കാമുകിയെ കൊലപ്പെടുത്തി പത്താം നാൾ മുൻ കാമുകിയുമായി വിവാഹം: വിവാഹപ്പിറ്റേന്ന് യുവാവ് അറസ്റ്റിൽ

കണ്ണൂർ: കാമുകിയെ കൊലപ്പെടുത്തിയതിന്റെ പത്താം നാൾ ആദ്യ കാമുകിയെ വിവാഹം ചെയ്ത യുവാവ് വിവാഹപ്പിറ്റേന്ന് അറസ്റ്റിൽ. കോളയാട് പെരുവയിലെ പാലുമി വിപിൻ (24) ആണ് അറസ്റ്റിലായത്. കൊട്ടിയൂർ മന്ദംചേരി ആദിവാസി കോളനിയിലെ ശോഭ(34) കൊല്ലപ്പെട്ട കേസിലാണ് ഇയാളെ പൊലീസ് അറസ്റ്റ് ചെയ്തത്.

കഴിഞ്ഞ മാസം 28ന് നാണ് പുരളിമലയിൽ ശോഭയുടെ മൃതദേഹം തൂങ്ങിയ നിലയിൽ കണ്ടെത്തിയത്. വിവാഹിതയായിരുന്ന ശോഭ ഏറെക്കാലമായി ഭർത്താവുമായി വേർപിരിഞ്ഞു കഴിയുകയായിരുന്നു.

സമൂഹമാധ്യമത്തിലൂടെയാണ് വിപിനും ശോഭയും പരിചയപ്പെട്ടതെന്ന് പൊലീസ് പറഞ്ഞു. ശോഭയുമായി പ്രണയത്തിലാകും മുൻപ് കേളകം വെള്ളൂന്നി സ്വദേശിയായ പെൺകുട്ടിയുമായി വിപിൻ അടുപ്പത്തിലായിരുന്നു.

24ന് ശോഭയെ കൊലപ്പെടുത്തിയ ശേഷം 2ന് ആണ് വിപിൻ ആദ്യ കാമുകിയെ വിവാഹം ചെയ്തത്. 24ന് വീട്ടിൽ നിന്ന് ശോഭയെയും കൂട്ടി വിവിധ സ്ഥലങ്ങളിൽ കറങ്ങിയ ശേഷം പുരളിമലയിലെ ആളൊഴിഞ്ഞ പ്രദേശത്തെത്തിച്ചു

കഴുത്തിൽ ഷാൾ മുറുക്കി കൊലപ്പെടുത്തുകയായിരുന്നെന്നാണ് പൊലീസിന്റെ കണ്ടെത്തൽ. ശോഭയുടെ ആഭരണങ്ങൾ മോഷ്ടിച്ച ശേഷം മൃതദേഹം മരത്തിൽ കെട്ടിത്തൂക്കി.

കാൽ നിലത്തിഴയുന്ന വിധത്തിലായിരുന്നു മൃതദേഹം. സംശയത്തെ തുടർന്ന് നടത്തിയ അന്വേഷണത്തിലാണ് ശോഭയുടേത് ആത്മഹത്യയല്ല കൊലപാതകമാണെന്ന് കണ്ടെത്തിയത്.