Dil Bechara | റെക്കോഡുകൾ ഭേദിച്ച് സുശാന്ത് സിംഗ് രാജ്പുത് ചിത്രം; IMDb ടോപ്പ് റേറ്റഡ് ഇന്ത്യൻ ചിത്രമായി ദില്‍ ബേച്ചാര

 റെക്കോഡുകൾ ഭേദിച്ച് സുശാന്ത് സിംഗ് രാജ്പുത് ചിത്രം ദേൽ ബേച്ചാര.  അന്തരിച്ച ബോളിവുഡ് നടൻ സുശാന്ത് സിങ് രജ്പുത്ത് അവസാനമായി അഭിനയിച്ച ചിത്രം ദിൽ ബേച്ചാര കഴിഞ്ഞ ദിവസമാണ് OTT പ്ലാറ്റ്ഫോമിൽ റിലീസ് ചെയ്തത്. 

ഡിസ്നി പ്ലസ് ഹോട്സ്റ്റാറിൽ വൈകിട്ട് 7.30 നാണ് ചിത്രം റിലീസ് ചെയ്തത്. റിലീസ് ചെയ്ത് മണിക്കൂറുക്കൾക്കകം തന്നെ IMDb റേറ്റിംഗിൽ ഒന്നാം സ്ഥാനത്തെത്തിയിരിക്കുകയാണ് ചിത്രം.

റേറ്റിംഗ് പത്ത് വരെ പോയെങ്കിലും നിലവിൽ 21 വോട്ടുമായി 9.8 ആണ് ചിത്രത്തിന്‍റെ IMDb റേറ്റിംഗ്

ടോപ്പ് റേറ്റഡ് ഇന്ത്യൻ ചിത്രങ്ങളുടെ പട്ടികയിലും ആദ്യ സ്ഥാനത്ത് ഇടം നേടിയിരിക്കുകയാണ് ദിൽ ബേച്ചാര

ജോൺ ഗ്രീനിന്റെ നോവലായ ദി ഫോൾട്ട് ഇൻ അവർ സ്റ്റാർസ് എന്ന നോവലിനെ ആസ്പദമാക്കി ഇതേ പേരിൽ 2014 പുറത്തിറങ്ങിയ ഹോളിവുഡ് ചിത്രത്തിന്റെ റീമേക്കാണ് ദിൽ ബേച്ചാര.

സഞ്ജന സംഘിയാണ് ചിത്രത്തിലെ നായിക. എആർ റഹ്മാനാണ് ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്. ചിത്രത്തിലെ ഗാനങ്ങൾ ഇതിനകം സൂപ്പർ ഹിറ്റാണ്.

സുശാന്തിന്റെ നൃത്തച്ചുവടുകളുമായി എത്തിയ ചിത്രത്തിന്റെ ടൈറ്റിൽ ട്രാക്ക് ഒറ്റ ടേക്കിലാണ് പൂർത്തിയാക്കിയത്. ഫറാ ഖാനാണ് നൃത്തസംവിധാനം നിർവഹിച്ചത്.

സെയ്ഫ് അലി ഖാനും ചിത്രത്തിൽ അതിഥി വേഷത്തിൽ എത്തുന്നുണ്ട്.

നേരത്തേ മെയ് 18 ന് റിലീസ് തീരുമാനിച്ചിരുന്നെങ്കിലും കോവിഡ് ലോക്ക്ഡൗൺ കാരണം റിലീസ് മാറ്റിവെക്കുകയായിരുന്നു.

ജൂൺ 14 നാണ് സുശാന്തിനെ മുംബൈയിലെ വസതയിൽ തൂങ്ങി മരിച്ച നിലയിൽ കണ്ടെത്തിയത്.

താരത്തിന്റെ അവസാന ചിത്രത്തിനായുള്ള ആരാധകരുടെ കാത്തിരിപ്പ് അവസാനിപ്പിച്ചെത്തിയ ദിൽ ബേച്ചാര രണ്ട് കയ്യും നീട്ടിയാണ് പ്രേക്ഷകർ സ്വീകരിച്ചിരിക്കുന്നത്.  ഏറ്റവും കുറഞ്ഞ സമയത്തിനുള്ളിൽ കൂടുതൽ പേർ കണ്ട ട്രെയിലർ എന്ന റെക്കോർഡും സുശാന്തിന്റെ അവസാന ചിത്രത്തിനാണ്.