അമൃത എക്‌സ്പ്രസ് ഇനി രാമേശ്വരത്തേക്ക്; സർവീസ് ഒക്ടോബർ 16 മുതൽ

ഒക്ടോബർ 16 മുതല്‍ രാത്രി 8.30ന് തിരുവനന്തപുരത്ത് നിന്ന് പുറപ്പെടുന്ന 16343 തിരുവനന്തപുരം – മധുര അമൃത എക്‌സ്പ്രസ് പിറ്റേന്ന് ഉച്ചയ്‌ക്ക് 12.45ന് രാമേശ്വരത്ത് എത്തും. ഒക്ടോബർ 17 മുതല്‍ രാമേശ്വരത്ത് നിന്നും തിരികെ ഉച്ചയ്‌ക്ക് 1.30ന് പുറപ്പെടുന്ന 16344 ട്രെയിന്‍ പിറ്റേന്ന് രാവിലെ 4.55ന് തിരുവനന്തപുരത്ത് എത്തിച്ചേരും.

തിരുവനന്തപുരത്ത് നിന്നും പുറപ്പെടുന്ന 16343 അമൃത പിറ്റേന്ന് പുലർച്ചെ 3 30ന് പാലക്കാട് ജംഗ്ഷനിലും രാവിലെ 6 മണിക്ക് പഴനിയിലും 9.50 ന് മധുരയിലും എത്തിച്ചേരും.

രാമേശ്വരത്ത് നിന്ന് പുറപ്പെടുന്ന 16344 അമൃത എക്സ്പ്രസ് വൈകിട്ട് 4.10 ന് മധുരയിലും വൈകിട്ട് 6 മണിക്ക് പഴനിയിലും രാത്രി 8 30ന് പാലക്കാടും എത്തിച്ചേരുന്നതാണ്.

മധുരയ്ക്കും രാമേശ്വരത്തിനുമിടയിൽ മാനാമധുര, പരമക്കുടി, രാമനാഥപുരം എന്നിങ്ങനെ മൂന്ന് സ്റ്റോപ്പുകളാണ് അധികമായി ഉണ്ടാവുക. കേരളത്തിലെ സമയക്രമത്തിൽ മാറ്റമില്ല.

12 സ്ലീപ്പർ കോച്ചുകൾ, ഒരു എസി ഫസ്റ്റ് ക്ലാസ് ടു ടയർ, ഒരു എസി ടു ടയർ, മൂന്ന് എസി ത്രീ ടയർ, നാല് ജനറൽ കോച്ചുകൾ എന്നിങ്ങനെയുള്ള ട്രെയിനിലേക്ക് റെയിൽവേ ബോർഡ് തീരുമാനത്തിന് പിന്നാലെ രാമേശ്വരത്തേക്കും തിരിച്ചുമുള്ള ടിക്കറ്റ് ബുക്കിങ്ങും ആരംഭിച്ചിട്ടുണ്ട്.

2001 ജനുവരിയിൽ തിരുവനന്തപുരം പാലക്കാട് റൂട്ടിലാണ് അമൃത എക്സ്പ്രസ് ആരംഭിച്ചത്. 2015 നവംബറിൽ പൊള്ളാച്ചിയിലേക്കും പിന്നീട് മധുരയിലേക്ക് നീട്ടിയ ശേഷമാണ് ഇപ്പോൾ രാമേശ്വരത്തേക്ക് നീട്ടുന്നത്.

Summary: The Railway Board has approved the extension of 16343/16344 Thiruvananthapuram Central-Madurai-Thiruvananthapuram Central Amritha Express up to Rameswaram. Hence, train no. 16343 Thiruvananthapuram Central-Rameswaram Amritha Express will leave Thiruvananthapuram Central at 8.30 p.m. with effect from October 16 and reach Rameswaram at 12.45 p.m. the next day. Train no. 16344 Rameswaram-Thiruvananthapuram Central Amritha Express will leave Rameswaram at 1.30 p.m. with effect from October 17 and reach Thiruvananthapuram Central at 4.55 a.m. the next day.