മൂന്ന് കൂട്ടം പായസവും ഓണസദ്യയും കഴിച്ച് ദുബായ് കിരീടാവകാശി; ഒപ്പം മലയാളികൾക്ക് ഓണാശംസയും

ലോകത്ത് എവിടെ മലയാളിയുണ്ടോ അവിടെയൊക്കെ ഓണാഘോഷവുമുണ്ട്. ഗൾഫ് രാജ്യങ്ങളിലും കഴിഞ്ഞ ദിവസം മലയാളികൾ ഗംഭീരമായി തന്നെ ഓണം ആഘോഷിച്ചു. ദുബായിലെ റസ്റ്ററന്റുകൾക്ക് മുന്നിൽ ഇന്നലെ ഓണസദ്യ കഴിക്കാൻ മലയാളികളുടെ നീണ്ട നിരകളുമുണ്ടായിരുന്നു.

പൂക്കളവും ഓണസദ്യയുമാണ് ഓണാഘോഷത്തിന്റെ ഹൈലൈറ്റ്. വിദേശികളടക്കം മലയാളികളുടെ തനതായ ആഘോഷത്തിന്റെ ആരാധകരാണ്. മൂന്ന് കൂട്ടം പായസവും വാഴയിലയിൽ വിളമ്പിയ സദ്യയും കഴിച്ചാണ് ദുബായ് കിരീടാവകാശി ഷെയ്ഖ് ഹംദാൻ മുഹമ്മദ് ബിൻ റാഷിദ് അൽ മക്തൂം ഓണം ആഘോഷിച്ചത്.

ഇൻസ്റ്റഗ്രാമിൽ എല്ലാ വിശേഷങ്ങളും പങ്കുവെക്കാറുള്ള ദുബായ് കിരീടാവകാശി ഓണസദ്യയുടെ ചിത്രവും ഒപ്പം പ്രവാസികൾക്ക് ഓണാശംസ നേരാനും മറന്നില്ല. തനി മലയാളി ശൈലിയിൽ ചോറിനൊപ്പം നിരവധി കൂട്ടം കറികളും ചിപ്സും ശർക്കരവരട്ടിയും പപ്പടവുമെല്ലാം സദ്യയിൽ ഒരുക്കിയിട്ടുണ്ട്.

ദുബായ് എക്‌സിക്യൂട്ടീവ് കൗൺസിൽ ചെയർമാന്‍ കൂ‌ടിയാണ് ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം.

ദുബായിലെ മലയാളികളുടേയും ഇന്ത്യക്കാരുടേയും എല്ലാ ആഘോഷങ്ങൾക്കും ഷെയ്ഖ് ഹംദാൻ മുഹമ്മദ് ബിൻ റാഷിദ് അൽ മക്തൂമും യുഎഇ പ്രസി‍ഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനും ഒപ്പം നിൽക്കാറുണ്ട്.

യുകെയിലെ യോർക്ക് ഷയറിൽ അവധികാലം ആഘോഷിക്കുകയാണ് ഷെയ്ഖ് ഹംദാൻ.

അതേസമയം, ഗൾഫ് രാജ്യങ്ങളിൽ മലയളികൾ ഗംഭീരമായി ഓണം ആഘോഷിച്ചു. കുടുംബ കൂട്ടായ്മകളുടെ നേതൃത്വത്തിലുളള ആഘോഷങ്ങളാണ് യുഎഇയിൽ നടന്നത്.