ആറ്റിങ്ങലിലെ എൻഡിഎ സ്ഥാനാർത്ഥി വി. മുരളീധരന്റെ വാഹന പര്യടനത്തിനുനേരെ ആക്രമണം

പള്ളിക്കൽ ഗ്രാമപഞ്ചായത്തിലെ പകൽക്കുറി കൊട്ടിയംമുക്കിലാണ് സംഭവം. ബൈക്കിൽ എത്തിയ മൂന്നംഗ സംഘമാണ് പര്യടന വാഹന വ്യൂഹത്തിൽ കടന്നു കയറി അസഭ്യം വിളിച്ചത്. തുടർന്ന് അരമണിക്കൂറോളം പര്യടനം വി മുരളീധരൻ നിർത്തിവച്ചു. പള്ളിക്കൽ പൊലീസ് എത്തിയ ശേഷമാണ് പര്യടനം തുടർന്നത്.

പര്യടനത്തിലെ വാഹന വ്യൂഹത്തിൽ കടന്നു കയറി അനുഗമിച്ചിരുന്ന സ്ത്രീകൾ ഉൾപ്പെടുന്ന ബൈക്ക് യാത്രികരെയും കേന്ദ്രമന്ത്രിയും സ്ഥാനാർത്ഥിയുമായ വി മുരളീധരനെയും അസഭ്യം വിളിച്ച് ആക്രമിച്ചുവെന്നാണ് പരാതി.

പ്രവർത്തകരോട് സംയമനം പാലിക്കാൻ കർശന നിർദ്ദേശം നൽകിയശേഷം മുരളീധരൻ പള്ളിക്കൽ പോലീസിനെ വിവരം അറിയിക്കുകയുമായിരുന്നു. കേന്ദ്ര മന്ത്രിയുടെ സുരക്ഷാ ഉദ്യോഗസ്ഥനും പൊലീസിൽ വിവരം അറിയിച്ചു. കല്ലറകോണം ജംഗ്ഷനിലും അക്രമ സംഘം സംഘർഷത്തിന് ശ്രമം നടത്തിയെന്നും സിപിഎം കൊടി വീശിയാണ് കല്ലറകോണത്ത് സംഘർഷത്തിന് ശ്രമം നടത്തിയതെന്നും ബിജെപി നേതാക്കൾ ആരോപിച്ചു.

തെരഞ്ഞെടുപ്പ് കമ്മീഷനുമായും ബന്ധപ്പെട്ട് പരാതി നൽകുന്നതിനുള്ള നടപടികൾ ആരംഭിച്ചതായും സംഭവത്തിന് പിന്നിലുള്ളവർ പരാജയഭീതിയിൽ ആക്രമണം അഴിച്ചുവിടാൻ ശ്രമിക്കുകയാണെന്നും ബിജെപി പ്രവർത്തകർ പൂർണ്ണമായും സമാധാനം പാലിക്കണമെന്നും വി മുരളീധരൻ  അഭ്യർത്ഥിച്ചു.