ചൈനീസ് സൈന്യം ഇന്ത്യയിലേക്ക് നുഴഞ്ഞ് കയറിയത് സ്വർണത്തേക്കാൾ വിലയുള്ള ഔഷധം ശേഖരിക്കാനോ? എന്താണ് കോർഡിസെപ്സ്?

കോർഡിസെപ്‌സ് സിനെൻസിസ് എന്ന ശാസ്ത്രീയ നാമത്തിൽ അറിയപ്പെടുന്ന ഈ ഔഷധച്ചെടി നിശാശലഭങ്ങളുടെ ലാർവക്കുള്ളിലാണ് വളരുന്നത്. കോർഡിസെപ്‌സ് എന്ന പേരിന്റെ ഉത്ഭവം ലാറ്റിൻ ഭാഷയിൽ നിന്നാണ്. തവിട്ട് നിറമുള്ള ഈ സസ്യത്തിന് രണ്ട് ഇഞ്ച് വരെ നീളമുണ്ടാകും. ഏകദേശം 300 മുതൽ 500 മില്ലിഗ്രാം വരെ ഇവയ്ക്ക് ഭാരമുണ്ടാകും.

ഇന്ത്യയിലെ ഹിമാലയൻ ഭൂപ്രദേശങ്ങളിലും തെക്കുപടിഞ്ഞാറൻ ചൈനയിലെ ക്വിങ്ഹായ്-ടിബറ്റൻ പീഠഭൂമിയുടെ ഉയർന്ന പ്രദേശങ്ങളിലുമാണ് കോർഡിസെപ്സ് പ്രധാനമായും കാണപ്പെടുന്നത്. ഇന്ത്യയുടെ മറ്റ് ചില ഉയർന്ന ഭാഗങ്ങളിലും നേപ്പാളിലും ഭൂട്ടാനിലും ഇത് കാണാം. നേപ്പാളിലും ടിബറ്റിലും ഈ ഔഷധ സസ്യത്തെ യാർട്ട്സ ഗുൻബു എന്നാണ് വിളിക്കുന്നത്. ഉത്തരാഖണ്ഡിൽ ഇത് ശീതകാല പുഴു, കീഡ ജഡി എന്നീ പേരുകളിലും അറിയപ്പെടുന്നു.

ഈ സസ്യത്തിന്റെ ആരോഗ്യ ഗുണങ്ങൾ കാരണമാണ് ഇതിന് ഇത്രയേറെ വിലയുള്ളത്. ചൈനയിൽ, ക്ഷീണം, വൃക്കരോഗങ്ങൾ എന്നിവയുടെ ചികിത്സയ്ക്കായും മനുഷ്യന്റെ ലൈംഗിക സംതൃപ്തിക്കുവേണ്ടിയും ഇത് ഉപയോ​ഗിക്കുന്നു. സിക്കിമിലെ പരമ്പരാഗത വൈദ്യന്മാരും നാട്ടുകാരും 21 വ്യത്യസ്ത രോഗങ്ങൾക്ക് മരുന്നായി ഈ ഔഷധ സസ്യം നിർദ്ദേശിച്ചിട്ടുണ്ട്. ഇത് പ്രതിരോധശേഷി വർദ്ധിപ്പിക്കുമെന്നും ഹൃദയാരോഗ്യം സംരക്ഷിക്കുമെന്നും മെഡിക്കൽ ജേണലായ ‘വെരി വെൽ ഹെൽത്ത്’ പറയുന്നു. ടൈപ്പ് 2 പ്രമേഹമുള്ളവരിൽ രക്തത്തിലെ പഞ്ചസാരയുടെ അളവ് കുറക്കാനും ആ ഔഷധം നിർദേശിക്കുന്നു. ഈ ഔഷധ സസ്യത്തിലെ ബയോ ആക്ടീവ് തന്മാത്രയായ കോർഡിസെപിന് ചികിൽസാ രംഗത്ത് വലിയ സാധ്യതകൾ ഉണ്ടെന്നും ഭാവിയിൽ ഇത് ക്യാൻസർ ചികിൽസക്കു പോലും ഉപയോ​ഗിച്ചേക്കാമെന്നും ശാസ്ത്രജ്ഞരിൽ ചിലർ പറയുന്നു.

ചൈനയിൽ ഈ ഔഷധ സസ്യത്തിന് ആവശ്യക്കാരേറെയാണ്. അന്താരാഷ്ട്ര വിപണിയിൽ ഒരു കിലോഗ്രാം കോർഡിസെപ്സിന് 65 ലക്ഷം രൂപയാണ് വില. അതായത് ഈ ഔഷധ സസ്യം സ്വർണത്തേക്കാളും വജ്രത്തേക്കാളും മൂല്യമേറിയതാണ്. 2022-ൽ 1,072.50 മില്യൺ ഡോളറായിരുന്നു കോർഡിസെപ്‌സ് വിപണിയുടെ മൂല്യം.