Gold Price Today: 11 ദിവസത്തിന് ശേഷം സ്വർണ വില കുറഞ്ഞു; ഇന്നത്തെ നിരക്കുകൾ അറിയാം

തിരുവനന്തപുരം: പതിനൊന്ന് ദിവസത്തിനുശേഷം സംസ്ഥാനത്ത് സ്വർണവിലയിൽ ഇടിവ്. പവന് 240 രൂപ കുറഞ്ഞ് 44,080 രൂപയിലാണ് സ്വർണ വില. ​ഗ്രാമിന് 30 രൂപ കുറഞ്ഞ് 5510 രൂപയിലെത്തി. കഴിഞ്ഞ വാരം ആ​ഗോള വിപണിയിൽ സ്വർണ വില മികച്ച നേട്ടമുണ്ടാക്കിയിരുന്നു. ഈ ഉയരത്തിൽ നിന്നുള്ള നേരിയ ഇടിവാണ് തിങ്കളാഴ്ച ഉണ്ടായത്.

ഇസ്രായേൽ - ഹമാസ് സംഘർഷം ശക്തമാകുന്നതിനിടെ സുരക്ഷിത നിക്ഷേപമായ സ്വർണത്തിന് ആ​ഗോള വിപണിയിൽ ആവശ്യക്കാരേറിയതോടെയാണ് സ്വർണ വില ഉയരാൻ തുടങ്ങിയത്. വെള്ളിയാഴ്ച ആ​ഗോള വിപണിയിൽ സ്പോട്ട് ​ഗോൾഡ് ഔൺസിന് 3 ശതമാനത്തിലധികം വർധിച്ച് 1934.82 ഡോളറിലേക്ക് എത്തിയിരുന്നു. കേരളത്തിൽ 1,120 രൂപയുടെ മുന്നേറ്റമാണ് അന്നേ ദിവസം ഉണ്ടായത്.

ഒക്ടോബർ 5ന് മാസത്തിലെ താഴ്ന്ന നിരക്കായ 41,920 രൂപയിലേക്ക് സ്വർണവില എത്തിയിരുന്നു. ഇതിന് ശേഷം ഒക്ടോബര്‍ 6ന് 80 രൂപയാണ് വര്‍ധിച്ചാണ് സ്വർണ വില തുടങ്ങിയത്. അതേസമയം കഴിഞ്ഞ ആഴ്ച 1,800 രൂപയാണ് സ്വര്‍ണ വിലയില്‍ വര്‍ധനവുണ്ടായത്.

8ാം തീയതി 42,520 രൂപയിലേക്ക് എത്തിയ സ്വര്‍ണ വില ഒക്ടോബര്‍ 14 നാണ് 44,320 രൂപയിലേക്ക് എത്തിയത്. 1,120 രൂപയാണ് ശനിയാഴ്ച സ്വര്‍ണ വിലയില്‍ വര്‍ധിച്ചത്. മാസത്തിലെ ഉയര്‍ന്ന നിലവാരമാണിത്. ഇവിടെ നിന്നാണ് സ്വർണ വിലയിൽ നേരിയ പിന്മാറ്റം ഉണ്ടായത്. മേയ് അ‍ഞ്ചിന് രേഖപ്പെടുത്തിയ പവന് 45,760 രൂപയാണ് സർവകാല റെക്കോർഡ്. ഇത് ഭേദിക്കുമോ എന്നാണ് ഇനി അറിയേണ്ടത്.

കഴിഞ്ഞ ആഴ്ചയിലെ അവസാന വ്യാപാര ദിവസം 3 ശതമാനത്തിലധികമാണ് സ്വർണവില വർധിച്ചത്. ഒരു മാസത്തെ ഏറ്റവും ഉയർന്ന നിരക്കിലെത്തിയതിന് ശേഷം തിങ്കളാഴ്ച സ്വർണ വില ആ​ഗോള വിപണിയിലും ഇടിഞ്ഞു. സ്‌പോട്ട് ഗോൾഡ് ഔൺസിന് 0.5 ശതമാനം ഇടിഞ്ഞ് 1,921.69 ഡോളറിലെത്തി.