നഗരത്തിൽ പുലിയിറങ്ങി; വൈറലായി ഗാസിയാബാദിലെ സി.സി ടി.വി ദൃശ്യങ്ങൾ

ഗാസിയാബാദിലെ രാജ്‌നഗർ പ്രദേശത്താണ് പുലിയെ കണ്ടെത്തിയതെന്നാണ് സർക്കാർ ഉദ്യോഗസ്ഥരെ ഉദ്ധരിച്ച് വാർത്താ ഏജൻസിയായ പിടിഐ റിപ്പോർട്ട് ചെയ്യുന്നത്.

ഗാസിയാബാദ് ഡവലപ്‌മെന്റ് അതോറിറ്റി (ജിഡിഎ) വൈസ് ചെയർപേഴ്‌സന്റെ ജനറേറ്റർ മുറിയിൽ പുള്ളിപ്പുലി എത്തിയെന്നും സ്ഥിരീകരിച്ചിട്ടുണ്ട്.  ജനറേറ്റർ ഓൺ ചെയ്യാൻ ശ്രമിക്കുന്നതിനിടെ  ജീവനക്കാരനെ മുറിയിൽ പതുങ്ങിയിരുന്ന പുലി ആക്രമിക്കാൻ ശ്രമിച്ചെന്നും റിപ്പോർട്ടിൽ പറയുന്നു. നിലവിളി കേട്ട് ഓടിയെത്തിയ മറ്റു ജീവനക്കാർ വടികൾ ഉപയോഗിച്ച് പ്രത്യാക്രമണം നടത്തിയതോടെ പുലി ഒരു മരത്തിൽ കയറി സമീപത്തെ ഒരു ഇൻസ്റ്റിറ്റ്യൂട്ട് കാമ്പസിലേക്ക് രക്ഷപ്പെട്ടെന്നാണ് വിവരം.

പുലുയെ കണ്ടെത്തി കൂട്ടിലാക്കാൻ  വനം വകുപ്പിന്റെ അഞ്ച് സംഘങ്ങളെ നഗരത്തിൽ വിന്യസിച്ചിട്ടുണ്ടെന്ന് ജില്ലാ മജിസ്‌ട്രേറ്റ് അജയ് ശങ്കർ പാണ്ഡെ പറഞ്ഞു. അതേസമയം മുൻ കരുതൽ നടപടിയുടെ ഭാഗമായി പ്രദേശത്തുള്ളവർ വീടിനുള്ളിൽ തന്നെ കഴിയണമെന്നും അധികൃതർ അഭ്യർഥിച്ചിട്ടുണ്ട്.