GATE 2025: പഠനം-ഗവേഷണം-ജോലി; സ്വപ്നങ്ങളുടെ ജാലകം തുറക്കുന്ന ഗേറ്റ് പരീക്ഷയ്ക്ക് ഇപ്പോൾ അപേക്ഷിക്കാം
- Published by:Rajesh V
- news18-malayalam
Last Updated:
കേന്ദ്രസർക്കാരിന്റെ ധനസഹായത്തോടെ എൻജിനീയറിങ്, ടെക്നോളജി, ആർക്കിടെക്ചർ മാസ്റ്റേഴ്സ് എന്നിവയ്ക്കു പുറമെ ഡോക്ടറൽ പഠനത്തിനും ആർട്സ്, സയൻസ്, കൊമേഴ്സ്, ഹ്യുമാനിറ്റീസ് വിഷയങ്ങളിലെ ഡോക്ടറൽ പഠനത്തിനും അർഹത നിർണയിക്കുന്ന പരീക്ഷയാണ് ഗേറ്റ് (Graduate Aptitude Test in Engineering).
സ്കോളർഷിപ്പോടെയുള്ള ബിരുദാനന്തരബിരുദ പഠനം, ഗവേഷണം, അതുമല്ലെങ്കിൽ സ്ഥിരനിയമനം ഒക്കെ സാധുത നൽകുന്ന ഗേറ്റ് പരീക്ഷയ്ക്ക് ഇപ്പോൾ അപേക്ഷിക്കാം. കേന്ദ്രസർക്കാരിന്റെ ധനസഹായത്തോടെ എൻജിനീയറിങ്, ടെക്നോളജി, ആർക്കിടെക്ചർ മാസ്റ്റേഴ്സ് എന്നിവയ്ക്കു പുറമെ ഡോക്ടറൽ പഠനത്തിനും ആർട്സ്, സയൻസ്, കൊമേഴ്സ്, ഹ്യുമാനിറ്റീസ് വിഷയങ്ങളിലെ ഡോക്ടറൽ പഠനത്തിനും അർഹത നിർണയിക്കുന്ന പരീക്ഷയാണ് ഗേറ്റ് ( Graduate Aptitude Test in Engineering). ഇതു കൂടാതെ, പ്രമുഖ പൊതുമേഖലാ സ്ഥാപനങ്ങളിലെ സ്ഥിര നിയമനങ്ങൾക്കും ഗേറ്റ് അടിസ്ഥാനയോഗ്യതയാണ്. ഇതോടൊപ്പം, കേന്ദ്രസർക്കാരിലെ ഗ്രൂപ്പ് എ തസ്തികകളിൽ നേരിട്ടുള്ള നിയമനത്തിനും ഗേറ്റ് സ്കോർ ഉപയോഗിക്കാറുണ്ട്. ഓൺലൈൻ ആയി അപേക്ഷിക്കാനുള്ള അവസാന തീയതി,സെപ്റ്റംബർ 26 ആണ്. ലേറ്റ് ഫീ സഹിതം അപേക്ഷിക്കാനുള്ള അവസാനതീയതി, ഒക്ടോബർ 7 ആയി നിജപ്പെടുത്തിയിട്ടുണ്ട്. പരീക്ഷകൾ, ഫെബ്രുവരി 1,2,15,16 (ശനി, ഞായർ ദിവസങ്ങളിൽ രാജ്യത്തെ വിവിധ കേന്ദ്രങ്ങളിൽ നടക്കും.
ഐ.ഐ.എസ് സി. ബംഗളൂരുവിനും (ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ്) രാജ്യത്തെ 7 ഐഐടികളും സംയുക്തമായാണ്, ഗേറ്റ് 2025 നടത്തുന്നത്.ഐഐടി റൂർക്കിയ്ക്കാണ്, ഓൺലൈൻ പരീക്ഷയുടെ നടത്തിപ്പ് ചുമതല. ഒരാൾക്ക് എത്ര തവണ വേണമെങ്കിലും ഗേറ്റ് എഴുതാവുന്നതാണ്. ഓർക്കുക; ഗേറ്റ് ഒരു പ്രവേശന പരീക്ഷയല്ല; മറിച്ച് യോഗ്യതാ നിർണയംമാത്രമാണ്. അപേക്ഷാർത്ഥികൾ, റിസൾട്ട് അറിഞ്ഞതിനുശേഷം വിവിധ സ്ഥാപനങ്ങളിലെ പ്രവേശനം, ജോലി എന്നിവയ്ക്കായി അതത് സ്ഥാപനങ്ങളിൽ നേരിട്ട് തന്നെ അപേക്ഷിക്കേണ്ടതുണ്ട്. ഗേറ്റ് സ്കോറിന്, ഫലപ്രഖ്യാപന ദിവസം മുതൽ 3 വർഷത്തേക്ക് പ്രാബല്യമുണ്ട്
advertisement
അപേക്ഷാ ഫീസ്
അപേക്ഷാ ഫീസ്,ഓൺലൈനായി മാത്രമേ അടയ്ക്കാനാകൂ. ഒരു പേപ്പറിന് 1800/- രൂപയാണ്, അപേക്ഷാ ഫീസ്. പെൺകുട്ടികളും പട്ടികജാതി/വർഗ്ഗ /ഭിന്നശേഷി വിഭാഗക്കാരും 900/- രൂപ അടച്ചാൽ മതി. ലേറ്റ്ഫീസ്, പൊതു വിഭാഗത്തിന് 2300/- രൂപയും സംവരണ വിഭാഗങ്ങൾക്ക് 1400/-രൂപയുമാണ്. എന്നാൽ 2 പേപ്പർ പരീക്ഷയെഴുതാൻ, ഇരട്ടി ഫീസ് നൽകണം എന്നാൽ ഒരൊറ്റ അപേക്ഷയേ വേണ്ടതുള്ളൂ.
പരീക്ഷാകേന്ദ്രങ്ങൾ
ഗേറ്റ് പരീക്ഷയ്ക്ക്, രാജ്യമെമ്പാടും പരീക്ഷാകേന്ദ്രങ്ങളുണ്ട്. കേരളത്തിൽ രണ്ടു സോണുകളായി തിരിച്ചാണ്, പരീക്ഷാകേന്ദ്രങ്ങൾ ക്രമീകരിച്ചിരിക്കുന്നത്. അതിൽ ഐ.ഐ.എസ്‌സി. ബെംഗളൂരു സോണിനു കീഴിൽ പത്തനംതിട്ട, അങ്കമാലി, തൃശൂർ, പാലക്കാട്, മലപ്പുറം, വടകര, കോഴിക്കോട്, കണ്ണൂർ, വയനാട്, പയ്യന്നൂർ, കാസർകോട് എന്നീ പരീക്ഷാ കേന്ദ്രങ്ങളും ഐ.ഐ.ടി. മദ്രാസ് സോണിനു കീഴിൽ, തിരുവനന്തപുരം, ആറ്റിങ്ങൽ, കൊല്ലം, ആലപ്പുഴ, ചെങ്ങന്നൂർ, കോട്ടയം, കാഞ്ഞിരപ്പള്ളി, മൂവാറ്റുപുഴ, കോതമംഗലം ആലുവ–എറണാകുളം എന്നീ പരീക്ഷാ കേന്ദ്രങ്ങളുമുണ്ട് . അപേക്ഷകർക്ക് , ഒരേ സോണിലെ 3 കേന്ദ്രങ്ങൾ വരെ ഒപ്റ്റ് ചെയ്യാവുന്നതാണ്.
advertisement
ആർക്കൊക്കെ അപേക്ഷിക്കാം
എൻജിനീയറിങ്, ടെക്നോളജി, ആർക്കിടെക്ചർ, ആർട്സ്, സയൻസ്, കൊമേഴ്സ്, മാനവികവിഷയങ്ങൾ ഇവയൊന്നിലെ യുജി പ്രോഗ്രാമിന്റെ 3–ാം വർഷമെങ്കിലും പഠിക്കുന്നവർക്കും നിർദ്ദിഷ്ട ബിരുദം പൂർത്തിയാക്കിയവർക്കും അപേക്ഷിക്കാം. നാലുവർഷ ബിഎസ് ബിരുദത്തിന്റെ മൂന്നാം വർഷ വിദ്യാർഥികൾക്കും മെഡിസിൻ, ഡെന്റൽ സർജറി, വെറ്ററിനറി സയൻസ് എന്നീ ബാച്ചിലർ പ്രോഗ്രാമുകളിൽ അഞ്ചാം സെമസ്റ്റർ പഠിക്കുന്നവർക്കും അവസരമുണ്ട്. എൻജിനീയറിങ്, ടെക്നോളജി, അഗ്രികൾചർ, ഹോർട്ടികൾചർ, ഫോറസ്ട്രി, ഫാർമസി, ആർക്കിടെക്ചർ എന്നീ ബാച്ചിലർ പ്രോഗ്രാമുകളിൽ പഠിക്കുന്ന മൂന്നാം വർഷക്കാർക്കും ഫാംഡി മൂന്നാം വർഷക്കാർക്കും എംഎ, എംഎസ്‌സി, എംസിഎ, പോസ്റ്റ് ബിഎസ്‌സി ഇന്റഗ്രേറ്റഡ് എംടെക് ഒന്നാം വർഷമോ അതിനു മേലോട്ടുള്ള ക്ലാസുകളിൽ പഠിക്കുന്നവർക്കും അപേക്ഷിക്കാം. ഇതു കൂടാതെ നിർദിഷ്ട ബാച്‌ലർ ബിരുദത്തിനു തുല്യമായി കേന്ദ്രസർക്കാർ അംഗീകരിച്ച ഏതു പ്രൊഫഷനൽ അംഗത്വമുള്ളവരെയും ഉയർന്ന യോഗ്യതകൾ നേടിയവർക്കും അപേക്ഷിക്കാവുന്നതാണ്.
advertisement
പരീക്ഷാക്രമം
30 സബ്ജക്ട് പേപ്പറുകളാണ്, ആകെയുള്ളത്. ഓരോ പേപ്പറിനും 100 മാർക്കുണ്ട്. എല്ലാ പേപ്പറിനും പൊതുവായി, 15 മാർക്കിന്റെ ‘ജനറൽ ആപ്റ്റിറ്റ്യൂഡ്’ ഉണ്ട്. പരീക്ഷാസമയം 3 മണിക്കൂർ ആണ്. പരീക്ഷയ്ക്ക്, ഒബ്ജക്ടീവ് ടൈപ്പ് ചോദ്യങ്ങൾ മാത്രമേ ഉണ്ടായിരിക്കൂ. അതായത്, മൾട്ടിപ്പിൾ ചോയ്സ് / മൾട്ടിപ്പിൾ സിലക്ട് / ന്യൂമെറിക്കൽ ആൻസർ എന്നിങ്ങനെ 3 രീതികളിലായിരിക്കും ചോദ്യങ്ങൾ. മൾട്ടിപ്പിൾ ചോയ്സ് ചോദ്യങ്ങളിൽ ഒരു ശരിയുത്തരം മാത്രമേയുണ്ടാകൂ. ഇതിൽ തെറ്റുത്തരത്തിന് ആനുപാതികമായി മാർക്കു കുറയ്ക്കും. മറ്റു 2 രീതികളിൽ(മൾട്ടിപ്പിൾ സിലക്ട് / ന്യൂമെറിക്കൽ ആൻസർ)നെഗറ്റീവ് മാർക്കില്ല.
advertisement
അപേക്ഷാർത്ഥിയ്ക്ക്, ഒരു പേപ്പറോ രണ്ടു പേപ്പറോ ഇഷ്ടപ്രകാരമെഴുതാവുന്നതാണ്. രണ്ടെണ്ണം എഴുതുന്നുണ്ടെങ്കിൽ നിർദിഷ്ട കോംബിനേഷനുകളിൽനിന്നു മാത്രം തിരഞ്ഞെടുക്കണം. സ്പെഷൽ വിഷയത്തിനു ചേർന്ന പേപ്പർ തിരഞ്ഞെടുത്തതിനുശേഷം, അതിനോടുചേർത്ത് അനുവദിച്ചിട്ടുള്ള മറ്റു പേപ്പറുകളിലൊന്നും തെരഞ്ഞെടുക്കാം. കോംബിനേഷൻ ലിസ്റ്റ് സൈറ്റിൽ കിട്ടും.
കൂടുതൽ വിവരങ്ങൾക്കും അപേക്ഷാ സമർപ്പണത്തിനും
തയാറാക്കിയത്: ഡോ. ഡെയ്സൻ പാണേങ്ങാടൻ
(കഴിഞ്ഞ 15 വർഷക്കാലമായി ബിരുദ -ബിരുദാനന്തര തലങ്ങളിൽ അധ്യാപന രംഗത്തുള്ള ഡോ. ഡെയ്സൻ പാണേങ്ങാടന് എഞ്ചിനീയറിംഗ് കോളേജിലും അധ്യാപന പരിശീലന കേന്ദ്രങ്ങളിലും പഠിപ്പിച്ച അനുഭവസമ്പത്തുണ്ട്. 2013 മുതൽ തൃശ്ശൂർ സെന്റ് തോമസ് കോളേജിലെ ഫിസിക്സ് ഡിപ്പാർട്ടുമെന്റിൽ അസി.പ്രഫസർ. കരിയർ കൗൺസലിംഗും കരിയർ ഓറിയന്റേഷൻ ക്ലാസ്സുകളും സംസ്ഥാന തലത്തിൽ നടത്തുന്നു. (daisonpanengadan@gmail.com)
ഏറ്റവും പുതിയ ജോലി സാദ്ധ്യതകൾ, ബോർഡ് പരീക്ഷകൾ എല്ലാം അറിയാൻ News18 മലയാളത്തിനൊപ്പം വരൂ
Location :
Thiruvananthapuram,Thiruvananthapuram,Kerala
First Published :
July 30, 2024 12:52 PM IST
മലയാളം വാർത്തകൾ/ വാർത്ത/Career/
GATE 2025: പഠനം-ഗവേഷണം-ജോലി; സ്വപ്നങ്ങളുടെ ജാലകം തുറക്കുന്ന ഗേറ്റ് പരീക്ഷയ്ക്ക് ഇപ്പോൾ അപേക്ഷിക്കാം
