ആറുമാസത്തിനു ശേഷം വിദ്യാര്‍ഥികള്‍ ക്ലാസ് മുറികളിലേക്ക്; ഷാർജയിലെ സ്കൂളുകൾ സെപ്റ്റംബർ 27ന് തുറക്കും

കോവിഡ് വ്യാപനത്തിന്‍റെ പശ്ചാത്തലത്തിൽ ഇക്കഴിഞ്ഞ മാർച്ചിലാണ് ഷാർജയിലെ സ്കൂളുകൾ അടച്ചത്. തുടർന്ന് ഓൺലൈൻ വഴി ക്ലാസുകൾ നടത്തി വരികയാണ്. യുഎഇയിലെ മറ്റ് ചില എമിറേറ്റുകളിൽ ആഗസ്റ്റ് 31ന് സ്കൂളുകൾ തുറന്നിരുന്നു. ഷാര്‍ജയിലും അന്നു തന്നെ തുറക്കുമെന്ന് അറിയിച്ചിരുന്നുവെങ്കിലും ഓൺലൈൻ ക്ലാസുകള്‍ കുറച്ചു നാൾ കൂടി തുടരാൻ തീരുമാനിക്കുകയായിരുന്നു. പിന്നീട് സെപ്റ്റംബർ 13ന് തുറക്കുമെന്ന് അറിയിച്ചിരുന്നുവെങ്കിലും വീണ്ടും രണ്ടാഴ്ച കൂടി നീട്ടുകയായിരുന്നു. ഷാര്‍ജയിലെ ആരോഗ്യസാഹചര്യം കണക്കിലെടുത്താണ് രണ്ട് തവണയും സ്കൂൾ തുറക്കൽ നീട്ടിയതെന്നാണ് SPEA അറിയിച്ചത്.

Also Read-ബുധനാഴ്ച മുതൽ എല്ലാ സർക്കാർ ജീവനക്കാരും ജോലിക്കെത്തണം; കൂടുതൽ ലോക് ഡൗൺ ഇളവുകൾ പ്രഖ്യാപിച്ച് സർക്കാർ

വിവിധ വകുപ്പുകളുടെ സഹകരണത്തോടെ SPEA അധികൃതർ സ്കൂളുകളിൽ നേരിട്ടെത്തി പരിശോധന നടത്തിയിരുന്നു. സ്കൂളുകളെല്ലാം തന്നെ കോവിഡ് പ്രതിരോധ മുൻകരുതലുകൾ സ്വീകരിച്ചു എന്ന് ഉറപ്പുവരുത്താനായിരുന്നു ഇത്. ഈ പരിശോധനകളെല്ലാം തൃപ്തികരമായി പൂർത്തിയായ സാഹചര്യത്തിലാണ് അടുത്തയാഴ്ച മുതൽ സ്കൂളുകൾ തുറക്കാൻ തീരുമാനിച്ചത്.

സ്കൂൾ ബസിലും കാമ്പസിൽ പ്രവേശിക്കുന്നതിനും മുമ്പും വിദ്യാർഥികളുടെ ശരീര ഊഷ്മാവ് പരിശോധിക്കും

ബസുകളിലും ക്ലാസ് മുറികളിൽ സാമൂഹിക അകലം ഉറപ്പാക്കും.

ആറ് വയസിൽ താഴെയുള്ള കുട്ടികൾ ഒഴികെ മറ്റുള്ള എല്ലാവർക്കും മാസ്ക് നിർബന്ധം

ഇടവേളകളിലായി അണുനശീകരണത്തിനുള്ള സംവിധാനം

കോവിഡ് സംശയിക്കുന്ന ആളുകളെ മാറ്റുന്നതിനായി ഐസലേഷൻ മുറി