RSS 100 years: 'ഇന്ത്യയിൽ താമസിക്കുന്ന എല്ലാവരും ഹിന്ദുക്കൾ': നാല് തരം ഹിന്ദുക്കളെക്കുറിച്ച് മോഹൻ ഭാഗവത്

Published by:Nandu Krishnan
news18-malayalam

Last Updated:Feb 08, 2026 2:22 PM IST

മുസ്ലീങ്ങളും ക്രിസ്ത്യാനികളും രാജ്യത്തിന്റെ അവിഭാജ്യ ഘടകമാണെന്നും മോഹൻ ഭാഗവത്

ഇന്ത്യയിൽ താമസിക്കുന്ന എല്ലാവരും ഹിന്ദുക്കളാണെന്ന് ആർഎസ്എസ് മേധാവി മോഹൻ ഭാഗവത്. ഹിന്ദു എന്നത് ഒരു മതപരമായ വ്യക്തിത്വമല്ലെന്നും മറിച്ച് രാജ്യത്തിന്റെ നാഗരികമായ സത്തയെയാണ് അത് പ്രതിഫലിപ്പിക്കുന്നതെന്നും അദ്ദേഹം വ്യക്തമാക്കി. ഹിന്ദു എന്നത് ഒരു നാമമല്ലെന്നും ഇന്ത്യയുടെ സാംസ്കാരിക സ്വഭാവത്തെ വിവരിക്കുന്ന ഒരു വിശേഷണമാണെന്നും മോഹൻ ഭാഗവവത് പറഞ്ഞു. 'സംഘയാത്രയുടെ 100 വർഷങ്ങൾ' എന്ന പരിപാടിയിൽ സംസാരിക്കുകയായിരുന്നു അദ്ദേഹം. നിങ്ങൾ ഇന്ത്യക്കാരനാണെങ്കിൽ ഈ സ്വഭാവം നിങ്ങളിൽ അന്തർലീനമാണ്. മുസ്ലീങ്ങളും ക്രിസ്ത്യാനികളും രാജ്യത്തിന്റെ അവിഭാജ്യ ഘടകമാണെന്ന് അഭിപ്രായപ്പെട്ട മോഹൻ ഭാഗവത് ഇന്ത്യയുടെ ആഗോള നേതൃത്വം രൂപപ്പെടുന്നത് വെറും വാചകക്കസർത്തിലൂടെയല്ല മറിച്ച് മാതൃകകളിലൂടെയായിരിക്കുമെന്നും പറഞ്ഞു.

രാജ്യത്തെ ഹിന്ദുക്കളെ അദ്ദേഹം നാല് വിഭാഗങ്ങളായി തരംതിരിച്ചു. തങ്ങളുടെ ഹിന്ദു ഐഡന്റിറ്റി അഭിമാനപൂർവ്വം പരസ്യമായി പ്രഖ്യാപിക്കുന്നവരാണ് ഒന്നാമത്തെ വിഭാഗം. തങ്ങൾ ഹിന്ദുവാണെന്ന് സമ്മതിക്കുന്നവരും എന്നാൽ അതിൽ പ്രത്യേകിച്ച് ഒന്നും കാണാത്തവരുമാണ് രണ്ടാമത്തെ കൂട്ടർ. സ്വന്തം വ്യക്തിത്വത്തെക്കുറിച്ച് രഹസ്യമായി മാത്രം സംസാരിക്കാൻ ഇഷ്ടപ്പെടുന്നവരാണ് മൂന്നാം വിഭാഗമെങ്കിൽ, സ്വന്തം ഹിന്ദു ഐഡന്റിറ്റി മറന്നുപോയവരോ അല്ലെങ്കിൽ അത് മറക്കാൻ നിർബന്ധിതരായവരോ ആണ് നാലാമത്തെ വിഭാഗമെന്ന് അദ്ദേഹം വിവരിച്ചു.

ഇന്ത്യാ വിഭജനത്തെ "ഹിന്ദു ഭാവത്തിന്റെ" അല്ലെങ്കിൽ ഹിന്ദു വികാരത്തിന്റെ തകർച്ചയുമായാണ് ആർഎസ്എസ് മേധാവി ബന്ധിപ്പിച്ചത്. മതാടിസ്ഥാനത്തിലാണ് വിഭജനം നടന്നതെന്നും എന്നാൽ നമ്മൾ ഹിന്ദുക്കളായതിനാൽ എല്ലാ മതങ്ങളെയും ബഹുമാനിക്കുന്നുവെന്നും അദ്ദേഹം പറഞ്ഞു. വ്യത്യാസങ്ങളും ഇടയ്ക്കിടെയുള്ള സംഘർഷങ്ങളും നിലനിൽക്കുമ്പോഴും ഇന്ത്യ ഏകീകൃതമായി തുടരുന്നത് ഇവിടുത്തെ നാഗരിക മൂല്യങ്ങൾ കാരണമാണെന്നും അദ്ദേഹം കൂട്ടിച്ചേർത്തു.

ഹിന്ദുത്വം സ്വീകരിക്കുന്നതിലൂടെ ആരും തങ്ങളുടെ വിശ്വാസമോ ഭാഷയോ ആചാരങ്ങളോ ഉപേക്ഷിക്കേണ്ടതില്ലെന്ന് ഭാഗവത് പറഞ്ഞു. ഹിന്ദുത്വം അംഗീകരിക്കുന്നതിലൂടെ നിങ്ങൾക്ക് ഒന്നും നഷ്ടപ്പെടാനില്ലെന്നും അത് സുരക്ഷിതത്വത്തിന്റെ ഉറപ്പാണെന്നും അദ്ദേഹം പറഞ്ഞു. ആളുകൾക്ക് വിശ്വാസത്തിലോ ഭക്ഷണരീതിയിലോ ഭാഷയിലോ വ്യത്യാസമുണ്ടാകാമെങ്കിലും ഒരു സമൂഹമെന്ന നിലയിലും രാഷ്ട്രമെന്ന നിലയിലും അവർ ഒന്നാണെന്ന് അദ്ദേഹം കൂട്ടിച്ചേർത്തു. നമ്മൾ ഇതിനെ ഹിന്ദുത്വമെന്ന് വിളിക്കുന്നു, നിങ്ങൾക്ക് ഇതിനെ ഭാരതീയത എന്ന് വിളിക്കാമെന്നും അദ്ദേഹം പറഞ്ഞു. ഐക്യം എന്നത് വിഭജിക്കുന്നതിനെ മുൻകൂട്ടി കാണുന്നതായതുകൊണ്ട് "ഹിന്ദു-മുസ്ലിം ഐക്യം" എന്ന പ്രയോഗം തെറ്റിദ്ധരിപ്പിക്കുന്നതാണെന്നും അദ്ദേഹം പറഞ്ഞു.

പ്രചരണങ്ങളിലൂടെയല്ല, നേരിട്ടുള്ള സംവാദങ്ങളിലൂടെയാണ് ആർഎസ്എസിനെ മനസ്സിലാക്കേണ്ടതെന്ന് ഭാഗവത് പറഞ്ഞു. വസ്തുതകളുടെ അടിസ്ഥാനത്തിലാണ് എതിർപ്പെങ്കിൽ ഞങ്ങൾ അത് തിരുത്തും, എന്നാൽ വസ്തുതകൾ അറിയാൻ നിങ്ങൾ ഞങ്ങളുടെ അടുത്തേക്ക് വരണമെന്നും അദ്ദേഹം പറഞ്ഞു. യുവാക്കൾക്കിടയിലെ മയക്കുമരുന്ന് ഉപയോഗവും ആത്മഹത്യയും പോലുള്ള പ്രശ്നങ്ങൾ തടയാൻ കുടുംബങ്ങൾക്കുള്ളിലെ സംഭാഷണങ്ങൾ പ്രധാനമാണെന്ന് അദ്ദേഹം ചൂണ്ടിക്കാട്ടി.

മുംബൈയിലെ വോർളി നെഹ്‌റു സെന്ററിൽ നടന്ന ചടങ്ങിൽ നടൻ സൽമാൻ ഖാൻ, സംവിധായകൻ സുഭാഷ് ഘായ്, ഗാനരചയിതാവ് പ്രസൂൺ ജോഷി തുടങ്ങി നിരവധി പ്രമുഖർ പങ്കെടുത്തു. ആർഎസ്എസിന്റെ പരിണാമം, സമൂഹത്തിലെ പങ്ക്, ഭാവിയിലേക്കുള്ള കാഴ്ചപ്പാട് എന്നിവ പ്രതിഫലിപ്പിക്കാൻ ലക്ഷ്യമിട്ടുള്ള 'സംഘയാത്രയുടെ 100 വർഷങ്ങൾ: പുതിയ ചക്രവാളങ്ങൾ' എന്ന ശതാബ്ദി പരിപാടിയുടെ ഭാഗമായാണ് പ്രഭാഷണം സംഘടിപ്പിച്ചത്.