ജനസേനാ നേതാവ് തിരുപ്പതിയിൽ രണ്ടുകോടിയുടെ വൈജയന്തിമാല കാണിക്കയർപ്പിച്ചു

മുൻ ടിടിഡി ചെയർമാൻ ഡികെ ആദികേശവുലു നായിഡുവിന്റെ മകൾ തേജസ്വിയും ചെറുമകൾ ചൈതന്യയും ചേർന്ന് തിരുപ്പതി തിരുമല ശ്രീ വെങ്കിടേശ്വര സ്വാമിക്ക് അപൂർവ സ്വർണാഭരണം സമ്മാനിച്ചു. പ്രത്യേകം തയാറാക്കിയ വൈജയന്തി മാലകൾ വ്യാഴാഴ്ചയാണ് സമർപ്പിച്ചത്.

ആകെ നാല് വൈജയന്തി മാലകളാണ് പ്രത്യേകം തയാറാക്കി സമർപ്പിച്ചത്. വ്യാഴാഴ്ച തിരുമലയിൽ ഉത്സവമൂർത്തിയായി ആരാധിക്കുന്ന ശ്രീദേവിക്കും ഭൂദേവിക്കും ഒപ്പമുള്ള ശ്രീ മലയപ്പ സ്വാമിയുടെ ആചാരപരമായ വിഗ്രഹങ്ങളിൽ ഇവ സമർപ്പിച്ചു.

'ഈ മാസം 14 വ്യാഴാഴ്ച, അഗാധമായ ഭക്ത്യാദരങ്ങളോടെ രണ്ടുകോടി രൂപ വിലമതിക്കുന്ന അമൂല്യമായ സ്വർണ, വജ്രാഭരണങ്ങൾ ഞങ്ങൾ സംഭാവനയായി നൽകി. ‌ഞങ്ങളുടെ കുടുംബം വളരെക്കാലമായി വെങ്കിടേശ്വര ഭഗവാന്റെ കടുത്ത ഭക്തരാണ്," ചൈതന്യ ട്വീറ്റ് ചെയ്തു.

നാല് മാലകളുടെ മൂല്യം ഏകദേശം 2 കോടി രൂപയാണ്. ദ്വാപരയുഗത്തിൽ ഭഗവാൻ കൃഷ്ണൻ അണിഞ്ഞുവെന്ന് വിശ്വസിക്കപ്പെടുന്ന അമൂല്യമായ മാലയാണിത്. തിരുമല ദേവസ്വത്തോട് ചോദിച്ച്, ആചാരപരമായ മൂർത്തിയായ മലയപ്പ സ്വാമിക്ക് വൈജയന്തി മാലയില്ലെന്ന് വ്യക്തമായ ശേഷമാണ് കുടുംബം ഈ ആഭരണങ്ങൾ സംഭാവന ചെയ്തത്. ശ്രീ പത്മാവതി അമ്മാവരിന് മറ്റൊരു മാലയും സമർപ്പിച്ചിട്ടുണ്ട്.

തിരുമലയിലെ വെങ്കിടേശ്വര സ്വാമി അലങ്കാരങ്ങളുടെ പ്രിയങ്കരനാണെന്നാണ് വിശ്വാസം. അതുകൊണ്ടാണ് എല്ലായ്‌പ്പോഴും വിവിധ പുഷ്പങ്ങളാൽ നിർമിച്ച മാലകളും വജ്രങ്ങൾ പതിച്ച സ്വർണാഭരണങ്ങളും കൊണ്ട് അലങ്കരിച്ചിരിക്കുന്നത്. അനേകം ആഭരണങ്ങൾ, മാലകൾ, കിരീടങ്ങൾ എന്നിവയാലാണ് അലങ്കാരം. ‌

മൂലമൂർത്തിക്കും മറ്റുള്ളവർക്കും തിഥിയും നക്ഷത്രവും അനുസരിച്ച് പ്രത്യേക അലങ്കാരങ്ങളുണ്ട്. ആ അലങ്കാരത്തെ അടിസ്ഥാനമാക്കിയാണ് ആഭരണങ്ങളും തിരഞ്ഞെടുക്കുന്നത്. രാജഭരണകാലം മുതൽ ഇന്നുവരെ നിരവധി ഭക്തർ പലതരം സ്വർണാഭരണങ്ങൾ കാണിക്കയായി സമർപ്പിച്ചിട്ടുണ്ട്.

ഡികെ ആദികേശവുലു നായിഡുവിന്റെ ചെറുമകൾ ചൈതന്യ ആന്ധ്രപ്രദേശ് പൊതുതിരഞ്ഞെടുപ്പ് സമയത്താ‌ണ് ജന സേനയിൽ ചേർന്നത്. ‌തിരഞ്ഞെടുപ്പിൽ സ്ഥാനാര്‍ത്ഥികളുടെ സാധ്യതാ പട്ടികയിലും ഇടംനേടിയിരുന്നു. എന്നാൽ അവസാന നിമിഷം സീറ്റ് ലഭിച്ചില്ല. തിരഞ്ഞെടുപ്പിൽ മുന്നണി സ്ഥാനാർത്ഥികളുടെ വിജയത്തിനായി അവർ സജീവമായി പ്രചാരണ രംഗത്തുണ്ടായിരുന്നു.