു?' ജോഷിയോട് അൽഫോൺസ് പുത്രൻ

മമ്മൂട്ടിയും മോഹൻലാലും ഒന്നിച്ച് അഭിനയിച്ച സൂപ്പർഹിറ്റ് സിനിമ നമ്പർ 20 മദ്രാസ് മെയിൽ പുറത്തിറങ്ങിയിട്ട് ഇന്ന് 34 വർഷം. ജോഷി സംവിധാനം ചെയ്ത സിനിമയ്ക്ക് ഇന്നും പ്രേക്ഷക മനസ്സിൽ ഇടമുണ്ട്. ഈ സിനിമയിലെ പല രംഗങ്ങളും ഇന്നും നവമാധ്യമങ്ങളിലടക്കം പ്രേക്ഷകർ പങ്കുവെക്കാറുണ്ട്. (Image: M3DB)

സിനിമ റിലീസായി 34 വര്‍ഷം തികയുന്ന ദിനം, സംവിധായകൻ ജോഷിയുമായി മുൻപ് നടത്തിയ സംഭാഷണത്തിന്റെ പൂർണരൂപം സമൂഹ മാധ്യമങ്ങളിൽ പങ്കുവെച്ചിരിക്കുകയാണ് യുവ സംവിധായകൻ അൽഫോൺസ് പുത്രൻ.

'പ്രേമം' റിലീസ് ചെയ്തതിന് ശേഷം ഇരുവരും തമ്മിൽ നടത്തിയ സൗഹൃദസംഭാഷണത്തെക്കുറിച്ചാണ് പുത്രന്റെ പോസ്റ്റ്. ഇതിൽ 'നമ്പർ 20 മദ്രാസ് മെയിൽ' എന്ന ചിത്രത്തെക്കുറിച്ച് അൽഫോൺസ് ജോഷിയോട് ചോദിക്കുന്നുണ്ട്.

നമ്പർ 20 മദ്രാസ് മെയിലിലെ ഏറ്റവും മികച്ച സീനുകളിലൊന്നാണ് മോഹൻലാൽ മമ്മൂട്ടിയെ ഉമ്മ വെക്കുന്നത്. ഈ സീനിനെ കുറിച്ചാണ് അല്‍ഫോൺസ് പുത്രൻ ജോഷിയോട് ചോദിക്കുന്നത്.

'സർ എങ്ങനെ No 20 മദ്രാസ് മെയിലിൽ ലാലേട്ടൻ മമ്മൂക്കേന ഉമ്മ വെക്കണ സീൻ എടുത്തു ?'- എന്നായിരുന്നു അൽഫോൺസ് പുത്രന്റെ ചോദ്യം. മോഹൻലാൽ ഇട്ട ഇംപ്രൊവൈസേഷൻ താൻ അപ്പ്രൂവ് ചെയ്യുകയായിരുന്നുവെന്നാണ് ജോഷിയുടെ മറുപടി.

''ഞാൻ കൂടുതലും Spontaneous ആയിട്ട് വർക്ക് ചെയ്യുന്ന ആളാണ്. എനിക്ക് ലൊക്കേഷൻ വർക്ക് ആവണം, ഇല്ലെങ്കിൽ ആർട്ടിസ്റ്റിന്റെ പെർഫോമൻസ് എക്സൈറ്റ് ചെയ്യിക്കണം'- എന്നും ജോഷി പറഞ്ഞു.

പ്രേമം ഹൗസ് ഫുളായി ഓടിയനാളുകളിൽ, സിനിമയിലെ മൂന്ന് കാലഘട്ടം എങ്ങനെ ഷൂട്ട് ചെയ്തുവെന്നാണ് ജോഷി സാർ തന്നോട് ചോദിച്ചതെന്നും അതിന് നൽകിയ മറുപടിയും അൽഫോൺസ് പുത്രൻ ഫേസ്ബുക്കില്‍ കുറിച്ചിട്ടുണ്ട്.