'ഫിറ്റ് കണ്ണൂര്‍'; വ്യായാമ ശീലത്തിൽ പുത്തൻ ചുവടുവെപ്പുമായി കണ്ണൂർ

കണ്ണൂർ: വ്യായാമ ശീലത്തിൽ ഒരു പുത്തൻ ചുവടുവെപ്പുമായി കണ്ണൂർ ജില്ല. കണ്ണൂരുകാരുടെ കായികാരോഗ്യം ലക്ഷ്യമിട്ട് ജില്ലാ ഭരണകൂടം ആരംഭിക്കുന്ന ഫിറ്റ് കണ്ണൂര്‍ പദ്ധതിക്ക് തുടക്കമായി. ആദ്യ ദിവസം തന്നെ വൻ ജനപങ്കാളിത്തം കൊണ്ട് പദ്ധതി ശ്രദ്ധേയമായി. കണ്ണൂരുകാർക്കൊപ്പം വ്യായാമം ചെയ്യാൻ ജില്ലാ കലക്ടർ ടി വി സുഭാഷും മറ്റ് പ്രമുഖരും എത്തി.

'വ്യായാമത്തിലൂടെ ആരോഗ്യം' എന്ന മുദ്രാവാക്യവുമായാണ് പദ്ധതി. കണ്ണൂരിലെ ജനങ്ങൾ രാവിലെ കൂട്ടായി വ്യായാമം ചെയ്യുക എന്നതാണ് പദ്ധതിയുടെ ലക്ഷ്യം. എല്ലാ പ്രായവിഭാഗത്തിൽപ്പെട്ടവർക്കും പദ്ധതിയിൽ പങ്കാളികളാകാം.

വ്യായാമം ചെയ്യാനുള്ള ഉപദേശങ്ങൾ നൽകുന്നതിനായി പ്രത്യേകം പരിശീലകരും ഉണ്ട് . ആദ്യപടി എന്ന നിലയിൽ കണ്ണൂർ കലക്ടറേറ്റ് മൈതാനിയിൽ ആണ് കൂട്ടായ വ്യായാമ പദ്ധതി തുടങ്ങിയിട്ടുള്ളത്. വൈകാതെ ഇത് ജില്ലയിലെ മറ്റ് ഗ്രൗണ്ടിലേക്കും വ്യാപിപ്പിക്കും.

കായിക താരങ്ങള്‍, വിദ്യാര്‍ഥികള്‍, യുവാക്കള്‍, ജീവനക്കാര്‍, മുതിര്‍ പൗരന്‍മാര്‍, റസിഡന്‍സ് അസോസിയേഷന്‍, വോക്കേഴ്‌സ് ക്ലബ്ബ് പ്രതിനിധികള്‍ തുടങ്ങി ആയിരത്തോളം പേര്‍ ഉദ്ഘാടന പരിപാടിയില്‍ അണിനിരന്നു.

ജില്ലാ സ്‌പോര്‍ട്‌സ് കൗണ്‍സില്‍, ജില്ലാ ടൂറിസം പ്രമോഷന്‍ കൗണ്‍സില്‍, ജില്ലാ പൊലീസ് എന്നിവയുടെ സഹകരണത്തോടെയാണ് പരിപാടി നടപ്പിലാക്കുന്നത്.