ഉപരാഷ്ട്രപതി തിരഞ്ഞെടുപ്പ്: ജയിക്കാന്‍ വേണ്ടത് 386 വോട്ടുകള്‍; മൂന്ന് പാർട്ടികൾ മാറി നിൽക്കുമ്പോൾ ബിജെപി ലക്ഷ്യമിടുന്നത്

വോട്ടുകള്‍ പ്രധാനമായും പാര്‍ട്ടി നിലപാടുകൾക്ക് അനുസൃതമാണെങ്കിലും ഒരു രാഷ്ട്രീയ പാര്‍ട്ടിക്കും വിപ്പ് പുറപ്പെടുവിക്കാന്‍ കഴിയില്ല. അതേസമയം ചൊവ്വാഴ്ച നടക്കുന്ന ഉപരാഷ്ട്രപതി തിരഞ്ഞെടുപ്പില്‍ നിന്ന് വിട്ടുനില്‍ക്കാന്‍ ഭാരത് രാഷ്ട്ര സമിതി(ബിആര്‍എസ്)തീരുമാനിച്ചിട്ടുണ്ട്. കെ ചന്ദ്രശേഖര്‍ റാവുവിന്റെ മകന്‍ കെടിആര്‍ ഈ തീരുമാനത്തിന് ബിജെപിയെയും കോണ്‍ഗ്രസിനെയും പഴിചാരിയിരിക്കുകയാണ്. എന്നാല്‍, ഈ വിട്ടുനില്‍പ്പ് ഇന്‍ഡി സഖ്യത്തിനാണ് കൂടുതല്‍ നഷ്ടമുണ്ടാക്കുക. കാരണം, ബിആര്‍എസിന് നാല് എംപിമാര്‍ മാത്രമെയുള്ളൂ.

വോട്ട് ചെയ്യാന്‍ യോഗ്യരായ ഏകദേശം 781 അംഗങ്ങളാണ് പാര്‍ലമെന്റിലെ ഇരുസഭകളിലുമായി ഉള്ളത്. പട്‌നായിക്കും കെസിആറും ശിരോമണി അകാലി ദളും വോട്ടെടുപ്പില്‍ നിന്ന് വിട്ടുനില്‍ക്കുന്നതിനാല്‍ ആകെ എണ്ണം 769 ആയി കുറയും. ഇതോടെ 386 വോട്ടുകൾ ലഭിച്ചാൽ ഭൂരിപക്ഷം നേടാൻ കഴിയും. ഇരുസഭകളിലും കൂടി എന്‍ഡിഎയുടെ എംപിമാരുടെ എണ്ണം 400 കവിയും. വൈ.വി. സുബ്ബ റെഡ്ഡിയുടെ 11 എംപിമാരും രാധാകൃഷ്ണന് വോട്ട് ചെയ്യുമെന്നതാണ് രസകരമായ കാര്യം.