വൈക്കത്തപ്പന്റെ മുന്നിൽ സ്ക്രിപ്റ്റുമായി തരുൺ മൂർത്തിയും കൂട്ടരും; മോഹൻലാൽ ചിത്രത്തിന്റെ പുത്തൻ അപ്ഡേറ്റ്

'തുടരും' സിനിമയുടെ വിജയത്തിന് ശേഷം മോഹൻലാൽ - തരുൺ മൂർത്തി കൂട്ടുകെട്ട് വീണ്ടും ഒന്നിക്കുന്ന ചിത്രമാണിത്. ആഷിഖ് ഉസ്മാൻ പ്രൊഡക്ഷൻസിന്റെ നിർമാണ സംരംഭമാണിത്.

തന്റെ അടുത്ത ചിത്രം മോഹൻലാലിനോടൊപ്പം തന്നെയാകുമെന്ന് സംവിധായകൻ തരുൺ മൂർത്തി തന്നെ സൂചനകൾ നൽകിയിരുന്നു, അതിന് പിന്നാലെയാണ് പ്രേക്ഷകരെ ആവേശത്തിലാക്കി പുതിയ ചിത്രത്തിന്റെ പ്രഖ്യാപനം ഔദ്യോഗികമായി പുറത്തുവിട്ടത്. ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആദ്യമായി എത്തുന്ന മോഹൻലാൽ ചിത്രവും ഇതായിരിക്കും. ചിത്രത്തിന്റെ തിരക്കഥ ഒരുക്കുന്നത് രതീഷ് രവിയാണ്. 'തുടരും' ഉൾപ്പെടെ മോഹൻലാലിന്റെ സൂപ്പർഹിറ്റ് സിനിമകൾക്ക് ക്യാമറ ചലിപ്പിച്ച ഷാജി കുമാറാണ് ഛായാഗ്രഹണം നിർവഹിക്കുന്നത്.

തരുൺ മൂർത്തിയുടെ മൂന്നാം സംവിധാനസംരംഭമായ 'തുടരും' ബോക്സ് ഓഫീസിൽ 234−235 കോടി വാരിയ ചിത്രമാണ്. കേവലം 28 കോടി മുതൽമുടക്കിൽ നിർമിച്ച ചിത്രം മോഹൻലാൽ, ശോഭന, പ്രകാശ് വർമ്മ എന്നിവരുടെ പ്രകടനത്തിന്റെ പേരിൽ പ്രേക്ഷകരുടെ ഇടയിൽ ശ്രദ്ധനേടിയ ചിത്രമായിരുന്നു.

ഷൂട്ടിംഗ് പൂർത്തിയാക്കി പോസ്റ്റ് പ്രൊഡക്ഷൻ നടന്നുകൊണ്ടിരിക്കുന്ന ആഷിഖ് ഉസ്മാൻ ചിത്രമായ മോളിവുഡ് ടൈംസിനു ശേഷം വരുന്ന ചിത്രവും, ദൃശ്യം 3 ക്ക് ശേഷം ചിത്രീകരണം ആരംഭിക്കുന്ന മോഹൻലാൽ ചിത്രവും ഇതായിരിക്കും, കൂടുതൽ അപ്ഡേറ്റുകൾ ഔദ്യോഗികമായി പുറത്ത് വരും എന്ന് അണിയറപ്രവർത്തകർ.

നടൻ ഓസ്റ്റിൻ ഡാൻ തോമസ് ആദ്യമായി സംവിധാനം ചെയ്യുന്ന ചിത്രം എന്ന പേരിലാണ് 'L365' പ്രഖ്യാപിച്ചത്. 'തല്ലുമാല', 'വിജയ് സൂപ്പറും പൗർണമിയും' തുടങ്ങിയ സിനിമകളിലൂടെ നടനായും, അഞ്ചാംപാതിര സിനിമയുടെ ചീഫ് അസ്സോസിയേറ്റ് ഡയറക്ടറും ആയിരുന്നു ഡാൻ.