36 വർഷം മുമ്പ് മോഹൻലാലിനെ ഹോട്ടലിൽ നിന്നും കൊണ്ടുവരാൻ സത്യൻ അന്തിക്കാട് ഏൽപിച്ചയാൾ ഇന്ന് മലയാളസിനിമയിലെ പ്രമുഖൻ

ഒടിയനും വാലിബനുമായി ഒക്കെയും മാറുന്നതിനും വളരെ മുൻപേ പ്രേക്ഷകർ ഒട്ടേറെ സ്നേഹിച്ച മോഹൻലാൽ കഥാപാത്രങ്ങൾ മലയാള സിനിമയിൽ ഉണ്ടായിട്ടുണ്ട്. ആ വേഷങ്ങളെ പ്രേക്ഷകരുടെ മുന്നിലെത്തിക്കാൻ കാരണമായ ചിത്രങ്ങളുടെ ശില്പികളിൽ ഒരാൾ സംവിധായകൻ സത്യൻ അന്തിക്കാടും. കഴിഞ്ഞ ദിവസം ഈ കോംബോ വീണ്ടും വെള്ളിത്തിരയിൽ വരുന്നു എന്ന വാർത്ത പുറത്തുവന്നിരുന്നു

'എന്നും എപ്പോഴും' എന്ന ചിത്രത്തിന് ശേഷമാണ് മോഹൻലാൽ, സത്യൻ അന്തിക്കാട് ടീം വീണ്ടും ഒന്നിക്കുന്നത്. മോഹൻലാൽ, മഞ്ജു വാര്യർ ജോഡികൾ നായികാ നായകന്മാരായ ചിത്രമാണിത്. ഒൻപതു വർഷങ്ങൾക്ക് ശേഷമാണ് അടുത്ത സിനിമയുടെ പ്രഖ്യാപനം (തുടർന്ന് വായിക്കുക)

ടി.പി. ബാലഗോപാലൻ എം.എ., ഗാന്ധിനഗർ സെക്കൻഡ് സ്ട്രീറ്റ്, സന്മനസുള്ളവർക്കു സമാധാനം, നാടോടിക്കാറ്റ്, പട്ടണപ്രവേശം, വരവേൽപ്പ്, രസതന്ത്രം, ഇന്നത്തെ ചിന്താവിഷയം പോലുള്ള പ്രശസ്തമായ ചിത്രങ്ങൾ മോഹൻലാൽ, സത്യൻ അന്തിക്കാട് കൂട്ടുകെട്ടിന്റേതാണ്. ഈ കോംബോ വീണ്ടും മലയാള സിനിമയിലേക്ക് വരുമ്പോൾ പഴയ മോഹൻലാലിനെ തിരികെ കിട്ടും എന്ന പ്രതീക്ഷ പ്രേക്ഷകർക്ക് നൽകുന്നു

സത്യൻ അന്തിക്കാട്, ശ്രീനിവാസൻ കൂട്ടുകെട്ടിന്റെ എക്കാലത്തെയും ബ്ലോക്ക്ബസ്റ്റർ ചിത്രങ്ങളിൽ ഒന്നായ പട്ടണപ്രവേശത്തിൽ നായകനായത് മോഹൻലാലാണ്. ഈ സിനിമയുടെ സെറ്റിൽ വച്ച് മോഹൻലാലിനെ ഹോട്ടലിൽ നിന്നും കൂട്ടിക്കൊണ്ടു വരാൻ സത്യൻ അന്തിക്കാട് ഏൽപ്പിച്ചയാൾ ഇന്ന് മലയാള സിനിമയിലെ പ്രമുഖനാണ്

അതിനും മുൻപ് 'സന്ദർഭം' എന്ന സിനിമയിൽ ഒരു ചെറിയ വേഷം ചെയ്ത നിലയിൽ അദ്ദേഹം സിനിമയിൽ തലകാണിച്ചിട്ടുണ്ട് എന്ന് മാത്രമേ അതുവരെ പറയാൻ സാധിച്ചിരുന്നുള്ളൂ. പിൽക്കാലത്ത് മോഹൻലാലിൻറെ വിശ്വസ്തനും, മലയാള സിനിമയിലെ എണ്ണംപറഞ്ഞ നിർമാതാക്കളിൽ ഒരാളുമായ ആന്റണി പെരുമ്പാവൂരായിരുന്നു അത്

ആന്റണിയുടെ സിനിമാ കരിയർ പരിശോധിച്ചാൽ, ഒരുപിടി മോഹൻലാൽ ചിത്രങ്ങളിൽ അദ്ദേഹം മിന്നിമായുന്ന വേഷങ്ങൾ കൈകാര്യം ചെയ്തിരുന്നു. കിലുക്കം, അങ്കിൾ ബൻ, അദ്വൈതം, കമലദളം, ഗാന്ധർവം, തേന്മാവിൻ കൊമ്പത്ത്, മിന്നാരം തുടങ്ങി നേര് വരെയുള്ള ചിത്രങ്ങളിൽ ആന്റണിയെ മലയാളി പ്രേക്ഷകർ കണ്ടുകഴിഞ്ഞു

'നരസിംഹം' എന്ന സിനിമയിലൂടെയാണ് ആന്റണി ആദ്യമായി നിർമാതാവിന്റെ വേഷം അണിയുന്നത്. ഒരുകോടിക്ക് മേൽ ചിലവിട്ടെടുത്ത ഈ ചിത്രം, ബോക്സ് ഓഫീസിൽ 20 കോടിക്ക് പുറത്തു ലാഭം നേടിയിരുന്നു. വരാനിരിക്കുന്ന മോഹൻലാൽ ചിത്രങ്ങളായ 'L2 എമ്പുരാൻ', 'ബറോസ്' എന്നിവയെല്ലാം ആശിർവാദ് സിനിമാസിന്റെ ബാനറിൽ ആന്റണിയാണ് നിർമ്മിച്ചത്

വരാനിരിക്കുന്ന സത്യൻ അന്തിക്കാട് ചിത്രവും ആന്റണിയാണ് നിർമിക്കുക. സത്യൻ അന്തിക്കാട് രചിക്കുന്ന ചിത്രം ജൂലൈ മാസത്തിൽ ആരംഭിക്കും