Sushant Singh Rajput Case | 'മാധ്യമ വിചാരണ അന്യായം' സുപ്രീം കോടതിയിൽ സത്യവാങ്ങ്മൂലം സമർപ്പിച്ച് റിയ ചക്രബർത്തി

തനിക്കെതിരെ നടക്കുന്ന മാധ്യമ വിചാരണക്കെതിരെ ബോളിവുഡ് താരം റിയാ ചക്രബർത്തി. സുശാന്ത് സിംഗ് രാജ്പുത് മരണവുമായി ബന്ധപ്പെട്ട് വിമർശനങ്ങൾക്ക് നടുവിൽ നിൽക്കുന്ന റിയ, തനിക്കെതിരെ നടക്കുന്ന മാധ്യമ വിചാരണ ചോദ്യം ചെയ്ത് സുപ്രീം കോടതിയെ സമീപിച്ചിരിക്കുകയാണ്.

തനിക്കെതിരെ നടക്കുന്ന മാധ്യമവിചാരണ അന്യായം ആണെന്നാണ് സുപ്രീം കോടതിയിൽ സമർപ്പിച്ച സത്യവാങ്മൂലത്തിൽ റിയ ആരോപിക്കുന്നത്.  അന്വേഷണം നടന്നു കൊണ്ടിരിക്കുന്ന ഒരു കേസിൽ, തന്നെ ഇപ്പോഴേ പ്രതിസ്ഥാനത്ത് നിർത്തിക്കൊണ്ടുള്ള മാധ്യമവിചാരണ അവസാനിപ്പിക്കണമെന്നാണ് റിയ ആവശ്യപ്പെട്ടിരിക്കുന്നത്.

സുശാന്ത് ്സിംഗിന്‍റെ മരണത്തിന് പിന്നാലെ പിതാവായ കെ.കെ.സിംഗാണ് റിയാ ചക്രബർത്തിക്കെതിരെ പരാതിയുമായി രംഗത്തെത്തിയത്. വിശ്വാസ വഞ്ചന, പണം തട്ടിപ്പ് തുടങ്ങി രൂക്ഷ ആരോപണങ്ങളാണ് റിയക്കെതിരെ അദ്ദേഹം ഉന്നയിച്ചത്. പരാതിയുടെ അടിസ്ഥാനത്തിൽ പൊലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചിരുന്നു. പിന്നീട് കേസ് സിബിഐക്ക് കൈമാറുകയും ചെയ്തു.

കള്ളപ്പണം വെളുപ്പിച്ചു എന്ന ആരോപണം ഉയർന്നതിനെ തുടർന്ന് എൻഫോഴ്സ്മെന്‍റ് ഡയറക്ട്രേറ്റും കേസിൽ അന്വേഷണം നടത്തുന്നുണ്ട്. ഇതുമായി ബന്ധപ്പെട്ട് രണ്ടു തവണയാണ് റിയയെയും സഹോദരനെയും ഇവർ ചോദ്യം ചെയ്തത്.

സുശാന്തുമായുള്ള ഇവരുടെ ബിസിനസ് ഇടപാടുകൾ കഴിഞ്ഞ കുറച്ച് മാസങ്ങള്‍ക്കിടെ നടന്ന സാമ്പത്തിക ഇടപാടുകൾ എന്നിവയാണ് പ്രധാനമായും അന്വേഷണ പരിധിയിലുള്ളത്.

കേസിൽ ആഗസ്റ്റ് ഏഴിനും പതിനൊന്നിനുമായി രണ്ട് ദിവസമാണ് ഇഡി റിയയെയും  സഹോദരൻ ഷൗവിക്കിനെയും മണിക്കുറുകളോളം ചോദ്യം ചെയ്തത്. ആദ്യ ചോദ്യം ചെയ്യലിൽ ലഭിച്ച മറുപടികൾ തൃപ്ഡികരമല്ലെന്ന് കാട്ടിയായിരുന്നു കഴിഞ്ഞ ദിവസം വീണ്ടും ചോദ്യം ചെയ്യൽ.

ഇതിനിടെയാണ് തന്നെ പ്രതിയായി ഉറപ്പിച്ചു കൊണ്ടുള്ള മാധ്യമവിചാരണ അവസാനിപ്പിക്കണമെന്നാവശ്യപ്പെട്ട് റിയ കോടതിയെ സമീപിച്ചിരിക്കുന്നത്.