Dharmendra | ധർമേന്ദ്രയുടെ മരണശേഷവും ഹേമമാലിനിയും മക്കളും പ്രത്യേകം; പ്രാർത്ഥനാ ചടങ്ങ് ചർച്ചയാവുമ്പോൾ

മരണംവരെയും രണ്ടുകുടുംബങ്ങളുടെ നാഥനായിരുന്നു ധർമേന്ദ്ര (Dharmendra). ആദ്യഭാര്യ പ്രകാശ് കൗറുമായുള്ള ബന്ധം നിലനിൽക്കെ അവരുടെ അനുവാദത്തോടെ അദ്ദേഹം നടി ഹേമമാലിനിയെ (Hemamalini) ജീവിതത്തിലേക്ക് ക്ഷണിച്ചു. എന്നാൽ, ഒരിക്കലും ഈ രണ്ടു കുടുംബങ്ങളും ഒന്നിച്ചു ജീവിച്ചിട്ടില്ല. ജീവിതത്തിൽ ഒരേയൊരു തവണ മാത്രമേ ഹേമമാലിനി ധർമേന്ദ്രയുടെ ആദ്യഭാര്യയെ നേരിൽക്കണ്ടിട്ടുള്ളൂ. അതും വിവാഹത്തിന് മുൻപ്. അതിനുശേഷം രണ്ട് കുടുംബങ്ങളും പരസ്പരം ഇടപെടാതെയുള്ള ജീവിതം നയിച്ച് പോരുകയായിരുന്നു. ഒരുപക്ഷേ ആശുപത്രി കിടക്കയിലായിരുന്ന സമയം മാത്രമാണ് ഡിയോൾമാർക്കൊപ്പം ഹേമമാലിനിയും മക്കളും വന്നുചേരുന്നത്. അദ്ദേഹത്തിന്റെ മരണത്തിനു ശേഷം ആ അകൽച്ച അതുപോലെ തുടർന്നു എന്ന സൂചന ചർച്ചയാവുകയാണ് 

മുംബൈയിലെ പ്രശസ്തമായ ബ്രീച്ച് കാൻഡി ആശുപത്രിയിലാണ് ധർമേന്ദ്ര അവസാനകാലം ചികിത്സയിൽ കഴിഞ്ഞത്. അതിതീവ്ര ശ്വാസതടസം നേരിട്ടിരുന്ന അദ്ദേഹം വെന്റിലേറ്റർ സഹായത്തിൽ ചികിത്സ തുടർന്നു. ഇതിനിടെ കുടുംബത്തിന്റെ അനുമതിയില്ലാതെ ആശുപത്രി മുറിയിലെ ഒരു വീഡിയോ ദൃശ്യം പുറത്തുവന്നിരുന്നു. ഇതിൽ ഡിയോൾ പുത്രന്മാർക്കൊപ്പം ഹേമയും ഒരു മകളും ഉള്ളതായി കണ്ടിരുന്നു. പലപ്പോഴും, ഹേമ മറ്റൊരു കാറിലും സണ്ണി ബോബിമാർ അവരുടെ വാഹനത്തിലും ആശുപത്രിയിൽ വന്ന ദൃശ്യങ്ങൾ പ്രചരിച്ചിരുന്നു (തുടർന്നു വായിക്കുക)

ചികിത്സയ്ക്ക് ശേഷം വീട്ടിലേക്ക് മടങ്ങിയ ധർമേന്ദ്ര ഏതാനും ദിവസങ്ങൾക്കുള്ളിൽ വിടവാങ്ങി. പ്രധാന താരങ്ങൾ പോലും നേരിട്ട് ശ്മാശാനത്തിലേക്ക് വരുന്ന കാഴ്ചയാണ് മുംബൈ നഗരം കണ്ടത്. ഹേമമാലിനിയും അങ്ങനെ തന്നെ. മരണശേഷം ഉത്തരേന്ത്യയിൽ പ്രാർത്ഥനാ ചടങ്ങ് നടത്തുന്ന പതിവുണ്ട്. ധർമേന്ദ്രയുടെ കാര്യത്തിലും മക്കൾ ഈ പതിവ് തെറ്റിച്ചില്ല. പക്ഷെ ഹേമമാലിനിയും മക്കളും എവിടെ എന്ന ചോദ്യം മാത്രം ഉത്തരം കിട്ടാതെ ബാക്കിയായി. സണ്ണി, ബോബി ഡിയോൾമാർ അതിഥികളെ കൈകൂപ്പി സ്വീകരിക്കുന്ന ചിത്രങ്ങളും ദൃശ്യങ്ങളും വൈറലായി

വാസ്തവമെന്തെന്നാൽ, സണ്ണി ഡിയോൾ, ബോബി ഡിയോൾ എന്നിവരും സഹോദരിമാരും അവരുടെ അമ്മ പ്രകാശ് കൗറും ചേർന്ന് നടത്തിയ പ്രാർത്ഥനാ സമ്മേളനത്തിൽ ഹേമമാലിനിയും മക്കളും പങ്കുകൊണ്ടില്ല. പണ്ടുമുതലേ നിലനിന്ന ആ വിടവ് അവർ ധർമേന്ദ്രയുടെ മരണശേഷവും അതുപോലെ നിലനിർത്തി. പ്രകാശ് കൗറും ഹേമമാലിനിയും ഭർത്താവിന്റെ മരണശേഷവും മുഖാമുഖം വന്നില്ല. നവംബർ 27ന് താജ് ലാൻഡ്‌സ് എൻഡിൽ വച്ചാണ് പ്രകാശ് കൗറും മക്കളും ചേർന്ന് നടത്തിയ പ്രാർത്ഥനാ സമ്മേളനം നടന്നത്

ഇവിടെയാണ് ഹേമമാലിനി, മക്കളായ ഇഷ ഡിയോൾ, അഹാന ഡിയോൾ എന്നിവരെ കണ്ടില്ല എന്ന് പലരും ശ്രദ്ധിച്ചത്. ഈ ചടങ്ങിൽ ഹേമയും മക്കളും പങ്കെടുത്തില്ല. ഇതേദിവസം തന്നെ ഹേമമാലിനിയുടെ വീട്ടിൽ നിന്നുള്ള ഒരു ചിത്രവും പുറത്തുവന്നു. അവരുടെ മുംബൈ വസതിയിൽ ഉപമുഖ്യമന്ത്രി അജിത്ത് പവാർ നേരിട്ടെത്തി അനുശോചനം അറിയിച്ചിരുന്നു. ലളിതമായ ഒരു വെള്ള സ്യൂട്ട് ധരിച്ചുനിന്ന ഹേമമാലിനിയുടെ മുഖത്തു തളംകെട്ടി നിന്ന ദുഃഖം ചിത്രം പുറത്തുവന്നതും പലരും ശ്രദ്ധിച്ചു

വമ്പൻ താരങ്ങൾ ആരും ഇല്ലായിരുന്നു എങ്കിലും, ലളിതമായ ഒരു പ്രാർത്ഥനാ സമ്മേളനം ഹേമമാലിനി അവരുടെ വീട്ടിലും സംഘടിപ്പിച്ചിരുന്നു. ഹേമമാലിനിയുടെ വീടിനു പുറത്ത് രണ്ട് പൂജാരികളെ കണ്ടതായും റിപോർട്ടുണ്ട്. മഹിമ ചൗധരി, സുനിത അഹൂജ, യഷ്‌വർധൻ അഹൂജ തുടങ്ങിയവർ ഹേമമാലിനിയുടെ വീട്ടിലെത്തി. രണ്ട് കുടുംബങ്ങളിലും പ്രാർത്ഥനാ സമ്മേളനം നടന്നു എന്നതിന് തെളിവായി മാറി ഈ ചടങ്ങുകൾ. ഹേമമാലിനി സംഘടിപ്പിച്ച ചടങ്ങിൽ അവരുടെ കസിൻ കൂടിയായ നടി മധു അതിഥിയായിരുന്നു. ഹേമ മാലിനി ഭജന സന്ധ്യ ആയിരുന്നു സംഘടിപ്പിച്ചത് എന്ന് വിവരമുണ്ട്