David Warner| ലോകകപ്പിൽ അതിവേഗത്തിൽ 1000 റൺസ്; സച്ചിന്റെയും ഡിവില്ലിയേഴ്‌സിന്റെയും റെക്കോഡ് തകർത്ത് ഡേവിഡ് വാർണർ

ചെന്നൈ: ലോകകപ്പില്‍ ഇന്ത്യയ്‌ക്കെതിരായ മത്സരത്തിലൂടെ റെക്കോഡ് ബുക്കിലിടം പിടിച്ച് ഓസ്‌ട്രേലിയന്‍ താരം ഡേവിഡ് വാര്‍ണര്‍. ഏകദിന ലോകകപ്പില്‍ അതിവേഗത്തില്‍ 1000 റണ്‍സ് നേടുന്ന താരം എന്ന റെക്കോഡാണ് വാര്‍ണര്‍ സ്വന്തമാക്കിയത്.

ഇന്ത്യന്‍ ഇതിഹാസം സച്ചിന്‍ ടെണ്ടുല്‍ക്കര്‍, ദക്ഷിണാഫ്രിക്കൻ താരം എ ബി ഡിവില്ലിയേഴ്‌സ് എന്നിവരുടെ പേരിലുള്ള റെക്കോഡാണ് വാര്‍ണര്‍ മറികടന്നത്. ലോകകപ്പില്‍ 19 ഇന്നിങ്‌സുകളില്‍ നിന്നാണ് വാര്‍ണര്‍ 1000 റണ്‍സ് എടുത്തത്. ഡിവില്ലിയേഴ്‌സും സച്ചിനും 1000 റണ്‍സെടുക്കാന്‍ 20 ഇന്നിങ്‌സുകളെടുത്തു.

മത്സരത്തില്‍ വാര്‍ണര്‍ 41 റണ്‍സെടുത്ത് പുറത്തായിരുന്നു. 21 ഇന്നിങ്‌സുകളില്‍ നിന്ന് 1000 റണ്‍സെടുത്ത വിവിയന്‍ റിച്ചാര്‍ഡ്‌സ്, സൗരവ് ഗാംഗുലി എന്നിവരാണ് പട്ടികയില്‍ മൂന്നാം സ്ഥാനത്ത്.

 ഇന്നത്തെ മത്സരത്തില്‍ 22 റണ്‍സ് നേടിയിരുന്നെങ്കില്‍ വാര്‍ണറുടെ റെക്കോഡ് രോഹിത് ശര്‍മയ്ക്ക് മറികടക്കാനാകുമായിരുന്നു, നിലവില്‍ ഇന്ത്യന്‍ ക്യാപ്റ്റന്റെ അക്കൗണ്ടില്‍ 17 ഇന്നിങ്‌സില്‍ നിന്നായി 978 റണ്‍സുണ്ട്. ഇന്നത്തെ മത്സരത്തിലോ അടുത്ത മത്സരത്തിലോ ആയി 22 റണ്‍സെടുത്താല്‍ രോഹിത്തിന് റെക്കോഡ് സ്വന്തമാക്കാം. (AP Photo/Eranga Jayawardena)

36കാരനായ വാർണർ 151 മത്സരങ്ങളിൽ നിന്നായി ഓസ്ട്രേലിയക്കായി 6000 റണ്‍സ് നേടിയിട്ടുണ്ട്. ഇതിനൊപ്പം ലോകകപ്പിൽ 1000 റൺസ് നേടുന്ന നാലാമത്തെ ബാറ്ററായി വാർണർ. റിക്കി പോണ്ടിങ് (1743), ആദം ഗിൽക്രിസ്റ്റ് (1085), മാർക്ക് വോ (1004) എന്നിവരാണ് വാർണര്‍ക്ക് മുന്നിലുള്ളത്.

ക്രിക്കറ്റിലെ ഏറ്റവും മികച്ച ബാറ്റർമാരില്‍ ഒരാളായി വിലയിരുത്തപ്പെടുന്ന സച്ചിന്റെ പേരിലാണ് ലോകകപ്പിൽ ഏറ്റവും കൂടുതൽ റണ്‍സ് നേടിയ റെക്കോഡ്. 2278 റൺസാണ് ലോകകപ്പ് മത്സരങ്ങളിൽ നിന്ന് സച്ചിൻ നേടിയത്.