പൂച്ച കുറുകെ ചാടി ; സഡൻ ബ്രേക്കിട്ട ലോറിക്ക് പിന്നിൽ ബൈക്കിടിച്ച് അച്ഛനും മകനും മരിച്ചു

ആലപ്പുഴ: ലോറിക്ക് പിന്നിൽ ബൈക്കിടിച്ച് അച്ഛനും മകനും മരിച്ചു. കളപ്പുരയിലാണ് നാടിനെ കണ്ണീരിലാഴ്ത്തിയ വാഹനാപകടമുണ്ടായത്. ബൈക്ക് യാത്രികരായ വാടക്കൽ സ്വദേശി ബാബു മകൻ അജിത് എന്നിവരാണ് മരിച്ചത് .

ആലപ്പുഴയിൽ നിന്ന് എറണാകുളത്തേക്ക് പോകുകയായിരുന്ന ലോറി പൂച്ച കുറുകെ ചാടിയതിനെ തുടർന്ന് അപ്രതീക്ഷിതമായി ബ്രേക്ക് ചവിട്ടുകയായിരുന്നു . തുടർന്ന് ലോറിക്ക് പിന്നിൽ ബൈക്ക് ഇടിക്കുകയായിരുന്നു. ഇടിച്ച ബൈക്കിനു പിന്നിലായി വിവാഹ പാർട്ടി സഞ്ചരിച്ച മിനി ബസും വന്നിടിച്ചതോടെ അച്ഛനും മകനും തൽക്ഷണം മരിച്ചു .

അപകടത്തിന്റെ ആഘാതത്തിൽ ബൈക്ക് ലോറിക്കടിയിലേക്ക് ഇടിച്ചുകയറിയ അവസ്ഥയിൽ ആയിരുന്നു . രക്ഷാപ്രവർത്തകർ ഇരുവരെയും ആലപ്പുഴ ജനറൽ ആശുപത്രിയിൽ എത്തിച്ചെങ്കിലും ഫലമുണ്ടായില്ല .

ആദ്യം ബാബുവിനെ ആണ് ആശുപത്രിയിൽ എത്തിച്ചത്. മകൻ അജിത്തിനെ എത്തിക്കുമെന്ന് അറിയിച്ചിരുന്നെങ്കിലും ആശുപത്രിയിൽ വേണ്ടത്ര സംവിധാനങ്ങൾ ഒരുക്കിയിരുന്നില്ല എന്ന പരാതി ആശുപത്രി അധികൃതരുമായുള്ള തർക്കത്തിൽ എത്തിയിരുന്നു .

ഗുരുതര പരിക്കേറ്റ വ്യക്തിയെ സ്‌ട്രെച്ചർ പോലുമില്ലാതെ കൈയിൽ എടുത്തുകൊണ്ടാണ് അത്യാഹിത വിഭാഗത്തിലേക്ക് എത്തിച്ചതെന്നാണ് പരാതി . മരിച്ച അജിത്തിന്റെ വിവാഹം ഏപ്രിലിൽ നടക്കാനിരിക്കെ ആണ് അപകടം. ബാബുവും അജിത്തും കുത്തിയതോടുള്ള കുടുംബക്ഷേത്രത്തിൽ പോകുകയായിരുന്നു.