ഓൺലൈൻ വീഡിയോ ഗെയിമിൽ 13കാരി മകളുടെ അശ്‌ളീല ചിത്രം ആവശ്യപ്പെട്ടു; ദുരനുഭവവുമായി അക്ഷയ് കുമാർ

Published by:meera_57
news18-malayalam

Last Updated:Oct 03, 2025 5:52 PM IST

അപരിചിതൻ തുടക്കത്തിൽ 'നന്ദി', 'നന്നായി കളിച്ചു' തുടങ്ങിയ സൗഹൃദപരമായ സന്ദേശങ്ങൾ ഗെയിമിനുള്ളിൽ അയച്ചിരുന്നുവെന്ന് അക്ഷയ്

Impact Shortsഗേറ്റ് വേ ഏറ്റവും പുതിയ വാർത്തയ്ക്കായി

+ Follow usOn Google

കുട്ടികളുടെ ഓൺലൈൻ സുരക്ഷയെക്കുറിച്ച് മാതാപിതാക്കൾ ജാഗ്രത പാലിക്കണമെന്ന് അക്ഷയ് കുമാർ (Akshay Kumar). 2025 ഒക്ടോബർ മാസത്തെ സൈബർ അവബോധ മാസാചരണത്തിന്റെ ഉദ്ഘാടന വേളയിൽ, തന്റെ 13 വയസ്സുള്ള മകൾ നിതാരയെ ഓൺലൈൻ വീഡിയോ ഗെയിം കളിക്കുന്നതിനിടെ ഒരു അപരിചിതൻ സമീപിച്ചതിനെക്കുറിച്ച് നടൻ പങ്കുവെച്ചു.

ഡി.ജി.പി. ഓഫീസിൽ നടന്ന പരിപാടിയിൽ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസും മുതിർന്ന പോലീസ് ഉദ്യോഗസ്ഥരും നടനൊപ്പം പങ്കെടുത്തു. സൈബർ കുറ്റകൃത്യങ്ങളുടെ വർദ്ധിച്ചുവരുന്ന ഭീഷണികളിലാണ് പരിപാടി ശ്രദ്ധ കേന്ദ്രീകരിച്ചതെങ്കിലും, അക്ഷയ് കുമാറിന്റെ കഥയാണ് ഏറ്റവും കൂടുതൽ ചർച്ച ചെയ്യപ്പെട്ടത്.

മകൾ ഓൺലൈൻ ഗെയിം കളിച്ചപ്പോൾ എന്താണ് സംഭവിച്ചതെന്ന് വിവരിക്കുമ്പോൾ, അപരിചിതൻ തുടക്കത്തിൽ 'നന്ദി', 'നന്നായി കളിച്ചു' തുടങ്ങിയ സൗഹൃദപരമായ സന്ദേശങ്ങൾ ഗെയിമിനുള്ളിൽ അയച്ചിരുന്നുവെന്ന് അക്ഷയ് പറഞ്ഞു. എന്നാൽ താമസിയാതെ, സ്വരം മാറി.

"ആ ഗെയിം അവളെ അപരിചിതരുമായി കളിക്കാൻ അനുവദിച്ചു. മറുവശത്തുള്ള ആൾ 'നന്ദി', 'നന്നായി കളിച്ചു', 'അതിശയകരം' തുടങ്ങിയ മാന്യമായ സന്ദേശങ്ങൾ തുടക്കത്തിൽ നൽകി. അയാളൊരു നല്ല വ്യക്തിയാണെന്ന് തോന്നി. കുറച്ച് സമയത്തിന് ശേഷം, അവൾ ആൺകുട്ടിയാണോ പെൺകുട്ടിയാണോ എന്നായി. അവൾ പെൺകുട്ടി എന്ന് മറുപടി നൽകിയപ്പോൾ, സംഭാഷണത്തിന്റെ സ്വരം മാറി," അക്ഷയ് പറഞ്ഞു.

തുടർന്ന് അപരിചിതൻ നഗ്നചിത്രങ്ങൾ ആവശ്യപ്പെട്ടുകൊണ്ട് വ്യക്തമായ ഒരു ആവശ്യം ഉന്നയിച്ചതായി അദ്ദേഹം വെളിപ്പെടുത്തി. “എന്റെ മകൾ ഉടൻ തന്നെ ഗെയിം അവസാനിപ്പിക്കുകയും, എന്റെ ഭാര്യയെ അറിയിക്കുകയും ചെയ്തു. ഭാഗ്യവശാൽ, എന്താണ് സംഭവിച്ചതെന്ന് പങ്കിടാൻ അവൾ മടിച്ചില്ല. അവളുടെ ആ മനസാണ് ഏറ്റവും നല്ല കാര്യം,” നടൻ വിശദീകരിച്ചു.

മാതാപിതാക്കൾക്കുള്ള മുന്നറിയിപ്പ്

ഇതൊരു ഒറ്റപ്പെട്ട കേസല്ല, മറിച്ച് വേട്ടക്കാർ ഓൺലൈനിൽ എങ്ങനെ പ്രവർത്തിക്കുന്നു എന്നതിന്റെ ഒരു വലിയ മാതൃകയുടെ ഭാഗമാണെന്ന് അക്ഷയ് ഊന്നിപ്പറഞ്ഞു. പ്രായപൂർത്തിയാകാത്തവരെ ചൂഷണം ചെയ്യാൻ ശ്രമിക്കുന്നതിന് മുമ്പ് അത്തരം കുറ്റവാളികൾ ആദ്യം വിശ്വാസം വളർത്തിയെടുക്കുന്നത് എങ്ങനെയാണെന്നും ഇത് പലപ്പോഴും ബ്ലാക്ക് മെയിലിംഗ്, കൊള്ളയടിക്കൽ അല്ലെങ്കിൽ അതിലും മോശമായതിലേക്ക് നയിക്കുന്നുവെന്നും അദ്ദേഹം ചൂണ്ടിക്കാട്ടി.

ഇതൊരു 'വേക്കപ്പ് കോൾ' എന്ന് വിശേഷിപ്പിച്ച അദ്ദേഹം, കുടുംബങ്ങൾ കുട്ടികളുമായി തുറന്ന സംഭാഷണങ്ങൾ നടത്താൻ ആവശ്യപ്പെട്ടു. ഇന്റർനെറ്റിന്റെ നിശബ്ദ അപകടങ്ങളെ നേരിടുന്നതിൽ, മാതാപിതാക്കളും കുട്ടികളും തമ്മിലുള്ള വിശ്വാസത്തിന്റെ പ്രാധാന്യം അദ്ദേഹത്തിന്റെ വാക്കുകളിൽ നിറഞ്ഞിരുന്നു.