തായ്‌ലൻഡിൽ നിന്നും വിമാനം വഴി 23 കോടിയുടെ ഹൈഡ്രോ കഞ്ചാവ് കടത്തിയ 6 മലയാളി ഐടി ജീവനക്കാർ പിടിയിൽ

ആദ്യ വിമാനത്തിലെത്തിയ നാലംഗ സംഘത്തിന്റെ പെരുമാറ്റത്തിൽ സംശയം തോന്നിയ കസ്റ്റംസ് ഉദ്യോഗസ്ഥർ ഇവരെ തടഞ്ഞുവെച്ച് ചോദ്യം ചെയ്യുകയായിരുന്നു. ചോദ്യം ചെയ്യലിൽ പരസ്പരവിരുദ്ധമായ മറുപടികൾ നൽകിയതോടെ ഇവരുടെ ബാഗേജുകൾ വിശദമായി പരിശോധിച്ചു. ഭക്ഷണ പാക്കറ്റുകളിലും ചോക്ലേറ്റ് കവറുകളിലുമായി ഒളിപ്പിച്ച നിലയിൽ 15 കിലോ ഗ്രേഡ് ഹൈഡ്രോപോണിക് കഞ്ചാവാണ് ആദ്യ സംഘത്തിൽ നിന്ന് കണ്ടെത്തിയത്.

തുടർന്ന് ശനിയാഴ്ച പുലർച്ചെ തായ്‌ലൻഡിൽ നിന്നെത്തിയ രണ്ടാമത്തെ സംഘത്തിലെ രണ്ട് യുവാക്കളെ കൂടി പരിശോധിച്ചപ്പോൾ എട്ട് കിലോ കഞ്ചാവ് കൂടി പിടിച്ചെടുത്തു. ആറ് പ്രതികളെയും അറസ്റ്റ് ചെയ്ത് കോടതിയിൽ ഹാജരാക്കി. സാധാരണ കഞ്ചാവിനേക്കാൾ വീര്യം കൂടിയതും ലഹരി കൂടുതലുള്ളതുമായ ഇനമാണ് ഹൈഡ്രോപോണിക് കഞ്ചാവ്. കൃത്രിമ സാഹചര്യത്തിൽ വെളിച്ചവും വെള്ളവും ക്രമീകരിച്ചു വളർത്തുന്ന ഇവയ്ക്ക് അന്താരാഷ്ട്ര വിപണിയിൽ വൻ വിലയാണുള്ളത്.