LockDown: വിശ്വാസികളില്ലാതെ കർശന നിയന്ത്രണങ്ങളോടെ ഓശാന ഞായർ; ദേവാലയങ്ങളിൽ ചടങ്ങുകൾ മാത്രം

വിശ്വാസികൾക്ക് ദേവാലയത്തിൽ പ്രവേശനമുണ്ടായിരുന്നില്ല. പള്ളികളുടെ ഗേറ്റുകളും വാതിലുകളും പൂട്ടിയിരുന്നു. മിക്ക പള്ളികളുടെയും പരിസരത്ത് പോലീസ് വിന്യസിച്ചിരുന്നു. എന്നാൽ ചില പള്ളികളില്‍ ചടങ്ങുകൾ തൽസമയം കാണാൻ സൗകര്യമൊരുക്കിയിരുന്നത് വിശ്വാസികൾക്ക് ആശ്വാസമായി.

എറണാകുളം സെന്റ് മേരീസ് കത്തീഡ്രൽ ബസിലിക്കയിൽ സീറോ മലബാർ സഭ അധ്യക്ഷൻ കർദിനാൾ ജോർജ് ആലഞ്ചേരി ശുശ്രൂഷകൾക്ക് നേതൃത്വം നൽകി. തിരുവനന്തപുരം പട്ടം തിരുസന്നിധിയിൽ കർദിനാൾ ക്ലിമീസ് കത്തോലിക ബാവയുടെ കാർമ്മികത്വത്തിലായിരുന്നു ചടങ്ങുകൾ. ലത്തീൻ അതിരൂപത ആർച്ച് ബിഷപ്പ് സൂസൈപാക്യമാണ് പാളയം സെന്റ് ജോസഫ് മെട്രോപോളിറ്റൻ കത്തീഡ്രലിലെ ചടങ്ങുകൾക്ക് കാർമ്മികത്വം നൽകിയത്. കൊച്ചി സെന്റ് ഫ്രാൻസിസ് അസീസി കത്തീഡ്രൽ ദേവാലയത്തിൽ വരാപ്പുഴ ബിഷപ് മാർ ജോസഫ് കളത്തിപ്പറമ്പിലിന്റെ നേതൃത്വത്തിലായിരുന്നു ഓശാന ശുശ്രൂഷകൾ.