80 ശതമാനം പ്രദേശവും മഞ്ഞില്‍ മൂടിക്കിടന്നിട്ടും പേര് ഗ്രീന്‍ലന്‍ഡ് ; എന്തുകൊണ്ട് ?

കൊടും ശൈത്യം നേരിടുന്ന ഹിമാനികൾ നിറഞ്ഞ ആർട്ടിക് മേഖലയിലെ ദ്വീപാണ് ഗ്രീൻലൻഡ്. വെനസ്വലയിൽ പിടിമുറുക്കിയ യുഎസ് പ്രസിഡന്റ് ഡൊണാൾഡ് ട്രംപ് അടുത്തതായി ഉന്നംവെക്കുന്നത് ഗ്രീൻലൻഡിനെയാണെന്ന് സൂചന നൽകിക്കഴിഞ്ഞു. ഇതോടെയാണ് ഗ്രീൻലൻഡ് ആഗോള ചർച്ചകളിൽ ഇടംനേടിയത്. ഗ്രീൻലൻഡ് സ്വന്തമാക്കേണ്ടത് യുഎസിനെ സംബന്ധിച്ച് പ്രധാനമാണെന്ന് ട്രംപ് വീണ്ടും ആവർത്തിച്ചു പറഞ്ഞുകഴിഞ്ഞു. വൈറ്റ്ഹൗസിൽ യുഎസിലെ എണ്ണക്കമ്പനികളുടെ നേതൃത്വങ്ങളുമായി നടത്തിയ ചർച്ചയിലും ട്രംപ് ഇക്കാര്യം വീണ്ടും തറപ്പിച്ചു പറഞ്ഞതായാണ് റിപ്പോർട്ട്. 2019 മുതൽ ട്രംപ് മുന്നോട്ടുവെക്കുന്ന വിവാദപരമായ ഒരു ആശയമാണിത്.

ആഗോളതലത്തിൽ സമാധാനത്തിന്റെ വക്താവായി സ്വയം അവരോധിച്ച ട്രംപ് പ്രാദേശിക താൽപ്പര്യത്തിന്റെ അടിസ്ഥാനത്തിലല്ല ഗ്രീൻലൻഡ് വിഷയം ഉയർത്തിപ്പിടിക്കുന്നത്. മറിച്ച് ആർട്ടിക് മേഖലയിൽ റഷ്യയും ചൈനയും സ്വാധീനം വ്യാപിപ്പിക്കുന്നത് തടയാനുള്ള ശ്രമങ്ങളുടെ ഭാഗമായാണ് ട്രംപ് ഈ വാദം മുന്നോട്ടുവെക്കുന്നത്. ഗ്രീൻലൻഡിൽ സൈനിക നടപടി ഉണ്ടാകുമെന്ന സൂചനയും ട്രംപ് നൽകുന്നുണ്ട്.

എളുപ്പത്തിൽ ഒരു കരാറിലെത്താനാണ് ഞാൻ ആഗ്രഹിക്കുന്നത്. അത് എളുപ്പത്തിൽ സാധിച്ചില്ലെങ്കിൽ കടുത്ത നടപടിയിലേക്ക് നീങ്ങും,' ട്രംപ് പറഞ്ഞു. യുഎസും ഡെൻമാർക്കിന്റെ ഭാഗമായ ഗ്രീൻലൻഡും നോർത്ത് അറ്റ്‌ലാന്റിക് ട്രീറ്റി ഓർഗനൈസേഷനിൽ (നാറ്റോ) അംഗമാണ്. അതുകൊണ്ടുതന്നെയാണ് ഗ്രീൻലൻഡിനെതിരെയുള്ള ട്രംപിന്റെ പടയൊരുക്കം ശ്രദ്ധനേടുന്നത്.

ഇതേച്ചുറ്റിപ്പറ്റിയുള്ള ആഗോള, രാഷ്ട്രീയ ചർച്ചകൾ തുടരുന്നതിനിടയിൽ ഓൺലൈനിൽ മറ്റൊരു ചോദ്യം കൂടി ഉയർന്നുവരികയാണ്. ഗ്രീൻലൻഡിന് ആ പേര് വന്നത് എന്തുകൊണ്ടാണെന്നാണ് ആ സംശയം. അതിനും കാരണമുണ്ട്. അതിശൈത്യം നേരിടുന്ന ഗ്രീൻലൻഡിന് ആ പേര് വന്നത് തെറ്റിദ്ധരിപ്പിക്കുന്നതായി തോന്നുന്നു. ദ്വീപിന്റെ ഏകദേശം 80 ശതമാനം പ്രദേശവും മഞ്ഞുമൂടിയതാണ്. വർഷം മുഴുവനും കൊടും ശൈത്യം നേരിടുന്നു. എന്നിട്ടും ഗ്രീൻലൻഡ് എന്ന് വിളിക്കാനുള്ള കാരണമാണ് അമ്പരപ്പിക്കുന്നത്. ദ്വീപിന്റെ തന്ത്രപരമായ പ്രാധാന്യത്തെ കുറിച്ചുള്ള ചർച്ചകൾ വാർത്തകളിൽ നിറയുമ്പോൾ പേരിലെ ഈ വൈരുദ്ധ്യവും പലരെയും അദ്ഭുതപ്പെടുത്തുന്നു.ഗ്രീൻലൻഡിന്റെയും ഐസ്!ലൻഡിന്റെയും പേരിലെ ചരിത്രപരമായ സന്ദർഭം വിശദമാക്കുന്ന ഒരു വീഡിയോ അടുത്തിടെ ശ്രദ്ധനേടിയിരുന്നു. രണ്ട് അയൽ രാജ്യങ്ങളുടെയും പേരുകൾ അവയുടെ യഥാർത്ഥ ഭൂമിശാസ്ത്രവുമായി താരതമ്യപ്പെടുത്തുമ്പോൾ വിചിത്രമായി തോന്നുന്നു.

പലർക്കും തോന്നുന്ന ലളിതമായ സംശയത്തോടെയാണ് ഈ ചോദ്യം ആരംഭിക്കുന്നത്. 80 ശതമാനവും മഞ്ഞുമൂടിയ ഗ്രീൻലൻഡിനെ എന്തുകൊണ്ടാണ് ഗ്രീൻലൻഡ് എന്ന് വിളിക്കുന്നതെന്ന് വീഡിയോയിൽ ചോദിക്കുന്നു. പച്ചപ്പിനും ചൂടുനീരുറവകൾക്കും പ്രശസ്തമായ ഐസ്!ലൻഡിന് എന്തുകൊണ്ട് ആ പേര് കിട്ടി എന്നും വീഡിയോയിൽ ചോദിക്കുന്നുണ്ട്. ഈ പേരുകൾ പരസ്പരം കൂടിച്ചേർന്നതായി തോന്നുന്നുവെന്നും അതിൽ പറയുന്നുണ്ട്. അത് യഥാർത്ഥത്തിൽ ഒരു വൈക്കിംഗ് തന്ത്രമായിരുന്നുവെന്നും പറയപ്പെടുന്നു.

ആയിരം വർഷങ്ങൾക്ക് മുമ്പ് വൈക്കിംഗ് യുഗത്തിൽ നിന്നാണ് പേരുകളിലെ വൈരുദ്ധ്യം വന്നതെന്ന് വീഡിയോ വിശദീകരിക്കുന്നു. സ്‌കാൻഡിനേവിയയിൽ നിന്ന് (ആധുനിക നോർവേ, ഡെൻമാർക്ക്, സ്വീഡൻ) ഉത്ഭവിച്ച വൈക്കിംഗുകൾ, യൂറോപ്പിലും അതിനുപുറത്തും ലോംഗ്ഷിപ്പുകൾ, ആക്രമണങ്ങൾ, കുടിയേറ്റങ്ങൾ എന്നിവയ്ക്ക് പേരുകേട്ട കടൽ സഞ്ചാരികളായ പര്യവേക്ഷകരായിരുന്നു. 8ാം നൂറ്റാണ്ടിന്റെ അവസാനത്തിലും 11ാം നൂറ്റാണ്ടിനും ഇടയിൽ അവർ ഐസ്‌ലൻഡിലും ഗ്രീൻലൻഡിലും കമ്മ്യൂണിറ്റികൾ സ്ഥാപിക്കുകയും വടക്കേ അമേരിക്കയുടെ ചില ഭാഗങ്ങളിലേക്ക് എത്തുകയും ചെയ്തു.

വീഡിയോയിൽ പറയുന്നത് അനുസരിച്ച് ഐസ്‌ലൻഡിനാണ് ആദ്യം പേര് ലഭിച്ചത്. 9ാം നൂറ്റാണ്ടിൽ നോർവീജിയൻ വൈക്കിംഗുകളാണ് ഐസ്‌ലൻഡിന്റെ തീരത്ത് ആദ്യമായി എത്തിയത്. ഒരു ശൈത്യകാലമായിരുന്നു അത്. മഞ്ഞും ഐസും മാത്രം കണ്ടതിനാൽ അവർ സ്വാഭാവികമായും അതിന് ഐസ്‌ലൻഡ് എന്ന് പേരിട്ടുവെന്ന് വീഡിയോ വിശദീകരിക്കുന്നു. കുറ്റകൃത്യങ്ങളുടെ പേരിൽ ഐസ്‌ലൻഡിൽ നിന്ന് നാടുകടത്തപ്പെട്ട വൈക്കിംഗ് ആയ എറിക് ദി റെഡ് ആണ് ഗ്രീൻലൻഡിന് പിന്നീട് പേര് നൽകിയതെന്ന് വീഡിയോ വിശദീകരിക്കുന്നു. സ്ഥിരതാമസമാക്കാൻ പുതിയ ഭൂമികൾ തിരയുന്നതിനിടയിൽ അദ്ദേഹം പടിഞ്ഞാറോട്ട് സഞ്ചരിച്ച് മഞ്ഞുമൂടിയ ഒരു വലിയ ദ്വീപിനെ കണ്ടുമുട്ടി. അത്തരമൊരു സ്ഥലത്തേക്ക് കുടിയേറ്റക്കാരെ ആകർഷിക്കുന്നത് ബുദ്ധിമുട്ടാണെന്ന് മനസ്സിലാക്കിയ എറിക് കൂടുതൽ ബുദ്ധിപരമായ ഒരു സമീപനം തിരഞ്ഞെടുത്തു. ഒരു സമർത്ഥമായ തന്ത്രം പ്രയോഗിച്ച് ഗ്രീൻലൻഡ് എന്ന് പേരിട്ടു.

ദ്വീപിന്റെ പേരിന് ചരിത്രപരമായ വേരുകൾ വൈക്കിംഗിൽ നിന്ന് ലഭിച്ചിരിക്കാമെങ്കിലും ആധുനിക ഗ്രീൻലൻഡുകാർ അവരുടെ സ്വത്വത്തെയും ഭാവിയെയും കുറിച്ച് ഉറച്ചുനിൽക്കുന്നു. ട്രംപിന്റെ പുതിയ പരാമർശങ്ങളെത്തുടർന്ന് ഗ്രീൻലൻഡിലെ രാഷ്ട്രീയ നേതാക്കൾ അവരുടെ സ്വയംഭരണത്തോടുള്ള അമേരിക്കയുടെ അവഗണനയെ വിമർശിച്ചുകൊണ്ട് പ്രസ്താവന പുറത്തിറക്കി. 'ഞങ്ങൾക്ക് അമേരിക്കക്കാരാകാൻ ആഗ്രഹമില്ല, ഞങ്ങൾക്ക് ഡെന്മാർക്കുകാരാകാൻ ആഗ്രഹമില്ല, ഞങ്ങൾക്ക് ഗ്രീൻലൻഡുകാരായാൽ മതി. ഗ്രീൻലൻഡിന്റെ ഭാവി തീരുമാനിക്കേണ്ടത് ഗ്രീൻലൻഡിലെ ജനതയാണ്,' ചില നേതാക്കൾ പറഞ്ഞു.

ഗ്രീൻലൻഡിലെ ജലാശയങ്ങളിൽ റഷ്യൻ, ചൈനീസ് കപ്പലുകളുടെ സാന്നിധ്യം വർദ്ധിച്ചുവരുന്നുവെന്ന ട്രംപിന്റെ ആവർത്തിച്ചുള്ള അവകാശവാദങ്ങളെക്കുറിച്ചും ആശങ്കകൾ ഉയർന്നിട്ടുണ്ട്. ഗ്രീൻലൻഡിലെ ദേശീയ ട്രേഡ് യൂണിയൻ കോൺഫെഡറേഷൻ എസ്‌ഐകെയുടെ ചെയർമാനായ ജെസ് ബെർത്തൽസെൻ ഈ വാദങ്ങളെ പൂർണ്ണമായും തള്ളിക്കളഞ്ഞു. തങ്ങൾക്ക് അങ്ങനെ ഒന്ന് കാണാൻ കഴിഞ്ഞിട്ടില്ലെന്ന് അദ്ദേഹം വ്യക്തമാക്കി. ട്രംപിന്റെ അവകാശവാദങ്ങളുടെ അടിസ്ഥാനത്തെ ബെർത്തൽസെൻ കൂടുതൽ ചോദ്യം ചെയ്തു, 'ഡാനിഷ് നാവികസേന ഗ്രീൻലൻഡ് ജലാശയങ്ങളിൽ സഞ്ചരിക്കുന്നുണ്ട്, ഞങ്ങളുടെ വലിയ ട്രോളറുകളും എല്ലായിടത്തും ഉണ്ട്, പക്ഷേ റഷ്യൻ, ചൈനീസ് കപ്പലുകളെ കണ്ടിട്ടില്ല,' അദ്ദേഹം വിശദമാക്കി.

ഗ്രീൻലൻഡിന്റെ നിലപാടിന് നിരവധി യൂറോപ്യൻ രാജ്യങ്ങളിൽ നിന്ന് പിന്തുണ ലഭിച്ചിട്ടുണ്ട്. ഫ്രാൻസ്, ജർമ്മനി, ഇറ്റലി, പോളണ്ട്, സ്‌പെയിൻ, ബ്രിട്ടൻ, ഡെൻമാർക്ക് എന്നിവ സംയുക്ത പ്രസ്താവന പുറത്തിറക്കി ഗ്രീൻലൻഡിനെ പിന്തുണച്ചു. ഗ്രീൻലൻഡിന്റെ ഭാവിയെക്കുറിച്ചുള്ള തീരുമാനങ്ങൾ ഗ്രീൻലൻഡിനും ഡെൻമാർക്കിനും മാത്രമേ എടുക്കാൻ കഴിയൂ എന്നും ഉറപ്പിച്ചു.