അക്ഷരപ്രേമികളെ വരവേറ്റ് കനകക്കുന്നിൽ ‘ക’ ഫെസ്റ്റ്

നിയമസഭ അന്താരാഷ്ട്ര പുസ്തകോൽസവത്തിനും കേരള ലിറ്ററേച്ചർ ഫെസ്റ്റിനും പിന്നാലെ അക്ഷരങ്ങളുടെ കൂട്ടുകാർക്ക് ഒത്തൊരുമിക്കാൻ വീണ്ടുമൊരു വേദി. ഫെബ്രുവരി 6 മുതൽ 9 വരെ കനകക്കുന്നിൽ നടന്ന മാതൃഭൂമി ഇൻ്റർനാഷണൽ ഫെസ്റ്റിവൽ ‘ക’ അതിൻ്റെ കെട്ടിലും മട്ടിലും വൈവിധ്യം പുലർത്തി. പലയിടങ്ങളിൽ പല സമയങ്ങളിൽ വൈവിധ്യമാർന്ന പരിപാടികൾ. Mathrubhumi hall, bamboo grove, the bard room, tree of life, house of books, under the tree, hall of letters, alphaverse, festival hall, ka corner എന്നിങ്ങനെ ഓരോ വേദിക്കും ഓരോ പേരിട്ടിട്ടുണ്ട്.

നാട്ടുവഴിയിൽ നടക്കുന്ന നോവൽ എന്ന ടോപ്പിക്കിൽ അംബികാസുതൻ മാങ്ങാട്, PF മാത്യൂസ്, രാജീവ് ശിവശങ്കർ എന്നിവർ പങ്കെടുത്ത ചർച്ചയിൽ Dr. S നസീബ് മോഡറേറ്റർ ആയിരുന്നു. അംബികാസുതൻ മാങ്ങാടിൻ്റെ തോട്ടിൻകര പോതി എന്ന പുസ്തകത്തിൻ്റെ പ്രകാശനവും നടന്നു.

ആ കഥാപാത്രവും ഞാനും എന്ന വിഷയത്തിൽ TD രാമകൃഷ്ണൻ, സുഭാഷ് ചന്ദ്രൻ, ബെന്യാമിൻ എന്നിവർ പങ്കെടുത്ത ചർച്ച വളരെ രസകരമായിരുന്നു. തങ്ങളുടെ കൃതികളിലെ കഥാപാത്രങ്ങൾ എത്രകണ്ട് തങ്ങളുടെ ജീവിതവുമായി ബന്ധപ്പെട്ടിരിക്കുന്നു എന്ന് ഓരോരുത്തരും പറഞ്ഞു. കഥാപാത്രത്തിൻ്റെ പരകായ പ്രവേശത്തെ പറ്റിയോക്കെ അവർ സംസാരിച്ചു. ചർച്ച നയിച്ചത് പ്രവീൺ ചന്ദ്രനായിരുന്നു. തങ്ങളുടെ പുസ്തകങ്ങൾ വാങ്ങിക്കൊണ്ട് വന്നവർക്ക് കൈയൊപ്പ് നൽകാനും ആരാധകരുമായി സംസാരിക്കാനുമൊക്കെ ഈ എഴുത്തുകാർ സമയം കണ്ടെത്തി.

Under the tree എന്ന വേദിയിൽ TA-DA!DATA എ.ഐ. ആൻ്റ് ജെനറേറ്റിവ് ഫ്യൂച്ചർ ഓഫ് ക്രിയേറ്റിവിറ്റി എന്ന ടോപ്പിക്കിൽ അരുൺ നൂറ, അനുദേവ് മനോഹരൻ എന്നിവർ നിർമ്മിത ബുദ്ധിയുടെ ഗുണത്തെ പറ്റിയും ഇനി അത് സമൂഹത്തിൽ വരുത്താൻ പോകുന്ന മാറ്റങ്ങളെ പറ്റിയും തങ്ങളുടെ അറിവ് പങ്ക് വച്ചു. ആഷിക് അഹമ്മദ് മോഡറേറ്ററായിരുന്നു.

ഫെസ്റ്റിവൽ ഹാളിൽ നടന്ന മോഹമുക്തമാണോ രാഷ്ട്രീയം എന്ന വിഷയത്തിൽ വിനീത പി ഹരിഹരൻ, കെ എസ് ശബരിനാഥ്, സി എസ് സുജാത എന്നിവർ നടത്തിയ ചർച്ച മോത്തി രാജേഷ് മോഡറേറ്റ് ചെയ്തു.