പൊന്നാനി ബിയ്യം കായൽ ജലോത്സവം; ഉൾക്കായൽ മൊഞ്ചും ആവേശവും അടുത്തറിയാം

കേരളത്തിലെ മലപ്പുറം ജില്ലയിലെ പൊന്നാനിയിലാണ് വിനോദസഞ്ചാരികളുടെ പ്രധാന ആകർഷണകേന്ദ്രമായ പ്രകൃതിരമണീയമായ ബിയ്യം കായൽ. സമൃദ്ധമായ പച്ചപ്പും, കായലും, പക്ഷിമൃഗാദികളും കൊണ്ട് ചുറ്റപ്പെട്ട ഈ ശാന്തമായ തീരം, ദൈനംദിന ജീവിതത്തിൻ്റെ തിരക്കുകളിൽ നിന്ന് സമാധാനപരമായ സായാഹ്നങ്ങൾ പ്രദാനം ചെയ്യുന്നു.

മാറഞ്ചേരിയെയും പൊന്നാനി നഗരസഭയെയും ബന്ധിപ്പിക്കുന്ന ബിയ്യം കായലിന് കുറുകെയുള്ള തൂക്കുപാലം, ബോട്ടിങ് സൗകര്യം ഇവയെല്ലാം ഇവിടുത്തെ ടൂറിസ്റ്റ് കേന്ദ്രത്തിൽ ഒരുക്കിയിട്ടുണ്ട്. വലിയൊരു വിനോദസഞ്ചാര സമുച്ചയത്തിൻ്റെ നിർമ്മാണവും അടുത്തിടെ പൂർത്തീകരിച്ചു.

സാഹസികത ഇഷ്ടപ്പെടുന്നവരെ ബിയ്യം കായൽ നിരാശപ്പെടുത്തില്ല. പൊന്നാനി ബിയ്യം റെഗുലേറ്റർ കം ബ്രിഡ്ജ് മലബാർ മേഖലയിലെ ഒരു വാട്ടർ സ്പോർട്സ് കേന്ദ്രമാണ്. കുട്ടികളുടെ പാർക്ക്, ആംഫി തിയറ്റർ, ബോട്ടുജെട്ടി, നടപ്പാത, ഫിഷിങ് ഡെക്ക്, വാച്ച് ടവർ, എന്നീ പുതിയ പദ്ധതികളും ബ്രിഡ്ജിനോടനുബന്ധിച്ച് ആവിഷ്കരിച്ചിട്ടുണ്ട്.

എല്ലാ വർഷവും ഓണാഘോഷത്തോടനുബന്ധിച്ച് ഇവിടെ നടക്കുന്ന വള്ളംകളി മത്സരം ശ്രദ്ധേയമാണ്. മലബാറിലെ ഏറ്റവും പ്രശസ്തമായ ബിയ്യം കായൽ ജലോത്സവത്തിന് മലപ്പുറം ,പാലക്കാട് ,തൃശൂർ ജില്ലകളിൽനിന്നായി ആയിരക്കണക്കിനാളുകളാണ് കായലിന്റെ ഇരുകരകളിലുമായി തടിച്ചുകൂടാറുളളത്.

ബിയ്യം കായലിലെ വള്ളംകളി മലബാർ മേഖലയിൽ നിന്നുള്ള ആയിരക്കണക്കിന് ആളുകളെ ആകർഷിക്കുന്ന ഒരു ഗംഭീര ആഘോഷമാണ്. വനിതകളുടെ പ്രത്യേക വിഭാഗം മത്സരങ്ങളും നടക്കാറുണ്ട്. മത്സരത്തിനു മുന്നോടിയായി വർണ്ണാഭമായ സാംസ്കാരിക ഘോഷയാത്രകൾ നടക്കും.

സ്പീഡ് ബോട്ടുകളും വാട്ടർ സ്കൂട്ടർ റൈഡുകളും പോലെ നിരവധി സാഹസിക ജല കായിക വിനോദങ്ങൾക്കുള്ള സൗകര്യങ്ങൾ പ്രാദേശിക കൗൺസിലുകൾ ഇവിടെ സജ്ജീകരിച്ചിട്ടുണ്ട്. ഇവ കൂടാതെ കായലിൻ്റെ തീരത്ത് ഒട്ടനവധി വിശ്രമകേന്ദ്രങ്ങളും ഉണ്ട്. ഉൾനാടൻ കായൽ തടാകങ്ങളാൽ നിറഞ്ഞ മലപ്പുറത്തെ ഏറ്റവും പ്രശസ്തമായ ഒന്നാണ് ബിയ്യം കായൽ. മലപ്പുറം ജില്ലയിലെ പൊന്നാനിയോട് ചേർന്ന് സ്ഥിതി ചെയ്യുന്ന ഈ പ്രദേശം ഈയിടെ ഒരു സാഹസിക മേഖലയായി നവീകരിച്ചു.