Mithali Raj | 'സബാഷ് മിതാലി'; വനിതാ ലോകകപ്പിൽ ചരിത്രമെഴുതി ഇന്ത്യൻ വനിതാ ക്യാപ്റ്റൻ; സ്വന്തമായത് അപൂർവ റെക്കോർഡ്

വനിതാ ഏകദിന ലോകകപ്പില്‍ (ICC Women's World Cup 2022) ചരിത്രം കുറിച്ച് ഇന്ത്യന്‍ ക്യാപ്റ്റന്‍ മിതാലി രാജ് (Mithali Raj). ലോകകപ്പില്‍ ഏറ്റവും കൂടുതല്‍ മത്സരങ്ങളില്‍ ക്യാപ്റ്റനാകുന്ന വനിതാ താരമെന്ന നേട്ടമാണ് മിതാലി സ്വന്തം പേരിലാക്കിയത്. 

ന്യൂസിലൻഡിൽ നടക്കുന്ന ലോകകപ്പിൽ വെസ്റ്റ് ഇന്‍ഡീസിനെതിരായ ഗ്രൂപ്പ് മത്സരത്തില്‍ (INDW vs WIW) ഇന്ത്യയെ നയിച്ച് ഇറങ്ങിയതോടെയാണ് മിതാലി ഈ റെക്കോർഡ് സ്വന്തം പേരിലാക്കിയത്. മുൻ ഓസ്‌ട്രേലിയൻ വനിതാ ക്യാപ്റ്റന്‍ ബെലിൻഡ ക്ലാര്‍ക്കിനെ (Belinda Clark) മറികടന്നാണ് മിതാലിയുടെ റെക്കോർഡ് നേട്ടം. ലോകകപ്പില്‍ 23 മത്സരങ്ങളിലാണ് ബെലിൻഡ ഓസീസിനെ നയിച്ചത്.

വിൻഡീസിനെതിരെ ഇന്ത്യ കൂറ്റൻ ജയം നേടുക കൂടി ചെയ്തതോടെ മിതാലിയുടെ റെക്കോർഡ് നേട്ടത്തിന് ഇരട്ടിമധുരവും കൈവന്നു. ഹാമിൽട്ടണിൽ നടന്ന മത്സരത്തിൽ വിന്‍ഡീസിനെതിരെ 155 റണ്‍സിന്‍റെ വമ്പന്‍ ജയമാണ് മിതാലിയും സംഘവും നേടിയത്.

ടോസ് നേടി ആദ്യം ബാറ്റ് ചെയ്ത ഇന്ത്യ സ്‌മൃതി മന്ഥാനയുടെയും (123) ഹര്‍മന്‍പ്രീത് കൗറിന്റെയും (107) സെഞ്ചുറികളുടെ ബലത്തിൽ എട്ട് വിക്കറ്റ് നഷ്ടത്തിൽ 317 റൺസ് പടുത്തുയർത്തി. 318 റൺസ് ലക്ഷ്യം പിന്തുടർന്ന് ഇറങ്ങിയ വിൻഡീസിനെ ഇന്ത്യൻ ബൗളർമാർ 162 റൺസിൽ എറിഞ്ഞൊതുക്കുകയായിരുന്നു. 

ഒരു വിക്കറ്റിന് 100 റൺസ് എന്ന ശക്തമായ നിലയിലായിരുന്ന വിൻഡീസിന് പിന്നീടുള്ള ഒമ്പത് വിക്കറ്റുകൾ 62 കൂട്ടിച്ചേർക്കുമ്പോഴേക്കും നഷ്ടമാവുകയായിരുന്നു. ബൗളിങ്ങിൽ സ്നേഹ് റാണ മൂന്നും മേഘ്ന സിങ് രണ്ട് വിക്കറ്റുകളും വീഴ്ത്തി തിളങ്ങി. ഓപ്പണർമാരായ ഡീആൻഡ്ര ഡോട്ടിൻ (62), ഹെയ്‌ലി മാത്യൂസ് (43) ഒഴികെ മറ്റാർക്കും വിൻഡീസ് നിരയിൽ തിളങ്ങാൻ കഴിഞ്ഞില്ല.

നേരത്തെ, ഏറ്റവും കൂടുതൽ ലോകകപ്പ് കളിച്ച വനിതാ താരമെന്ന റെക്കോർഡും മിതാലി പേരിലാക്കിയിരുന്നു. ഈ ലോകകപ്പിൽ പാകിസ്ഥാനെതിരായ മത്സരത്തില്‍ ഇന്ത്യക്കായി കളത്തിലിറങ്ങിയതോടെ ആറ് ലോകകപ്പ് കളിക്കുന്ന ആദ്യ വനിതാ താരമെന്ന റെക്കോർഡാണ് മിതാലി പേരിലാക്കിയത്. ക്രിക്കറ്റിൽ ഈ നേട്ടത്തിലെത്തുന്ന മൂന്നാമത്തെ മാത്രം താരം കൂടിയായിരുന്നു മിതാലി. ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറുടെയും മുന്‍ പാകിസ്ഥാന്‍ താരം ജാവേദ് മിയാന്‍ദാദ് എന്നിവരാണ് ആറ് ലോകകപ്പുകളിൽ കളിച്ച മറ്റ് താരങ്ങൾ.

1992, 1996, 1999, 2007, 2011 ലോകകപ്പുകളിലാണ് സച്ചിൻ കളിച്ചത്. മിതാലി രാജ് 2000, 2005, 2009, 2013, 2017, 2022 ലോകകപ്പുകളില്‍ കളിച്ചാണ് ഈ റെക്കോഡിലേക്കെത്തിയത്. ഇന്ത്യയുടെ പേസര്‍ ജുലാന്‍ ഗോസ്വാമി അഞ്ച് ലോകകപ്പുകളില്‍ കളിച്ചിട്ടുണ്ട്. 2005, 2009, 2013, 2017, 2022 ലോകകപ്പുകളുടെ ഭാഗമാവന്‍ ജുലാന് സാധിച്ചിട്ടുണ്ട്.