പൊതുസ്ഥലങ്ങളിൽ മദ്യപിച്ചതിന് അബുദാബിയിൽ മലയാളികൾ പിടിയിൽ

കഴിഞ്ഞ ദിവസം മുസഫ ഷാബിയ 12ൽ നടത്തിയ പരിശോധനയിലാണ് മലയാളികൾ ഉൾപ്പെടെ ഒട്ടേറെ വിദേശികൾ പിടിയിലാകുന്നത്. താമസസ്ഥലങ്ങൾക്ക് സമീപത്തുളള പൊതു സ്ഥലത്തിരുന്നു മദ്യപിച്ചതിനാണ് ഇവരെ പിടികൂടിയത്. പ്രതികളെ പ്രോസിക്യൂഷന് കൈമാറി. കോടതി വിധി അനുസരിച്ച് തടവോ പിഴയോ രണ്ടും ചേർത്തോ ശിക്ഷ ലഭിക്കും. വ്യക്തിഗത ആവശ്യത്തിനു മദ്യം വാങ്ങാൻ (മുസ്‌ലിം അല്ലാത്തവർക്ക്) യുഎഇയിൽ അനുമതിയുണ്ട്. താമസസ്ഥലത്തോ അംഗീകൃത ഹോട്ടലിലോ ടൂറിസം കേന്ദ്രങ്ങളിലോ മദ്യപിക്കാം. എന്നാൽ പൊതുസ്ഥലങ്ങളില്‍ ഇരുന്ന് മദ്യപിക്കരുതെന്നാണ് നിയമം.