INDI സഖ്യം പൊട്ടിത്തെറിയിലേക്കോ? അഖിലേഷ്യ യാദവ് നയിക്കണമെന്ന് സമാജ് വാദി പാർ‌ട്ടി; മുന്നണി 'ഫിനിഷാ'യെന്ന് BJP

സമാജ്‌വാദി പാർട്ടിയാണ് നേതൃമാറ്റത്തിനായി ഏറ്റവും ശക്തമായി വാദിക്കുന്നത്. അഖിലേഷ് യാദവിന്റെ ത്യാഗമനോഭാവവും സംഘാടകശക്തിയും മുൻനിർത്തി അദ്ദേഹം സഖ്യത്തിന്റെ നേതാവാകണമെന്ന് അവർ ആവശ്യപ്പെടുന്നു.

2027ലെ തിരഞ്ഞെടുപ്പിൽ ബിജെപിയെ ഒറ്റയ്ക്ക് പരാജയപ്പെടുത്താൻ എസ്പിക്ക് ശേഷിയുണ്ടെന്നും, എന്നാൽ ബിജെപി വിരുദ്ധ വോട്ടുകൾ ഭിന്നിക്കാതിരിക്കാനാണ് ഒരുമിച്ച് നിൽക്കുന്നതെന്നും മെഹ്റോത്ര വ്യക്തമാക്കി. അഖിലേഷ് യാദവാണ് സഖ്യത്തിന്റെ യഥാർത്ഥ നേതാവെന്ന് എസ്പി വക്താവ് ഫക്രുൽ ഹസൻ ച‌ന്ദും അഭിപ്രായപ്പെട്ടു.

മുന്നണിയിലെ ഭിന്നതകൾക്കിടയിൽ പരിഹാസവുമായി ആം ആദ്മി പാർട്ടിയും (എഎപി) രംഗത്തെത്തി. "തിരഞ്ഞെടുപ്പ് പ്രചാരണത്തിനിടെ ആരും വിനോദയാത്രയ്ക്ക് പോകാൻ പാടില്ലായിരുന്നു," എന്നായിരുന്നു ആരുടെയും പേരെടുത്ത് പറയാതെയുള്ള വിമർശനം. ബിഹാർ പ്രചാരണം നടക്കുന്നതിനിടെ നവംബർ 10-ന് മധ്യപ്രദേശിലെ സത്പുര കടുവാ സങ്കേതത്തിൽ രാഹുൽ ഗാന്ധി സന്ദർശനം നടത്തിയതിനെയാണ് എഎപി ഉന്നമിട്ടത്. തങ്ങൾ ഇപ്പോൾ സഖ്യത്തിന്റെ ഭാഗമല്ലെന്നും എഎപി വ്യക്തമാക്കി (ജൂലൈയിൽ പാർട്ടി സഖ്യം വിട്ടിരുന്നു).

മുന്നണിയിലെ അസ്വാരസ്യങ്ങൾ മുതലെടുത്ത് ബിജെപിയും രംഗത്തെത്തി. INDI സഖ്യം ഫലത്തിൽ തകർന്നുകഴിഞ്ഞുവെന്ന് ബിജെപി വക്താവ് പ്രദീപ് ഭണ്ഡാരി എക്‌സിൽ കുറിച്ചു. പ്രതിപക്ഷ നേതാക്കൾ ഒടുവിൽ രാഹുൽ ഗാന്ധിയുടെ നേതൃത്വത്തെ ചോദ്യം ചെയ്യുമെന്ന് പ്രധാനമന്ത്രി നരേന്ദ്ര മോദി നേരത്തെ പ്രവചിച്ചിരുന്നതായും അദ്ദേഹം ഓർമ്മിപ്പിച്ചു. രാഹുൽ ഗാന്ധിയെ പ്രതിപക്ഷം തള്ളിക്കളഞ്ഞതായും കോൺഗ്രസ് രണ്ടായി പിളരാൻ പോകുന്നതിന്റെ സൂചനയാണിതെന്നും അദ്ദേഹം പരിഹസിച്ചു.

വിമർശനങ്ങൾക്കിടയിലും മുന്നണിയിൽ ഐക്യമുണ്ടെന്ന് വരുത്തിത്തീർക്കാനാണ് കോൺഗ്രസ് ശ്രമിക്കുന്നത്. "INDI സഖ്യത്തിൽ എല്ലാവരും നേതൃസ്ഥാനത്താണ്, ഞങ്ങൾ ഒറ്റക്കെട്ടാണ്," എന്ന് കോൺഗ്രസ് വക്താവ് സുരേന്ദ്ര രജ്പുത് പറഞ്ഞു. എൻഡിഎയിൽ എല്ലാ തീരുമാനങ്ങളും ബിജെപിയാണ് എടുക്കുന്നതെന്നും എന്നാൽ തങ്ങളുടേത് കൂട്ടായ തീരുമാനങ്ങളാണെന്നും അദ്ദേഹം വാദിച്ചു.