Covid 19 Lockdown | തമിഴ്നാട്ടിലും ലോക്ക്ഡൗൺ ഓഗസ്റ്റ് 31 വരെ നീട്ടി; കുറച്ച് ഇളവുകൾ അനുവദിച്ചു

ചെന്നൈ: മഹാരാഷ്ട്രയ്ക്ക് പിന്നാലെ തമിഴ്നാട്ടിലും ലോക്ക്ഡൗൺ ഓഗസ്റ്റ് 31 വരെ നീട്ടി. അതേസമയം ചില ഇളവുകൾ സർക്കാർ അനുവദിച്ചിട്ടുണ്ട്. അതേസമയം ഞായറാഴ്ചകളിലെ സമ്പൂർണ ലോക്ക്ഡൗണിന് ഇളവ് അനുവദിച്ചിട്ടില്ല.

നിലവിൽ പാർസലുകൾ നൽകാൻ മാത്രം അനുമതിയുള്ള റെസ്റ്റോറന്റുകളും ടീ ഷോപ്പുകളും ഇരുത്തി ഭക്ഷണം നൽകുമെന്നതാണ് മുഖ്യമന്ത്രി എടപ്പാടി പളനിസ്വാമിയുടെ പ്രഖ്യാപനത്തിലെ പ്രധാന ഇളവ്. അതേസമയം ആകെ ഇരിപ്പിടങ്ങളുടെ 50%ൽ കവിയരുതെന്ന വ്യവസ്ഥയുമുണ്ട്. പാർസൽ സേവനങ്ങളും ഇപ്പോൾ രാത്രി 9 വരെ അനുവദിച്ചിട്ടുണ്ട്.

ഓഗസ്റ്റ് ഒന്നു മുതൽ ഒരു മണിക്കൂർ കൂടുതൽ സമയം പലചരക്ക് കടകൾ തുറക്കാൻ കഴിയും. നിലവിൽ 50% തൊഴിലാളികളിൽ പ്രവർത്തിക്കുന്ന സ്വകാര്യ കമ്പനികൾക്കും കയറ്റുമതി യൂണിറ്റുകൾക്കും ഇത് 75% വരെ വർദ്ധിപ്പിക്കാനാകും. ചെന്നൈയിൽ ഓൺലൈൻ ഷോപ്പിങിൽ അവശ്യ സാധനങ്ങളുടെ ഡെലിവറി അനുവദിക്കും.

ഷോപ്പിംഗ് മാളുകൾ, ജിമ്മുകൾ, നീന്തൽക്കുളങ്ങൾ, വിദ്യാഭ്യാസ സ്ഥാപനങ്ങൾ എന്നിവ ഓഗസ്റ്റ് അവസാനം വരെ സംസ്ഥാനത്തുടനീളം അടഞ്ഞുകിടക്കും. പൊതുഗതാഗത നിരോധനം തമിഴ്‌നാട്ടിലുടനീളം തുടരും, ഈ കാലയളവിൽ അന്തർ സംസ്ഥാന യാത്രയ്ക്ക് ഇ-പാസ് നിർബന്ധമായിരിക്കും.

കോവിഡ് രോഗികളുടെ എണ്ണത്തിൽ ചെന്നൈയിൽ കുറവുണ്ടായതായും മറ്റ് ജില്ലകളിൽ കൂടുതൽ പനി ക്ലിനിക്കുകൾ ആരംഭിക്കുമെന്നും പളനിസ്വാമി പറഞ്ഞു.

തമിഴ്നാട്ടിൽ ഒരു ലക്ഷത്തിലധികം ആളുകൾ ഇതുവരെ രോഗമുക്തി നേടി. സംസ്ഥാനത്തെ മരണനിരക്ക് 1.6% ആണ്.