മറീനാ ബീച്ചിലെ കരുണാനിധിയുടെ തൂലികാസ്മാരക നിര്‍മാണത്തില്‍ നിന്ന് സ്റ്റാലിൻ പിൻമാറുന്നുവെന്ന് സൂചന

തമിഴ്നാട് മുൻമുഖ്യമന്ത്രി എം. കരുണാനിധിയുടെ സ്മരണാർത്ഥം ചെന്നൈ മറീന ബീച്ചില്‍ അദ്ദേഹത്തിന്‍റെ പേനയുടെ കൂറ്റൻ ശില്പം നിർമിക്കാനുള്ള പദ്ധതിയിൽ നിന്ന് തമിഴ്‌നാട് മുഖ്യമന്ത്രി എം.കെ. സ്റ്റാലിൻ പിൻമാറുന്നതായി റിപ്പോർട്ട്. അടുത്ത പാർട്ടി വൃത്തങ്ങളെ ഉദ്ധരിച്ച് ടൈംസ് ഓഫ് ഇന്ത്യയാണ് ഇക്കാര്യം റിപ്പോർട്ട് ചെയ്തിരിക്കുന്നത്. 81 കോടി രൂപ ചെലവിട്ടാണ് 134 അടി ഉയരമുള്ള തൂലികാ സ്മാരകം നിർമിക്കാൻ പദ്ധതിയിട്ടിരുന്നത്. ഈ വിഷയം സുപ്രീംകോടതിയിൽ വരെ എത്തിയെന്നും ചില വൃത്തങ്ങൾ ടൈംസ് ഓഫ് ഇന്ത്യയോട് പറഞ്ഞു. സ്മാരകം കടലിൽ നിർമിക്കുന്നതിനു പകരം മറീനാ ബീച്ചിലുള്ള കരുണാനിധി സ്മാരകത്തിന്റെ തൊട്ടടുത്തായി നിർമിച്ചേക്കുമെന്നും സൂചനകളുണ്ട്. എന്നാൽ ഇതേക്കുറിച്ച് സംസ്ഥാന സർക്കാർ ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല.