പുതിയ പാപ്പാനുമായി മെരുങ്ങാൻ കൊമ്പന് ക്രൂരപീഡനം; ഗുരുവായൂർ ദേവസ്വത്തിന്റെ ആനക്കോട്ടക്കെതിരെ പരാതി

ഗുരുവായൂർ ദേവസ്വത്തിന്റെ ആനക്കോട്ടയിൽ കൊമ്പന് പീഡനം. പൊരിവെയിലത്ത് ചെളിയിൽ കയറും മുള്ളു ചങ്ങലയുമിട്ടാണ് കൊമ്പൻ സിദ്ധാർത്ഥനെ തളച്ചിരിക്കുന്നത്. പുറമേക്ക് കാണാതിരിക്കാൻ മുറിവിൽ മണ്ണ് പൊത്തിയിട്ടുണ്ട്.

പുതിയ പാപ്പാനുമായി ആന മെരുങ്ങാത്തതിനാലാണ് പീഡനമെന്നും വനവകുപ്പിനു പരാതി നൽകിയിട്ടും നടപടിയുണ്ടായില്ലെന്നും ഹെറിറ്റേജ് അനിമൽ ടാസ്ക് ഫോഴ്സ് ആരോപിച്ചു.

ഗുരുവായൂർ ദേവസ്വത്തിന്റെ ആനക്കോട്ടയിൽ കൊമ്പൻ സിദ്ധാർത്ഥൻ നിൽക്കുന്ന ദൃശ്യങ്ങൾ ഞെട്ടിക്കുന്നതാണ്.

നാട്ടാന പരിപാലന ചട്ടങ്ങളെല്ലാം കാറ്റിൽ പറത്തി രണ്ടാഴ്ചയായി സിദ്ധാർത്ഥനെ മെരുക്കാൻ കൊടിയ പീഢനമാണ് നടത്തുന്നത്. പീഢനത്തിന്റെ ബാക്കിയായി ആനയുടെ ശരീരത്തിൽ നിറയെ മുറിവുകളുണ്ട്.

ആനക്കോട്ടയിൽ എത്തുന്നവർ കാണാതിരിക്കാൻ മുറിവുകളിൽ മണ്ണ് പൊത്തിയിട്ടുണ്ട്.

പീഢനം സഹിക്കാനാവാതെ കൊമ്പ് ഉപയോഗിച്ച് മണ്ണ് മാന്തിയതോടെ ആനയുടെ മുൻകാലുകൾ കുഴിയിലായി.

22 വർഷമായി തുടരുന്ന പാപ്പാനെ മാറ്റി പുതിയ പാപ്പാനുമായി ആനയെ മെരുക്കിയെടുക്കാനാണ് പീഢനമെന്ന് അനിമൽ ടാസ്ക് ഫോഴ്സ് ആരോപിക്കുന്നു.

വനം വകുപ്പിന് പരാതി നൽകിയിട്ടും ഇതുവരെ നടപടി ഉണ്ടായിട്ടില്ല. എന്നാൽ ആനയ്ക്ക് പീഡനമേറ്റിട്ടില്ലെന്നും പരാതി ലഭിച്ചിട്ടില്ലെന്നും ഗുരുവായൂർ ദേവസ്വം ബോർഡ് ചെയർമാൻ കെ.ബി മോഹൻദാസ് പ്രതികരിച്ചു.