'തേജസ്വി വളരെ നല്ല കുട്ടിയാണ്; പക്ഷെ സംസ്ഥാനം ഭരിക്കാനായിട്ടില്ല': പ്രശംസിച്ച് ഉമാഭാരതി

ഭോപ്പാൽ: ആർജെഡി നേതാവ് തേജസ്വി യാദവിനെ പ്രശംസിച്ച് ബിജെപി നേതാവ് ഉമാഭാരതി. ബീഹാറിൽ എൻഡിഎ നേടിയ വിജയത്തിന് ശേഷം മാധ്യമങ്ങളോട് സംസാരിക്കവെയാണ് സംസ്ഥാനത്ത് മികച്ച പോരാട്ടം തന്നെ കാഴ്ച വച്ച ആർജെഡിയെ നയിച്ച നേതാവിനെ ഉമാഭാരതി അഭിനന്ദിച്ചത്. കുറച്ചു കൂടി മുതിരുമ്പോൾ തേജസ്വി ഒരു മികച്ച നേതാവാകുമെന്നും ഇപ്പോൾ അധികാരത്തിലെത്തിയിരുന്നുവെങ്കിൽ സര്‍ക്കാരിന്‍റെ കടിഞ്ഞാൺ ഈ യുവനേതാവിന് പകരം ലാലു പ്രസാദിന്‍റെ കയ്യിലാകുമായിരുന്നുവെന്നും ഉമാ ഭാരതി കൂട്ടിച്ചേര്‍ത്തു.