'നിനക്കു വേണ്ടിയാണ് ഭാര്യയെ കൊന്നത്'; ബെംഗളൂരുവില്‍ അറസ്റ്റിലായ ഡോക്ടറുടെ ഞെട്ടിപ്പിക്കുന്ന കുറ്റസമ്മതം

ഭാര്യയെ അനസ്തീഷ്യ മരുന്ന് കുത്തിവെച്ച് കൊലപ്പെടുത്തിയ കേസിൽ അറസ്റ്റിലായ ഡോ. മഹേന്ദ്ര റെഡ്ഡി ജി.എസിന്റെ ഞെട്ടിപ്പിക്കുന്ന കുറ്റസമ്മതം പുറത്ത്. ഇയാൾ ബന്ധം പുലർത്തിയിരുന്ന നിരവധി സ്ത്രീകൾക്കയച്ച സന്ദേശത്തിലാണ് ഭാര്യയെ കൊലപ്പെടുത്തിയതാണെന്ന് പറഞ്ഞിരിക്കുന്നത്. ''നിനക്ക് വേണ്ടിയാണ് എന്റെ ഭാര്യയെ കൊന്നത്'' എന്ന സന്ദേശമാണ് പല സ്ത്രീകൾക്കായി ഇയാൾ അയച്ചിരിക്കുന്നത്. കഴിഞ്ഞ ഒരു വർഷത്തോളമായി താൻ ബന്ധം പുലർത്തിയിരുന്ന നാലോ അഞ്ചോ സ്ത്രീകൾക്കെങ്കിലും ഇയാൾ ഈ സന്ദേശം അയച്ചതായി ബെംഗളൂരു പോലീസ് പറഞ്ഞു. ഭാര്യയെ കൊലപ്പെടുത്തുന്നതിന് മാസങ്ങൾക്ക് മുമ്പ് ആരംഭിച്ച ഈ ബന്ധം മരണത്തിന് ശേഷവും തുടർന്നിരുന്നതായി ടൈംസ് ഓഫ് ഇന്ത്യയുടെ റിപ്പോർട്ടിൽ പറയുന്നു. ഇയാൾ സ്ത്രീകൾക്ക് നിരന്തരവും ഇടവിട്ടും സന്ദേശങ്ങൾ അയച്ചിരുന്നതായി റിപ്പോർട്ട് കൂട്ടിച്ചേർത്തു.