ഓളപ്പരപ്പിന് തീപിടിച്ച് ജലരാജാക്കന്മാരുടെ പോരാട്ടം;കുട്ടനാടിനെ ത്രസിപ്പിച്ച് ചമ്പക്കുളം മൂലം വള്ളംകളിയുടെ ട്രയൽസ്

ആലപ്പുഴ: ഇക്കൊല്ലത്തെ വള്ളംകളി സീസണിന് തുടക്കം കുറിച്ച് ജൂലൈ മൂന്നിന് ചമ്പക്കുളം മൂലം ജലോത്സവം നടക്കും. മൂലം ജലോത്സവത്തിനുള്ള രജിസ്ട്രേഷൻ പൂർത്തീകരിച്ചു. ആറ് ചുണ്ടൻ വള്ളങ്ങൾ ഉൾപ്പടെ 12 കളിവള്ളങ്ങൾ മത്സരിക്കും. ജൂൺ 29, 30, ജൂലായ് 1 തിയതികളിലായി സാംസ്ക്കാരിക പരിപാടികൾ അരങ്ങേറും. കുട്ടികൾക്കും മുതിർന്നവർക്കുമായി നീന്തൽ മത്സരം ഉൾപ്പടെ വള്ളംകളിയുടെ ഭാഗമായി സംഘടിപ്പിക്കുന്നുണ്ട്. ചാമ്പ്യൻസ് ബോട്ട് ലീഗിന്റെ മുന്നൊരുക്കമായാണ് ബോട്ട് ക്ളബുകാർ മൂലം ജലോത്സവത്തെ കണക്കാക്കുന്നത്. വള്ളംകളിക്ക് മുന്നോടിയായി തിരുവിതാംകൂർ ദേവസ്വം അധികൃതരുടെ നേതൃത്വത്തിൽ മഠത്തിൽ ക്ഷേത്രം, മാപ്പിളശ്ശേരി തറവാട്, കല്ലൂർക്കാട് ബസിലിക്ക എന്നിവടങ്ങളിൽ ആചാരാനുഷ്ഠാനങ്ങളും നടത്തും.