'23-ാം വയസില്‍ ഞാന്‍ ഒരു വല്യേച്ചി ആകുന്നു'; അമ്മയുടെ നിറവയറില്‍ ചേര്‍ത്തുപിടിച്ച് നടി ആര്യാ പാര്‍വ്വതി

ഇരുപത്തിമൂന്നാം വയസില്‍ ചേച്ചിയാകാന്‍ ഒരുങ്ങുന്നുവെന്ന് നടിയും നര്‍ത്തകിയുമായ ആര്യാ പാര്‍വ്വതി. അമ്മ ദീപ്തി ശങ്കര്‍ ഗര്‍ഭിണിയാണെന്നും ഉടന്‍ തന്നെ താനൊരു അമ്മയുടെയും വല്യേച്ചിയുടെയും റോള്‍ ഏറ്റെടുക്കാന്‍ തയ്യാറെടുക്കുകയാണെന്നും ആര്യ ഇന്‍സ്റ്റഗ്രാമില്‍ കുറിച്ചു.  അമ്മയുടെ നിറവയറില്‍ മുഖം ചേര്‍ത്ത് പിടിക്കുന്ന ചിത്രത്തൊടപ്പമാണ് ആര്യ കുടുംബത്തിലേക്ക് പുതിയ അതിഥിയെത്തുന്ന വിവരം ആരാധകരെ അറിയിച്ചത്. 

'23 വര്‍ഷത്തിന് ശേഷം എനിക്കൊരു സഹോദരിയോ സഹോദരനോ വരുന്നതിന്റെ സന്തോഷത്തിലാണ് ഞാന്‍. ഒരു അമ്മയുടേയും വല്ല്യേച്ചിയുടേയും റോള്‍ ഏറ്റെടുക്കാന്‍ തയ്യാറായിക്കഴിഞ്ഞു. വേഗം വരൂ, എന്റെ കുഞ്ഞുവാവേ...'ആര്യ കുറിച്ചു

ആര്യയുടെ പോസ്റ്റിന് താഴെ അമ്മയ്ക്കും മകള്‍ക്കും ആശംസ അറിയിച്ച്  സെലിബ്രിറ്റികളടക്കം നിരവധി പേരെത്തി. ഇന്ന് കണ്ട ഏറ്റവും മനോഹരമായ പോസ്റ്റ് ഇതാണെന്നും രണ്ട് പേര്‍ക്കും എല്ലാവിധ അനുഗ്രഹങ്ങളും നേരുന്നുവെന്നും ആരാധകര്‍ പ്രതികരിച്ചു.

നിങ്ങളുടെ കുടുംബത്തെ ഓര്‍ത്ത് സന്തോഷവും അഭിമാനവും തോന്നുന്നു എന്നായിരുന്നു ഒരു കമന്റ്.

ഇന്‍സ്റ്റഗ്രാമില്‍ ഏറെ ആരാധകരുള്ള നടിയും നര്‍ത്തകിയുമാണ് ആര്യാ പാര്‍വ്വതി. ചെമ്പട്ട്, ഇളയവള്‍ ഗായത്രി എന്നീ സീരിയലുകളിലൂടെ ശ്രദ്ധ നേടി.

സംസ്ഥാന സ്‌കൂള്‍ കലോത്സവത്തില്‍ മോഹിനിയാട്ടത്തില്‍ ഒന്നാം സ്ഥാനത്ത് എത്തിയ ആര്യ പിന്നീട് നൃത്തത്തിന്റെ വഴി തിരഞ്ഞെടുക്കുകയായിരുന്നു. കാലടി ശ്രീശങ്കരാചാര്യ സര്‍വകലാശാലയില്‍ നിന്ന് മോഹിനിയാട്ടത്തില്‍ ബിരുദം നേടിയിട്ടുണ്ട്.