ആള് പുലിയാണ് കേട്ടാ! ഒഴുക്കോടെ ഇംഗ്ലീഷ് സംസാരിക്കുന്ന കൊച്ചിയിലെ ഓട്ടോ ഡ്രൈവര്‍; അതിശയിച്ച് യുകെ വ്ളോഗർ

സ്വന്തം നാടുവിട്ട് മറ്റുനാടുകളില്‍ യാത്ര പോകുന്നവര്‍ ഏറെയാണ്. ടൂറിസ്റ്റ് സംഘത്തിനൊപ്പവും തനിച്ചും യാത്ര ചെയ്യുന്നവര്‍ ഉണ്ട്. ടൂറിസ്റ്റ് സംഘത്തിനൊപ്പം യാത്ര ചെയ്യുന്നവര്‍ക്ക് മിക്കപ്പോഴും ഒരു ഗൈഡിന്റെ സഹായമുണ്ടാകും. എന്നാല്‍, തനിച്ച് യാത്ര ചെയ്യുന്നവര്‍ മറ്റുള്ളവരോട് ചോദിച്ചും മനസ്സിലാക്കിയുമൊക്കൊണ് യാത്രകള്‍ നടത്താറ്. ഇതിനിടയില്‍ ഭാഷ ചിലപ്പോള്‍ ബുദ്ധിമുട്ട് സൃഷ്ടിക്കാറുണ്ട്. ഇപ്പോഴിതാ യുകെയില്‍ നിന്ന് കൊച്ചിയിലെത്തിയ വ്‌ളോഗറുടെ അനുഭവമാണ് ഇന്‍സ്റ്റഗ്രാമില്‍ ചര്‍ച്ചയായിരിക്കുന്നത്. സാക്കി സൂ എന്ന വ്‌ളോഗറാണ് തന്റെ അനുഭവം പങ്കിട്ടിരിക്കുന്നത്. പണം എടുക്കുന്നതിന് ഫോര്‍ട്ട് കൊച്ചിയില്‍ എടിഎം അന്വേഷിച്ച് കൊണ്ടിരിക്കെ ഉച്ചവെയിലില്‍ ബുദ്ധിമുട്ടുകയായിരുന്നു താന്‍ എന്നും അപ്പോഴാണ് അഷ്‌റഫ് എന്ന ഓട്ടോ ഡ്രൈവറെ കണ്ടുമുട്ടിയതെന്നും സാക്കി പറഞ്ഞു. ആദ്യം ഒന്ന് മടിച്ചെങ്കിലും എടിഎം എവിടെയാണ് ഉള്ളതെന്ന് സാക്കി ഓട്ടോ ഡ്രൈവറോട് തിരക്കി. എന്നാല്‍, വ്‌ളോഗറെ ഞെട്ടിച്ചുകൊണ്ട് ഓട്ടോ ഡ്രൈവര്‍ ഇംഗ്ലീഷില്‍ ഒഴുക്കോടെ മറുപടി നൽകി. ഏതാനും മീറ്ററുകള്‍ക്കപ്പുറം എടിഎം ഉണ്ടെന്നും തന്റെ ഓട്ടോയില്‍ കയറുകയാണെങ്കില്‍ എടിഎമ്മിന് സമീപം ഇറക്കിത്തരാമെന്നും അദ്ദേഹം സാക്കിയോട് പറഞ്ഞു. ''ആദ്യം ഞാനൊന്നു മടിച്ചു. എന്നാല്‍ കുറച്ച് സമയം സംസാരിച്ചതിന് ശേഷം അദ്ദേഹം സൗഹൃദത്തോടെയാണ് ഇടപെടുന്നതെന്ന് മനസ്സിലായി. കടുത്ത ചൂടും അനുഭവപ്പെടുന്നുണ്ടായിരുന്നു. സ്ഥലങ്ങള്‍ അദ്ദേഹത്തിന് പരിചയമുണ്ടാകുമെന്ന് എനിക്ക് തോന്നി,'' സാക്കി പറഞ്ഞു.