'വിവാഹം ഹിന്ദു നിയമത്തിലെന്ന പോലെ ഇസ്ലാമിലും പവിത്രമാണ്': സ്വവർഗ വിവാഹത്തെ വീണ്ടും എതിർത്ത് കേന്ദ്രം

സ്വവർഗ വിവാഹം സംബന്ധിച്ച ചർച്ചകൾ കഴിഞ്ഞ കുറച്ച് കാലമായി രാജ്യത്ത് നടക്കുന്നുണ്ട്. ഇക്കാര്യത്തിൽ കേന്ദ്ര സർക്കാർ തുടക്കം മുതൽ സ്വവർഗ വിവാഹത്തെ എതിർക്കുന്ന നിലപാടാണ് സ്വീകരിച്ച് വരുന്നത്. വിവാഹത്തെ “പ്രത്യേകമായി വ്യത്യസ്തമായ ഒരു സ്ഥാപനം” എന്ന നിലയ്ക്ക് വേണം കാണാൻ എന്ന് പറയുന്ന കേന്ദ്രസർക്കാർ, സ്വവർഗ വിവാഹത്തിന് നിയമപരമായ അനുമതി നൽകുന്നതിനെ ഇപ്പോൾ വീണ്ടും എതിർത്തിരിക്കുകയാണ്. ഇപ്പോൾ നിലനിൽക്കുന്ന വിവാഹ സങ്കൽപ്പത്തിന് തുല്യമായി ഇതിനെ പരിഗണിക്കുന്നത് “എല്ലാ പൗരന്മാരുടെയുംതാൽപ്പര്യങ്ങളെ ഗുരുതരമായി ബാധിക്കുന്ന ” ഒന്നാണ് എന്ന നിലപാടാണ് സർക്കാർ സ്വീകരിച്ചിരിക്കുന്നത്. സ്വവർഗ വിവാഹങ്ങളെ ഒരു കോടതി ഉത്തരവിലൂടെ അംഗീകരിക്കുന്നത് കൊണ്ട് അർത്ഥമാക്കുന്നത് ഒരു നിയമത്തിന്റെ പൂർണ്ണമായ തിരുത്തിയെഴുത്താണ്. അത്തരത്തിലുള്ള “ഓമ്‌നിബസ് ഓർഡറുകൾ” പാസാക്കുന്നതിൽ നിന്ന് കോടതി വിട്ടുനിൽക്കണമെന്ന് സർക്കാർ വാദിച്ചു.