Rishabh Pant: ഐപിഎൽ 2025: റിഷഭ് പന്ത് ഡൽഹി വിട്ട് ചെന്നൈ സൂപ്പർ കിങ്സിലെത്തുമെന്ന് റിപ്പോർട്ട്

ന്യൂഡൽഹി: ഐപിഎല്‍ 2025 സീസണിന് മുൻപ് ഡല്‍ഹി കാപിറ്റല്‍സ് ക്യാപ്റ്റന്‍ റിഷഭ് പന്ത് ഫ്രാഞ്ചൈസി വിട്ടേക്കുമെന്ന് റിപ്പോർട്ട്. താരം ചെന്നൈ സൂപ്പര്‍ കിങ്സിലേക്ക് ചേക്കേറുമെന്നാണ് വിവരം.

ഡൽഹി കാപിറ്റൽസിനായി ഏറ്റവും കൂടുതൽ മത്സരങ്ങൾ കളിച്ച താരവും ഏറ്റവും കൂടുതൽ റൺസ് നേടിയ കളിക്കാരനുമാണ് റിഷഭ് പന്ത്. അടുത്ത വർഷത്തെ മെഗാ ലേലത്തിന് മുമ്പ് ഫ്രാഞ്ചൈസി വിട്ട് അഞ്ച് തവണ ചാമ്പ്യൻമാരായ ചെന്നൈ സൂപ്പർ കിങ്സിലേക്ക് ചേരുമെന്നാണ് റിപ്പോർട്ട്.

ഐപിഎൽ 2024 ൽ ടീമിനെ നയിച്ച പന്തുമായി ഡൽഹി ആസ്ഥാനമായുള്ള ഫ്രാഞ്ചൈസി അത്ര രസത്തിലല്ലെന്നാണ് ദൈനിക് ജാഗരൺ റിപ്പോർട്ട് ചെയ്യുന്നത്. കൂടാതെ സ്റ്റാർ ക്രിക്കറ്ററെ നിലനിർത്താനുള്ള തീരുമാനത്തെക്കുറിച്ച് അവർ ഇപ്പോൾ പുനരാലോചന നടത്തുകയാണെന്നും റിപ്പോർട്ടിൽ പറയുന്നു.

പന്തിനെ വിട്ടയക്കാൻ ഡൽഹി തീരുമാനിച്ചാൽ, 2024-ലെ ടി20 ലോകകപ്പിലെ എട്ട് മത്സരങ്ങളിലും ഇന്ത്യക്കായി മൂന്നാം നമ്പർ ബാറ്ററായി കളിച്ച 26-കാരനായ ഇടംകൈയ്യൻ വിക്കറ്റ് കീപ്പർ-ബാറ്ററിന് ചെന്നൈ സൂപ്പർ കിംഗ്‌സിനൊപ്പം ചേരാം.

എം എസ് ധോണി ഐപിഎല്ലിൽ നിന്ന് വിരമിക്കാൻ തീരുമാനിക്കുകയാണെങ്കിൽ, അദ്ദേഹത്തിന് പകരക്കാരനായി പന്തിനെ ടീമിലെത്തിക്കാൻ ശ്രമിക്കുന്നതായി ഒരു സിഎസ്‌കെ വൃത്തത്തെ ഉദ്ധരിച്ചാണ് റിപ്പോര്‍ട്ട്.

ഐപിഎൽ ചരിത്രത്തിൽ ഏറ്റവും കൂടുതൽ മത്സരങ്ങൾ കളിച്ച കളിക്കാരനാണ് 43 കാരനായ ധോണി, ലോകത്തിലെ ഏറ്റവും സമ്പന്നമായ ഫ്രാഞ്ചൈസി ക്രിക്കറ്റ് ലീഗിന്റെ 2025 പതിപ്പിൽ അദ്ദേഹം കളിച്ചേക്കില്ലെന്ന അഭ്യൂഹം ശക്തമാണ്.

2016ല്‍ ഡല്‍ഹിക്കൊപ്പമാണ് റിഷഭ് പന്ത് കരിയര്‍ തുടങ്ങുന്നത്. 2017ല്‍ ഇന്ത്യയ്ക്കായി അരങ്ങേറ്റം കുറിച്ചു. 2018-ല്‍ 14 മത്സരങ്ങളില്‍ നിന്ന് 684 റണ്‍സുമായി ഐപില്‍ റണ്‍വേട്ടക്കാരില്‍ രണ്ടാമതെത്തി. 2021ല്‍ ശ്രേയസ് അയ്യര്‍ക്ക് പരിക്കേറ്റതിനെ തുടര്‍ന്ന് ഡല്‍ഹിയുടെ ക്യാപ്റ്റനായി പന്ത് തിരഞ്ഞെടുക്കപ്പെട്ടു

പന്തിന്റെ നേതൃത്വത്തില്‍ ഡരല്‍ഹി ലീഗ് ഘട്ടത്തില്‍ ഒന്നാമതെത്തിയെങ്കിലും രണ്ട് യോഗ്യതാ മത്സരങ്ങളും തോറ്റ് ഫൈനലിലെത്താനായില്ല. പന്ത് ഫ്രാഞ്ചൈസി വിട്ടാല്‍ ഡല്‍ഹിക്ക് പുതിയ ക്യാപ്റ്റനെ വേണ്ടിവരും. സൗരവ് ഗാംഗുലി ഫ്രാഞ്ചൈസിയുടെ പുതിയ മുഖ്യ പരിശീലകനാകുമെന്നാണ് പ്രതീക്ഷിക്കപ്പെടുന്നത്.