Assembly Election Results | കണക്ക് തീർത്ത് ക്യാപ്റ്റനും സ്വയം തോറ്റെങ്കിലും കരുത്ത് തെളിയിച്ച് ദീദിയും

2016ൽ നിന്ന് 2021ൽ എത്തുമ്പോൾ രാഷ്ട്രീയ പ്രതിയോഗികളെ മാത്രമായിരുന്നില്ല  പിണറായിക്ക് നേരിടേണ്ടി വന്നത്. ശബരിമല വിഷയം രാഷ്ട്രീയ ആയുധമായി തിരിച്ചു വന്നു. പുതിയ ആയുധമായി സ്വർണക്കടത്തും അതിന്റെ പേരിലെ അന്വേഷണവും വന്നു. ശബരിമല അയ്യപ്പനെ തിരഞ്ഞെടുപ്പ് രാഷ്ട്രീയത്തിലിറക്കാൻ കോൺഗ്രസ് ബിജെപിയോട് മത്സരിച്ചു. ആ മത്സരത്തിനിടയിൽ ഇരുപാർട്ടികളും ജനഹിതം മനസിലാക്കാതെ പോയി. ദേവസ്വം മന്ത്രിക്കെതിരെയുള്ള പോരാട്ടത്തിൽ പോലും അയ്യപ്പൻ കൂടെ നിന്നില്ല. കടകംപളളി സുരേന്ദ്രൻ ഭൂരിപക്ഷം ഇരട്ടിയിലധികം വർധിപ്പിച്ചു.

കേരളത്തിൽ അന്വേഷണ ഏജൻസികളിലൂടെയാണ് കേന്ദ്ര ഇടപെടലുണ്ടായതെങ്കിൽ ബംഗാളിൽ നേരിട്ടായിരുന്നു. അമിത് ഷാ തന്നെ ബംഗാളിലെ തന്ത്രങ്ങൾക്ക് നേതൃത്വം നൽകി.  കേന്ദ്ര അന്വേഷണ ഏജൻസികളെ ഒഴിവാക്കിയത് ഔദാര്യമൊന്നുമായിരുന്നില്ല. മമതയ്ക്കെതിരെ മാത്രം അന്വേഷണം നില‍്ക്കില്ല എന്നത് കൊണ്ടു കൂടിയാണ്. മമതയക്കെതിരെ ഉയർന്ന ശാരദ കുംഭകോണം ഉൾപ്പടെയുള്ള ആരോപണങ്ങളിൽ അന്വേഷണം നടക്കുന്നുണ്ടെങ്കിലും അത്  തിരഞ്ഞെടുപ്പിൽ ചർച്ചയേ ആയില്ല. അതിന് കാരണവുമുണ്ട്. മമതയ്ക്കൊപ്പം പ്രതിപട്ടികയിലുള്ള  ഭൂരിപക്ഷം പേരും ഇപ്പോൾ ബിജെപിക്കൊപ്പമാണ്. അവരാണ് ഇപ്പോൾ ബംഗാളിൽ ബിജെപിയെ നയിക്കുന്നതും. അതുകൊണ്ട് തന്നെ അന്വേഷണം നടന്നാൽ അത് സ്വന്തം പാളയത്തിലുമെത്തുമെന്ന തിരിച്ചറിവ് തന്നെ കാരണം.

തിരഞ്ഞെടുപ്പിന് തൊട്ടു മുമ്പ് വരെ സർക്കാരിന്റെയും മുഖ്യമന്ത്രിയുടേയും  പ്രവർത്തനങ്ങളെ വിമർശിച്ച കോൺഗ്രസ് തിരഞ്ഞെടുപ്പ് പ്രഖ്യാപിച്ചതിന് പിന്നാലെ അയ്യപ്പനെ കൂട്ടുപിടിച്ചു. അയ്യപ്പനെ സ്വന്തമാക്കാൻ ബിജെപിയുമായി മത്സരിച്ചു. കോവിഡ് കാലത്ത് അന്നം മുട്ടിക്കാൻ ഇറങ്ങിയവരെന്ന  പഴികേൾപ്പിച്ചു. സർക്കാരിനെതിരെ പ്രതിപക്ഷ നേതാവ് പറയുന്നത് ഏറ്റുപിടിക്കാൻ ആളില്ലാത്ത പാർട്ടിയായി കോൺഗ്രസ്. പാർട്ടി പ്രസിഡണ്ടും നേതാക്കളും പലവഴിക്ക് പട നയിച്ചു. തിരഞ്ഞെടുപ്പ് പ്രഖ്യാപിക്കുന്നതിന് മുമ്പേ മുഖ്യമന്ത്രിയാകാനായിരുന്നു നേതാക്കൾ കളമൊരുക്കിയത്. ഇങ്ങനെ ഇരിക്കാൻ കിട്ടിയ കൊമ്പ് മുറിച്ച് അതിനടിയിൽ പെട്ട് ശ്വാസംമുട്ടുകയാണ് കോൺഗ്രസ്. കെ.പി.സി.സി പ്രസിഡണ്ടിനും നേതാക്കൾക്കുമെതിരെ വിമർശനമുയരും. ഒരുപക്ഷെ ചില ചെറു ചലനങ്ങളുണ്ടാകും. അതിനപ്പുറത്ത് കടുത്തതൊന്നും പ്രതീക്ഷിക്കുന്നില്ല. പക്ഷെ ബിജെപിയിൽ അതാകില്ല സ്ഥിതി. കണക്കും ഉത്തരവും പറയേണ്ടി വരും.  പ്രത്യേകിച്ച് സിറ്റിങ് സീറ്റിലേയും പാലക്കാട്ടേയും പരാജയത്തെ കുറിച്ച്. അവസാനിപ്പിക്കുന്നതിന് മുമ്പ് ഒരു ബംഗാൾ വിശേഷം കൂടി. ഒന്നിച്ച് മത്സരിച്ചിട്ടും ഒരു സീറ്റ് പോലും നേടാൻ കോൺഗ്രസിനോ സിപിഎമ്മിനോ കഴിഞ്ഞില്ല. അതും മറക്കണ്ട.