തമിഴ്‌നാട് ബിജെപി പട്ടികയിൽ അണ്ണാമലൈ ഇല്ല; കന്യാകുമാരിയിലെ 6 മണ്ഡലങ്ങളിൽ 5 ഇടത്തും സ്ഥാനാർത്ഥികൾ താമരയിൽ

മഹിളാ മോർച്ചയുടെ ദേശീയ പ്രസിഡൻ്റും കോയമ്പത്തൂർ സൗത്ത് സിറ്റിങ് എംഎൽഎയുമായ വനതി ശ്രീനിവാസൻ കോയമ്പത്തൂർ (നോർത്ത്) നിന്ന് മത്സരിക്കും. കോയമ്പത്തൂർ സീറ്റുമായി ബന്ധപ്പെട്ട് ബിജെപിയിൽ രൂക്ഷമായ തർക്കം നടന്നിരുന്നു. മത്സരിക്കുമെങ്കിൽ കോയമ്പത്തൂരിൽ മാത്രമേ മത്സരിക്കൂ എന്ന് അണ്ണാമലൈ പ്രഖ്യാപിച്ചിരുന്നു. എന്നാൽ താൻ മത്സരിച്ച് ജയിച്ച മണ്ഡലം വിട്ടുകൊടുക്കാൻ വനതി ശ്രീനിവാസൻ തയ്യാറായിരുന്നില്ല. തർക്കം രൂക്ഷമായതോടെ കഴിഞ്ഞ ദിവസം പ്രധാനമന്ത്രി നരേന്ദ്ര മോദിയെ സ്വീകരിക്കാൻ അണ്ണാമലൈ എത്തിയിരുന്നില്ല. പാലക്കാട് പൊതുയോഗത്തിൽ പങ്കെടുക്കാൻ വന്ന മോദി കോയമ്പത്തൂർ വിമാനത്താവളത്തിൽ എത്തിയപ്പോൾ സ്വീകരിക്കേണ്ടവരുടെ പട്ടികയിൽ അണ്ണാമലൈയുടെ പേരുണ്ടായിരുന്നു. എന്നാൽ അദ്ദേഹം എത്തിയില്ല.

ബിജെപി സംസ്ഥാന അധ്യക്ഷൻ നൈനാർ നാഗേന്ദ്രൻ ആദ്യമായി സത്തൂർ മണ്ഡലത്തിലാണ് മത്സരിക്കുന്നത്. കോൺഗ്രസിൽ നിന്ന് അടുത്തിടെ പാർട്ടിയിൽ ചേർന്ന എസ് വിജയധരണി തൻ്റെ ശക്തികേന്ദ്രമായ വിളവൻകോട് മണ്ഡലത്തിൽ മത്സരിക്കും.

കന്യാകുമാരി ജില്ലയിലെ 6 മണ്ഡലങ്ങളിൽ 4 ഇടത്തും ബിജെപിയാണ് മത്സരിക്കുന്നത്. നാഗർകോവിൽ, കൊളച്ചൽ, പത്മനാഭപുരം, വിളവൻകോട് എന്നിവിടങ്ങളിലാണ് ബിജെപി മത്സരിക്കുന്നത്. കിള്ളിയൂർ മണ്ഡലത്തിൽ സഖ്യകക്ഷിയായ ടിഎംസി (എം ) സ്ഥാനാർത്ഥിയും ബിജെപി ചിഹ്നത്തിലാവും മത്സരിക്കുക. കന്യാകുമാരി മണ്ഡലത്തിൽ മാത്രമാണ് പ്രധാന കക്ഷിയായ അണ്ണാഡിഎംകെ മത്സരിക്കുക. ഇതിനെതിരെ പാർട്ടിയിലെ പ്രധാന നേതാക്കൾ രംഗത്തു വന്നിട്ടുണ്ട്.

2021 ൽ നാഗർകോവിൽ, വിളവൻകോട്, കൊളച്ചൽ എന്നിവിടങ്ങളിൽ മത്സരിച്ച ബിജെപി നാഗർകോവിലിൽ ജയിച്ചു. കന്യാകുമാരി, പത്മനാഭപുരം എന്നിവിടങ്ങളിൽ മത്സരിച്ച അണ്ണാഡിഎംകെ കന്യാകുമാരിയിൽ മാത്രം ജയിച്ചു.

തമിഴ്‌നാട്ടിൽ 2026 ഏപ്രിൽ 23 വ്യാഴാഴ്ചയാണ് വോട്ടെടുപ്പ്. ഫലം 2026 മെയ് 4 ന് പ്രഖ്യാപിക്കും.