ഭ്രമയുഗത്തിലെ മുഖമില്ലാത്ത രൂപം; ആരാണ് നടി അമല്‍ഡ ലിസ് ?

പുതുവര്‍ഷം പിറന്നതു മുതല്‍ മലയാള സിനിമ പ്രേക്ഷകരെ ആകാംക്ഷയുടെ മുള്‍മുനയില്‍ നിര്‍ത്തുകയാണ് മമ്മൂട്ടി ചിത്രം ഭ്രമയുഗത്തിന്‍റെ അണിയറ പ്രവര്‍ത്തകര്‍. കഴിഞ്ഞ ദിവസങ്ങളിലായി പുറത്തുവന്ന ചിത്രത്തിലെ ക്യാരക്ടര്‍ പോസ്റ്ററുകള്‍ പ്രേക്ഷക പ്രതീക്ഷ ഉയര്‍ത്തുന്നത്.

ഭയവും നിഗൂഢതയും ഇടകലര്‍ന്ന് ബ്ലാക്ക് ആന്‍ഡ് വൈറ്റ് ഷെയ്ഡിലുള്ള പോസ്റ്ററുകളാണ് പുറത്തുവന്നത്.

ആദ്യം മമ്മൂട്ടിയുടെയും പിന്നാലെ അര്‍ജുന്‍ അശോകന്‍റെയും സിദ്ധാര്‍ഥ് ഭരതന്‍റെയും കഥാപാത്രങ്ങളെ അവതരിപ്പിക്കുന്ന പോസ്റ്ററുകള്‍ പുറത്തുവന്നു

ചിത്രത്തിലെ പ്രധാന സ്ത്രീകഥാപാത്രമായെത്തുന്ന നടി അമല്‍ഡ ലിസിന്‍റെ ക്യാരക്ടര്‍ പോസ്റ്ററാണ് സിനിമ ഗ്രൂപ്പുകളില്‍ ഇപ്പോള്‍ ചര്‍ച്ചയാകുന്നത്.

നായകന്‍ മമ്മൂട്ടി പങ്കുവെച്ച പോസ്റ്ററില്‍ അര്‍ദ്ധ നഗ്നയായി അരയിൽ തിളങ്ങുന്ന ഒഢ്യാണവും കാലിൽ തളയും ഇട്ട് കയ്യിൽ വളയണിഞ്ഞും നിൽക്കുന്ന രൂപമാണ് കാണാന്‍ കഴിയുന്നത്.

മമ്മൂട്ടിക്കൊപ്പം അര്‍ജുന്‍ അശോകനും സിദ്ധാര്‍ത്ഥ് ഭരതനും പ്രധാന വേഷങ്ങളിലെത്തുന്ന ഭ്രമയുഗത്തില്‍ അത്രതന്നെ പ്രധാന്യമുള്ള കഥാപാത്രമായിരിക്കും ഇതും.

അമല്‍ഡ ലിസ് എന്ന പേര് കേട്ടിട്ട്  മനസിലാകത്തവര്‍ കമ്മട്ടിപ്പാടത്തിലെ ബാലന്‍ ചേട്ടന്‍റെ ഭാര്യ റോസമ്മയെ മറന്നുകാണില്ല.

ട്രാൻസ്, സി യു സൂൺ, ഒറ്റ്, സുലൈഖ മൻസിൽ തുടങ്ങിയ ചിത്രങ്ങളിലും വേഷമിട്ടു. മോഡലിങ് രംഗത്ത് സജീവമായ അമല്‍ഡ വയനാട് സ്വദേശിയാണ്.

2009 -ൽ മിസ് കേരള മത്സരത്തിൽ ഫൈനലിസ്റ്റായി. മിസ് ബ്യൂട്ടിഫുൾ ഹെയറായി തിരഞ്ഞെടുക്കപ്പെടുകയും ചെയ്തു.

എഞ്ചിനീയറിംഗ് ബിരുദം നേടിയതിനുശേഷം മോഡലിംഗ് തന്റെ പ്രൊഫഷനായി തിരഞ്ഞെടുത്ത താരം 2010 -ൽ സൗത്ത് ഇന്ത്യൻ മോഡൽ ഹണ്ടിൽ മിസ് കോൺഫിഡന്റ് ഹണ്ട് ആയി  തിരഞ്ഞെടുക്കപ്പെട്ടു.

ടെലിവിഷന്‍ ചാനലില്‍ അവതാരകയായി കുറച്ചുകാലം പ്രവർത്തിച്ചിട്ടുണ്ട്. പ്രശസ്ത ഫാഷൻ ഷോകളില്‍ ശ്രദ്ധേയായ മോഡല്‍ കൂടിയാണ് അമൽഡ.

ഭൂതകാലം ഫെയിം രാഹുല്‍ സദാശിവന്‍ സംവിധാനം ചെയ്യുന്ന ഭ്രമയുഗം, നൈറ്റ് ഷിഫ്റ്റ് സ്റ്റുഡിയോസ്, വൈ നോട്ട് സ്റ്റുഡിയോസ് എന്നിവയുടെ ബാനറിൽ  ചക്രവർത്തി രാമചന്ദ്രയും എസ്. ശശികാന്തും ചേര്‍ന്നാണ്  നിര്‍മ്മിക്കുന്നത്.

ഛായാഗ്രഹണം: ഷെഹനാദ് ജലാൽ, പ്രൊഡക്ഷൻ ഡിസൈനർ: ജോതിഷ് ശങ്കർ, എഡിറ്റർ: ഷഫീക്ക് മുഹമ്മദ് അലി, സംഗീതം: ക്രിസ്റ്റോ സേവ്യർ, സംഭാഷണങ്ങൾ: ടി ഡി രാമകൃഷ്ണൻ, മേക്കപ്പ്: റോനെക്സ് സേവ്യർ, കോസ്റ്റംസ് : മെൽവി ജെ.  മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിൽ ചിത്രം റിലീസ് ചെയ്യും.