Kamal Haasan: 'ഇനി ഉലകനായകൻ എന്ന് വിളിക്കരുത്'; കാരണം വ്യക്തമാക്കി കമൽഹാസൻ

ഇന്ത്യൻ സിനിമാരം​ഗത്തെ അഭിനയകുലപതിയാണ് നടൻ കമൽഹാസൻ. എല്ലാ തലമുറയിലുമുള്ള സിനിമാസ്വാദകർക്ക് ഒരുപോലെ ആരാധന തോന്നിയ നടൻ. 1960-ൽ കളത്തൂർ കണ്ണമ്മ എന്ന തമിഴ് ചിത്രത്തിലൂടെ ബാലതാരമായാണ് പാർത്ഥസാരഥി ശ്രീനിവാസൻ എന്ന കമൽഹാസൻ തൻ്റെ കരിയർ ആരംഭിച്ചത്.

പിന്നീട് നായക കഥാപാത്രങ്ങളിലൂടെയെത്തിയ കമൽ ഹാസൻ തന്റേതായ ഒരു യു​ഗം തന്നെ സിനിമാ ലോകത്ത് സൃഷ്ടിച്ചു. നടനായി മാത്രമല്ല ചലച്ചിത്ര സംവിധായകൻ , ചലച്ചിത്ര നിർമ്മാതാവ് , തിരക്കഥാകൃത്ത് , നൃത്തസംവിധായകൻ , പിന്നണി ഗായകൻ , ഗാനരചയിതാവ് എന്നീ മേഖലകളിലൂടേയും സിനിമാരം​ഗത്ത് അദ്ദേഹം തന്റെ വ്യക്തിമുദ്ര പതിപ്പിച്ചു.

അങ്ങനെ ആരാധകർ സ്നേഹസൂചകമായി ഉലകനായകൻ എന്ന വിശേഷണവും അദ്ദേഹത്തിന് സമ്മാനിച്ചു. കമൽഹാസൻ 10 കഥാപാത്രങ്ങളിലെത്തിയ ദശാവതാരം ചിത്രത്തിൽ ഉലകനായകനെ എന്ന ഒരു പാട്ട് പോലും ഉണ്ടായിരുന്നു. എന്നാൽ ഇപ്പോൾ തന്നെ അത്തരത്തിൽ വിശേഷിപ്പിക്കരുതെന്ന അഭ്യർത്ഥനയുമായി എത്തിയിരിക്കുകയാണ് നടൻ.

വ്യക്തിയെക്കാളും വലുതാണ് കലയെന്നും ഇനി മുതൽ ഉലകനായകനെന്ന വിശേഷണം ഒഴിവാക്കി തന്നെ പേര് മാത്രമേ വിളിക്കാവൂവെന്നുമാണ് കമൽഹാസൻ പറയുന്നത്. ഒന്നുകിൽ കമൽഹാസൻ എന്ന് വിളിക്കാം, അതല്ലെങ്കിൽ കമൽ, അതുമല്ലെങ്കിൽ കെ എച്ച് എന്നും വിളിക്കാമെന്ന് കമൽ നിർദ്ദേശിച്ചു.

സിനിമയെന്ന കലയേക്കൾ വലുതല്ല കലാകാരനെന്നാണ് താൻ വിശ്വസിക്കുന്നതെന്നും സിനിമയെ കുറിച്ച് പഠിക്കാനും അറിയാനും വളരാനും ആഗ്രഹിക്കുന്ന ഒരു വിദ്യാർത്ഥി മാത്രമാണ് താനെന്നും കമൽ പുറത്തിറക്കിയ കുറിപ്പിലൂടെ ആരാധകരോട് വ്യക്തമാക്കി.